27
Ɗee lohaꞌ Yakop ɓeɓpe ɗaŋi Esawuu ra
1 Bi ɓaha Isaak, íllë ñúussé níi ɗi na ollileh. Lahte bis, ɗi dëekké Esawuu koy ki saawi won ɗi tih : « Koy soꞌ dih ? Esawuu ! » Esawuu tahte won tih : « Mi abee baap ! »
2 Isaak ɓaatte won tih : « Fu otte biti mi maante. Yee tallaꞌ mi pesi soꞌ ra gaanay !
3 Kon ɓeye kas ku, fu haal aba ndín fu saamiɗ soꞌ ndawal.
4 Fu ac raa, fu pagiɗ soꞌ na ñami neɓaꞌte soꞌ, fu kom soꞌ mi ñam níi keeñ soꞌ sos ndín, mi ɗagiɗ ro balaa mi húl. »
5 Na won Isaak koohi na ra, ɗeef Rebekaa na síkírëh. Sayaꞌ Esawuu ɓoorsoh abin saamɗi boffi ndawal ra,
6 Rebekaa won koohi Yakop tih : « Mi kelohte boffu na won Esawuu biti
7 ɗi saamiɗ ɗi ndawal, ɗi pagiɗ ɗi ñami neɓpe. Ɗi ñam níi woc raa, ɗi ɗagiɗ ɗi Koo-Yahwee, balaa ri húl.
8 Kon síkírëh sëꞌ koy soꞌ, te fu paŋ yee nay mi roo nahe ra :
9 Paye yubin fu kaliɗ soꞌ sékét teem-teem ana yi wunute faan, mi pagiɗ boffu na ñami neɓpe ti ɗee fahaꞌ ri ra nen,
10 fu kom ri ɗi ñam ndín, ɗagiɗ ro balaa ri húl. »
11 Ndaa Yakop tahte won yaafi tih : « Fu yúhté biti faan Esawuu paalte jëfëñ a bi soꞌ muluc.
12 Baasoꞌ lalam faan soꞌ raa, ay yúh biti mi nofaꞌ ri nofoo ; tígí daaha, may malee cuñ ndée ɗaŋ neh. »
13 Ndaa yaafa tíkké won tih : « Cuña keena af soꞌ ɓal ! Page yee nah mi ro ra kut, te fu kom soꞌ sékéttë deh. »
14 Yakop payte, kompe wa yaafi. Yaafa paŋke ñama neɓaꞌ boffa ra.
15 Rebekaa antee tanis búuɓɓée lukki wun di búuɓɓí Esawuu ɓahaa, ƴee húmú yef ɗi fi yaafa ra, yeɗte wa Yakop ñéedë, ɓekohte.
16 Ɗi ɓeɓpe hunni sékéttë, ŋaawte yaꞌ yi Yakop a tígë lahay fen lúumë rë,
17 antee rii yeɗ ñami neba a mbúurëe paŋ ɗi ra.
18 Yakop lahte boffi na won tih : « Baap ! » Isaak tahte won tih : « Yaa yi koy soꞌ ? Daa fu wa na yínë paaƴ ? »
19 Yakop won ɗi tih : « Daa mi Esawuu koy ki saawu. Mi paŋke yee nah fu soꞌ ra. Yípée koloh fu ñam na ndawala hawiɗ mi ro ra, woc raa fu ɗagiɗ soꞌ. »
20 Isaak won ɗi tih : « Fu ñee di níi fu yíppée lah ndawal haat koy soꞌ ? » Yakop tahte won tih : « Bee oni funi Koope fu Yahwee. »
21 Isaak won ɗi tih : « Leɓoh soꞌ dee noo koy soꞌ mi lalam faanu níi lan soꞌ biti fu koy soꞌ Esawuu. »
22 Yakop leɓohte boffi, Isaak lalampe faana, won tih : « Una madaꞌ un Yakop, ndaa yaꞌ ya ƴi Esawuu. »
23 Bi hen yaꞌ ya jëfëñ a fënúf ti ƴi Esawuu koy-yaafi nen, ɗi yúhsëey rí. Ndaa na ɗagiɗ ri Yakop ra,
24 meelaatte ri paaƴ won ɗi tih : « Fu won kaah biti fu koy soꞌ Esawuu a ? » Yakop tahte, won ɗi tih : « Daa mi kay baap ! »
25 Tígí daaha, Isaak won ɗi tih : « Kon tíkíɗ sëꞌ loona mi ñam na boꞌ fu ndín, mi ɗagiɗ ɗo. » Yakop tíkíɗté boffi loona, boffa ñampe. Ɗi yeɗte ri béeñ ɓal, boffa hante.
26 Isaak antee won Yakop tih : « Leɓoh soꞌ koy soꞌ, fu yabaaloh soo na. »
27 Yakop leɓohte boffi, yabaalohte ɗii na. Haalaꞌ ri ngedi búubí, Isaak ɗagiɗte Yakop a unni ƴeh : « Ëlí kan ! Kiili fi koy soꞌ man ngedi meeyi Yahwee barkelte ri nen.
