Téerëe bíníyú unna won Pool ɓëy Galasi ra
Kúnsëe
Ƴee daa unna bíní Pool ɓëewë dékú Galasi, te gémúté Kiristaa na ra. Ɗi húmú payte i gin caak di Galasi waarii wa Uni Neba (Saame Tílëdí apootarra 13.1 níi 14.23). Pool húmú waareyaꞌ biti rek yee nay tahe Koope habaꞌ ow ɓëyí júɓpé rë, ac biti kep ɓëeꞌ gém Yéesú në.
Jaŋiyuu unna bíní Pool ra, olu biti waɗti lahaꞌ yëwúɗɗí daa payu dín fë, yahute iña waare Pool ra ɓéeɓ, wonute wa biti Pool apootar kah-kah neh, te iña won ɗi ra kaah neh. Wa fi ƴaa anutee won biti nék, ɓëyí fí gém Yéesú te ɗeefa ri yëwúɗ neh, waɗtee ñee yee won Kootaa ra ɗi lecoh, Koope an ɗii habaꞌ ɓëyí júɓpé. Yii baa tahte níi sah wa kúrëelúuté Peer yee wonu wa baa ra. Ndaa Pool wonte af Peer fíi ɓëewë ɓéeɓ di yii baaha (2.1-14).
Ɗi wonte wa :
- yii leŋke di na habaꞌ Koope ow ɓëyí júɓpé (2.15-21),
- yii leŋke ɗee húmú habaꞌ wa Kootaa ñaam ra (3.23-25),
- yii leŋke séttí kah-kah yi Abraham, wa fa nonu ƴee límúu gapaꞌa húmú gap Koope Abraham ra, ti Isaak nen (4.21-31),
- yii leŋke ɗee múclëꞌ wë Kiristaa ñaam ka wa lahuute affi wa ra (5.1-4),
- yii leŋke pesada fahaꞌ Ruuh-Peseŋ ra (5.16-26),
- a yii leŋke yee na damaꞌ ɗi fi Pool ra (6.12-14).
Ɓëyí fí jaŋi téeríi bee ɓéeɓ ay ot biti ngém kep daa na tah Koope habaꞌ ow ɓëyí júɓpé, te ngém kep daa na tah ow pesaꞌ ti di fahaꞌ ri Ruuh-Peseŋ nen.
1
Wodoha
1-2 Ɗon fi ɓëy íllí jaŋi ya Galasi, soꞌ mi Pool, funi koy-yaayya funi wa homu dee ra, fun na woduu ron. Soꞌ mi apootar, ndaa ow daa fal soꞌ ri neh. Yéesú-Kiristaa a Baap-Koo fa këlíɗ ɗí ɓúudé rë daa falu soꞌ apootar.
3 Baap-Koo a Yéesú-Kiristaa Yíkëe líhún rën mal, on ɗon jaamma !
4 Ɗi fi Yéesú-Kiristaa yeraꞌte ñíiní nda ri múcël yen bakaaɗɗi yen, sëmlëꞌ yen doolii iñi ɓossa ëldúníi beh, ti di fahaꞌ ri Koope, ɗi fi Boffi yen nen.
5 Koope laha ndam dee níi kiri fi kirih ! Ɗémíin !
Uni Neba, ɗi yínë kut
6 Af soꞌ kúnëhté pak gaawa gaawu ron homi súugëhí Koope ra ! Koope dëekké rën, ñéyíɗté rí mala on ɗon Kiristaa ra, ɗon na anuu ñee uni nebi bokaay a Uni Nebi kah-kah fa a ?
7 Yee lah ra daa ri bitih kay, lahaꞌ ɓëewí daa na múuƴɗú ron, na fahuu lofi Uni Nebi Yéesú-Kiristaa, ndaa Uni Neba yínë kut, lahay na kay.
8 Wuti ow di fun na mbée malaakii kolaꞌ sun-Koo daa aya ɗon na waareye ron uni nebi bokaay a bee waariyu fun ɗon ɗa raa, Koope alaka ri !
9 Mi wonte ron ri, te mee ron rii wonaat ra ee : ow ac waare ron uni nebi bokaay a bee húmú gémú ɗon ɗa raa, Koope alaka ri !
10 Yee won mi ron baa ra, ɗon habuu biti mi saam tii ow na a ? Íi, mi saam tii naam, ndaa mi saamaꞌ ri Koope na ! Ɗon habuu biti ɓal mi saam neɓaꞌi ɓëewë ë ? Ëe-ëeꞌ, tii koon mi heneh súrgíi Kiristaa !
Ɗee henaꞌ Pool apootar ra
11 Koy-yaayyi ƴeh, mee ron won ra ee : Uni Neba na waare mi ron ra, ow neh daa sak ɗi.
12 Soꞌ mi kolaay ri ow na te ow yëeddëy sëꞌ rí, Yéesú-Kiristaa daa feeñiyoh soꞌ, teeɓ soꞌ ri.
13 Ɗon keluute ɗee húmú man mi na pokoh mi waali yëwúɗɗë rë maan ? Ɗon keluute ɗee húmú moklaꞌ mi ɓëy ílí jaŋii Koope mokli misikke ma na maanndaꞌ muuyli wa ra maan ?
14 Moroommi soꞌ yëwúɗ, caakke na ƴi mi húmú luk waa wul yii leŋke waali yëwúɗɗë, ndah mi húmú luk waa pokoh ɓaah yi caacca fap.
15 Ndaa Koope tanisse soꞌ ɗeef mi límúy, onte soꞌ mal dëekké sëꞌ,
16 teeɓpe soꞌ Koohi, nda mi waare heetti kayya yii leŋke Koy ki baa na. Teeɓaꞌ ri soꞌ Koy ka ra nék, soꞌ mi paay ɗeefiɗ ow meeli yii leŋke Uni Neba.
17 Soꞌ mi paay Yerusalem ɓal ɗeefri ɓëewë ɗéɓúu sëe hen apootar ra. Soꞌ kay, mi yíppí koloh koloo mi saañce Arabi, mi hompe dín fë níi bee nimilaꞌ mi Damaas ra.
18 Hente kíil éeyë filoon fe mi na anti pay Yerusalem, yúhí Peer. Lahaꞌ mi dín fë rë, mi hompe simin ana a ɗi daaha.
19 Mi olay na apootar kay, mi ot Saak koy-yaafi Yíkëe kep daaha.
20 Iña bíní mí ron ƴee ra kaah, te Koope mín sëe seede. Wa fel neh !
21 Filoon fi baaha, mi payte deyi ginni Sírí a Sílísí,
22 ɗeef ɓëy íllí jaŋi ya Yúdée mësúy sëe tík íl.
23 Wa keluu ɓúkkí ɓëewë kep biti ɓëeꞌ në húmú mokil wa merees ra, ee waare ngémë në húmú maanndaꞌ rii muuyil ra.
24 Yee pagiɗ soꞌ Koope baa ra tahte wa na kañu ɗi fi Koope.