Téerëe bíníyú unna won Pool ɓëy Kolos ra
Kúnsëe
Ƴee daa unna bíní Pool ɓëy ílí jaŋii Kolos ra. Kolos nék, ɗi gin di ginna hom Aasi fa na wonuu Túrkí woteh ra. Wëerëy biti nék Pool pëyíɗté në. Epafaraas fa non ɓëewë ɓani wa na húmú ñéerúu légéy rë daa cëgíɗ jaŋaa daaha (1.7). Ɗi fi Epafaraas, ɗi ɓëy Kolos (4.12). Pool hom kasaa, Epafaraas acce teeɓi ri biti lahte ɓëewí na nofuu ɓëy ílí jaŋii Kolos na yëeddú wë yii bokaay Uni Nebi Yéesú-Kiristaa, na dupinu wa ɓaah yi wa. Wa húmú wonuu wa jaamiyoh malaaka, kaddee wa ñam ñamma aana a han hanna aana (2.16-21). Bi ɗeef Pool húmú kasaa mínéh pay ɓëy Kolos na, ɗi yeeltee waa bíní unni ƴeh.
Filiɓ unna, ɗi símpé Koope paaƴ, na an waa won biti Kiristaa daa paaꞌ ɓéeɓ sun : malaaka ya neh, kélfë yí wë neh (1.15-16). Ɗi wonte wa ɓal biti wa moytoh affi wa, wa ham Uni Neba liilu wa ra híin. Ɗi wonte biti wa koluute pesadi kíildë húmú homuu wa ra, wa henute mbínéef has Kiristaa na (3.5-10). Ɗi wonte wa biti ɓal Kiristaa daa af jaŋaa, jaŋaa hente faani te daa ri kélfíi ɓëy ílí jaŋaa (2.19).
Ɗi wonte wa :
- yii leŋke coono fa deƴ ri waarii Uni Neba ra (1.24-25),
- yii leŋke ɓeleɓ ƴaali na, a ƴaal ɓeleɓi na (3.18-19),
- yii leŋke koy boffi a yaafi na, a baap koohi na (3.20-21),
- a yii leŋke ñaam kélfíi në, a kélfë ñaami na (3.22 níi 4.1).
Ɓëyí fí jaŋi téeríi bee ɓéeɓ ay yúh biti ɓëyí fí non Kiristaa na hom lahaꞌ pes has.
1
Wodohi Pool ɓëy Kolos
1-2 Ɗon fi ɓëewí Koope ya homu Kolos ra, ɗon fi koy-yaayyee ke soꞌ pokuu Kiristaa na ra, soꞌ mi Pool, daa mi na wodoh ron. Soꞌ mi apootari Yéesú-Kiristaa ndah Koope daa fahaꞌ baaha. Timoote koy-yaafi yen na wodoh ron ɓal. Baap-Koo líhë rën mal, on ɗon jaamma !
Yee ɗagiɗ Pool ɓëy Kolos ra
3 Fun na símú Koope faraah, ɗi fi Boffi Yéesú-Kiristaa Yíkíi yen, biti fun ɗagire ron
4 ndah fun keluute biti ɗon gémúté Yéesú-Kiristaa te ɗon fahuute ɓëewí Koope ɓéeɓ.
5 Gémë gémú ron Yéesú-Kiristaa a fahaꞌa fahuu ron ɓëewí Koope baa ra tíkëh sun fi yee yaakaaru ron, Koope yefiɗte ron ri sun-Koo ra. Yee yaakaaru ron baa ra nék, ɗon yúhúu rí bee liiluu ron Uni Neba daa Kaaf ka ra.
6 Uni Nebi baa haslaꞌte ëldúnë ɓéeɓ ɗúhíɗté njiriñ, te ri man ɗaa nen ginon dalaꞌte bisa keluu ron ban fi mali Koope, ɗon yúhúté ɗee man mali baa kah-kah ra.
7 Epafaraas, koojee ke fun te bok a fun légéy baa ra daa yëedíɗ ɗon baaha. Ɗi súrgíi Yéesú-Kiristaa, bi pokohte ɗii na. Daa ri homiɗ fun ɗon na
8 te ri wonte fun ɗee fahuu ron ɓëewí Koope ndah Ruuh-Peseŋ ra.
9 Yii baa daa tah, keluu fun yii baa níi a ɗeh, fun dékúu ɗagiri ron te fun ɗaguu biti Koope on ɗon, ɗon ñaañ níi tígí teem ñaañ, ɗon lah nuf níi tígí teem lah nuf, ƴi kolaꞌ Ruuh-Peseŋ na, nda ɗon yúh níi lan yee fahaꞌ Koope ra.
10 Hen ɗaa raa, ɗon pes pesada fahaꞌ ri ra, ɗon ñee yii neɓaꞌ Yíkëe ɓéeɓ : ɗon ɗúhíɗ njiriñ ɗon page yii hente wun ɓéeɓ, ɗon ɓaatee yúh Koope ɗon saye.