28 Ɗémíin Koo on ɗo na maala ɗúhëꞌ sun ra,
feey fi looɓpe,
pep caak
te béeñí neɓpe yooɓ ro !
29 Ɗémíin fu homa af i gin,
níi i tal ƴek fíyú !
Daa fay paaꞌee mboko yu ɓéeɓ sun, te wa ɓéeɓ ay roo sígímíɗ !
Ɓëyí ɗagiɗ ro yin wun, Koo líhë rí yeren !
Ɓëyí lah nuf ɓos ɗoo na nék, húlëe af ti úul nen ! »
Ɗee míllëꞌ Esawuu a boꞌ fi ra
30 Wocaꞌ Isaak ɗaŋa, Yakop saañce. Ɗi na gét, Esawuu ɗúhëꞌ ɓoorsoha na lah.
31 Ɗi nampee paŋ ñami neɓpe ɓal, kompe boffi won ɗi tih : « Baap ! Yípée koloh fu ñam na boꞌ fa ɗúhëꞌ mí ɓoorsoha ra, woc raa fu ɗagiɗ soꞌ. »
32 Isaak meelte ri won tih : « Daa fu wah ? » Ɗi tahte won tih : « Daa mi Esawuu koy ki saawu. »
33 Kelaꞌ ri uni bah, Isaak éempé níi faana ɓéeɓ na saak. Ɗi won tih : « Kon daa pay ɓoorsoh, kompe soꞌ boꞌ níi mi ñampe na balaa fu ac ? Mi liiltee rii ɗagiɗ te ɗaŋa hampe ! »
34 Kelaꞌ Esawuu unnee ke boffi ƴah, keeña líiffé, ɗi yefohte lëelí misikke, na won boffa tih : « Baap ! Ole yee homaꞌ mi ra rek fu ɗagiɗ soꞌ ɓal ! »
35 Ndaa Isaak won ɗi tih : « Aꞌ, koy-yaafu nofaꞌte soꞌ kat níi ɓeɓpe ɗaŋu ! »
36 Esawuu won daaha tih : « Daa ri ey ti hínú Yakop kaah, ndée ri nofaꞌte soꞌ waal ana. Ɗi ɗéɓpí ɓeɓ tígí saaw ki soꞌ, acce woteh ɓeyilte ɗaŋi soꞌ ! Fu tallaay kay fu ɗagiɗ soꞌ kan aa baap ? »
37 Isaak won ɗi tih : « Síkírëh sëꞌ koy soꞌ, mi mínlíléh yin na : mi tíkké rí sun fu, te mboko yi ɓéeɓ ay ñee uni. Daa ri lahaꞌ pebi caaga a béeñí neba. »
38 Esawuu yípëhté af boffi won ɗi tih : « Níi fu lahaꞌ ɗaŋ yínë kut a ? Ɗagiɗ soꞌ ɓal baap ! » Esawuu yípëetté afi na looy.
39 Tígí daaha, Isaak boffi won ɗi tih :
« Mi yúhté biti fay wuloh feey fi looɓpe,
a tígí na cépëꞌ maal.
40 Fay pesee haaꞌ a loh
te ñéedú nay roo paaꞌee sun.
Ndaa ay tíl níi fii rii míníl múñ,
yii won ɗo ri, fay rii nís, fu múc yaꞌi. »
Hegohi Yakop, a saañi faam taani
41 Ɓeya ɓeɓ Yakop ɗaŋa ra tahte Esawuu ngaaɗte ri níi na wonaaloh biti yee tas pesi boffi wa ra gaanlay, te ɗi húlé rek, ɗi bëemé Yakop.
42 Kelaꞌ Rebekaa yee won koy ki ɓahaa Esawuu ra, ɗi dëekrëhté Yakop ñéedë won ɗi tih : « Bee homaꞌ ɓahuu Esawuu bee ra, ɗi ee fahaꞌ yíllëh sun fu ra, na gapaꞌ hawu húl.
43 Kon síkírëh sëꞌ koy soꞌ, mi won ɗo : Yípée hegoh fu saañ Haran, faam Laban koy-yaasoꞌ.
44 Lah home dín fë níi keeñ koy-yaafu yëellëh.
45 Tíl níi neeɓi ɗúm ɗi hal yee paŋ fu ri raa, may wolaꞌ kalu. Mi fahaay biti mi ñak ɗon ɓéeɓ ana waala yínë. »
46 Filoon fi baaha, Rebekaa payte won Isaak tih : « Hetti ana ya kooɗ Esawuu ra tahute pesa ɗahte soꞌ níi ɗah. Yakop koora het ti ƴee ke Esawuu ƴee raa, mi húlë húlë daa génël sëꞌ pes yee tas fíi rë. »