11-12 Ɗon ay ɓedduu di yii mín ɗii hen ɓéeɓ a doolii ndami Koope níi ɗon mín múñ, ɗon ham híin di iña ɓéeɓ. Hen ɗaa raa, ɗon sím Baap-Koo a sos-keeñ, ɗi fa tah ɗon mín non iñi wunna yefiɗ ɗi ɓëewí filiɓ niiña ra.
13 Ɗi ɗúhíɗté yen ñúusë fúulté yen yaꞌ Seytaane, kúɗté yen filiɓ nguur ki Koy kee ke ri fahaꞌ ri níi fahaꞌ ra.
14 Ɗi ñeyaꞌ Koy ki baa na tosse yen, baalte yen bakaaɗɗi yen.
Kiristaa daa paaꞌ ɓëewë ɓéeɓ sun
15 Koy ki baa daa netli ɗi fi Koope fa ow mësëy tík íl rë.
Daa ri mëssí hen,
daa ri paaꞌ iña saku ra ɓéeɓ sun.
16 Koope ñeyaꞌ ɗii na sakke iña ɓéeɓ,
ƴee sun-Koo neh,
ƴee feey fa neh,
ƴee ow na tík wë íl rë neh,
ƴee ow mínéh wëe tík íl rë neh,
nguurra neh,
yii ílíffé ow neh,
mbínéeffë sun lahu sañ-sañ ra neh,
kélfë yí wë neh.
Koope ñeyaꞌ ɗii na sakke iña ɓéeɓ,
te iña ɓéeɓ homiɗ ɗi.
17 Daa ri ɗéɓ iña ɓéeɓ,
daa ri tah iña ɓéeɓ caŋ.
18 Daa ri afa, jaŋaa hente faana,
daa ri dalaana,
daa ri ɓëeꞌ ɗéɓpí koloh ɓúudé te húllëy taꞌ ra,
nda ri hen ɓëeꞌ këllëh ɓéeɓ rë.
19 Neɓaꞌ Koope neɓoo, yii hom ɗii na ɓéeɓ hompe Koohi na.
20 Koope ñeyaꞌ ñif ma yúf Koohi sun fi kurwaha ra,
yugusaꞌte hanndal ki ɓani iña sak ɗi ra ɓéeɓ :
ƴee sun-Koo neh,
ƴee feey fa neh,
jaamma lahte hanndal ki ɓani wa.
21 Ɗon fi ɓëy Kolos, filoon, ɗon húmú wuluute Koope. Ɗon húmú kaaꞌoh yi Koope ndah níɓ ɓos a pagaɗ ɓos,
22 ndaa leegi Koope ñeyaꞌte húlë húl Koohi ra, ɗi fi Koy ka boꞌ fi faani ñee mok ra, yugusaꞌte hanndal ki ɗon a ɗi. Hen ɗaa raa, yiin nay ron cëgírú fíi ɗi fi Koope ra, ɗeefa ɗon hen ɓëewí ladute, ɗon lëhíh síkkë, ɗon lëhíh yii wonun sun fon.
23 Baa nék, waɗti ɗeefa ɗon ham ngémë híin, ɗi yípëh gíŋ filiɓ fon, ɗon ɓanti wuloh yaakaara gapuu filiɓ Uni Neba keluu ron ra. Uni Nebi baa waariyute ëldúnë ɓéeɓ te soꞌ mi Pool, mi waariyaꞌ ri.
Yee tah Pool koloh ra
24 Tígë homaꞌ mi bee ra nék, keeñ soꞌ sosse coono fa deƴ mi af ɗon ra. Nagajek, boꞌ fi faan soꞌ deƴce coono nda mi mitsiɗ yee tas coono fa deƴ Kiristaa ndah faanee ke ri daa ɓëy ílí jaŋaa ra.
25 Soꞌ mi homiɗ jaŋaa ti di nahaꞌ soꞌ Koope paŋi nen bitih : mi waare ron Un Koope níi mit sëk.
26 Uni baa daa yee húmú níɓ ɗí te ow húmú yéeh rí rë. Ɗi húmú maañcee rii ɗap ɓëy jamanu yee filoon, ndaa leegi ɗi teeɓpe ri ɓëewí.
27 Ɗi húmú fahaꞌ teeɓi wa biti yee húmú níɓ ɗí te ow húmú yéeh rí baa ra gaante gaani ƴúukké tiŋ te ay njiriñ ɓëewë yëwúɗ neh ra ɓéeɓ. Yii baaha daa ri beh : Kiristaa ee filiɓ fon, baa daa teeɓaꞌ biti ɗon ay non ndami Koope.
28 Fun fi ƴee nék, fun waariyu ɓëewë ɓéeɓ Kiristaa fi baaha. Fun líkínúu ow fi ow ɓéeɓ, fun yëedíɗ wë a nufa on fun Koope ra ɓéeɓ, nda wa fa nonu Yéesú-Kiristaa na ra ɓéeɓ maan ngémë.
29 Yii baa daa tah mi na légéy, mi na paŋ ɓéeɓ a doolaa kolaꞌ Kiristaa na paŋ yin gaan soo na ra.