29
Teyaꞌi Yakop a Rasel
1 Yakop ɓeyaatte waali, yuliɗte ginna púlëen naꞌ.
2 Ɗi tíl tílë níi lahte bis, ɗi otte yéem luufa. Bi hen yéemë hënndëe, yup éeyë yí lahaꞌ har a peꞌ ɓoofute tal yéemë. Ɓúk yéemë kúnúu a laꞌ gaan.
3 Yuppa ɓéeɓ teeꞌaꞌ raa, níirëh yë píníŋ laꞌa hom ɓúk yéemë rë ndín, wa hëníɗ. Woc raa, wa wëegísíɗ laꞌa ɓúk yéemë.
4 Yakop lahte na wodoh, meelte níirëh yë won wa tih : « Cëlíirí yaawe ! Ɗon ɓëy dih ? » Wa tahute wonu ri tih : « Fun ɓëy Haran. »
5 Ɗi meelaatte wa won tih : « Ɗon yúhú sédée ké Nahoor hínú Laban raa ? » Wa wonu ri tih : « Fun yúhú rí kay ! »
6 Yakop ɓaatte won wa tih : « Ɗon heluu ri lahte sos-faan a ? » Wa tahute wonu tih : « Ɗi yíilté ces ! Kúkëyí ɓelaa na ac bín rë sah kúɗ yuba ra koohi Rasel. »
7 Yakop tíkílté won tih : « Yúhí biti naꞌa lís sun ! Yup lahayti hëellú doom ; ɗon sehu yi hënndí wë a kúrí wë mburukliin ? »
8 Níirëh yë wonu ri tih : « Ëe-ëeꞌ ! Fun na héníh ɗah ! Fun sehuu sehoo níi yuppa ɓéeɓ teeꞌaꞌ, fun anti píníŋ laꞌa kúnúu ɓúk yéemë rë ndín, fun hëndíɗ. »
9 Lahi Rasel a yubi boffi, ɗeef Yakop líssí goneel a níirëh yë. Ɗi fi Rasel níirëh ɓal.
10 Olaꞌ Yakop koy taani a yuba, ɗi lahte yéemë, píníŋké laꞌa kúnúu ɓúgë rë, hëníɗté yubi taani.
11 Kolaꞌ Yakop dah, yabaalohte sun fi Rasel, muun mi na yookoh.
12 Yakop won ɗi tih : « Boffu taan soꞌ yaa-ow ! Mi koy Rebekaa. » Rasel yíppée múkë woni boffi baaha.
13 Kelaꞌ Laban ban fi ayi Yakop jarbaadi, ɗi yíppée koloh téebílëhté rí, yabaalohte sun fi antee rii kúɗ faami. Ɗaaha, Yakop ɓílíɗté rí iña kat ri ra ɓéeɓ.
14 Laban won ɗi tih : « Moo fu non faam fa kaah, ñif mi yen yínë ! »
Yakop hompe céyín múlgús faam fa.
Yakop a ɓeleɓɓi
15 Lahte bis, Laban won ɗi tih : « Ƴaal soꞌ, biti fu jarbaadi soꞌ ɓanay tah fu légéyéré sëꞌ pëtíh. Won soꞌ yee nay fuu waafu ra. »
16 Ɗeef Laban lahte koy ɓeleɓ ana. Ɓahaa hínú Leyaa, ñéedë hínú Rasel.
17 Íllí Leyaa ɗamay, ndaa Rasel húmú ɗampe ɓeleɓ te neɓpe yeel.
18 Bi ɗeef Yakop liiltee fahaꞌ Rasel, ɗi won Laban tih : « Fu tah oni soꞌ koohu Rasel ɓeleɓ raa, may roo légéyíɗ kíil paana. »
19 Laban tahte won tih : « Mi on ɗo ri daa nay géné biti mi ona ri ow kay dih ! Home faam soꞌ deh ! »
20 Fahaꞌi ɓeyi Rasel ɓeleɓ tahte níi kíillí paana ya légéyíɗ Yakop Laban ra man i waal ɗii na nen, bi fahaꞌ ri Rasel níi fahaꞌ.
21 Ɗi antee won Laban tih : « Aappii yen lahte maan ɓahaa ? Mi fahaꞌ biti koon fu yeɗ soꞌ ɓeleɓ soꞌ, mi kooɗ ɗi. »
22 Laban kolaꞌ daa yíppé ndaje, gappe ɓëy hatni baa ɓéeɓ kílëegë.
23 Ndaa yúhëꞌ rí biti Koo ñúkúffé rë, ɗi ɓeɓ Leyaa kompe Yakop neeꞌte ɗii na.
24 Laban ɓeɓpe Silpaa súrgíi, yeraalohte ri koohi Leyaa.
25 Yíilëꞌ Koo kéy fín, Yakop ot Leyaa ! Tígí daaha, ɗi payte won Laban tih : « Fu pagaꞌ soꞌ yii baa ɗíh ? Af Rasel daa húmú tah mi légéyíɗ ɗo neh a ? Haalaꞌ yi níi fa na nofaꞌ soꞌ ? »
26 Laban won ɗi tih : « Fun ɓaahuuy biti kúkëy ɓeleɓ ɗéɓ ɓahii kooru daa tah ɗee ƴaal soꞌ !
27 Lúsɗé waalli paana yi kílëegë a ɓahaa. Woc raa, fun ay roo on ñéedë ɓal, biti fu tah légéyíɗí sëꞌ kíil paana kay fíi. »
28 Yakop tahte yee won ɗi Laban ra. Lúsɗëꞌ rí waalli paana yi kílëegë a Leyaa ra, Laban yeɗte ri Rasel.
29 Laban ɓeyaalohte Bilhaa súrgíi, yeɗte ri koohi Rasel.
30 Yakop namiltee neeꞌ a Rasel fa ɗi lukki fahaꞌ ri ra. Ɗi yabilte légéyíɗí Laban, yuliɗte ri kíil paana kay.
Koyyi Yakop
31 Olaꞌ Koo-Yahwee biti Yakop lukki fahaꞌ Rasel ra, ɗi keñilte Leyaa, ndaa teeɓay Rasel koy.
32 Leyaa pokke loo, lahte koy ƴaal, dëekëꞌté rí Ruben (daa ri : ëlí ! Bee koy ƴaal). Ɗi won tígí daaha tih : « Yahwee otte súfúñ fí sëꞌ ; nda ƴaali soꞌ mín sëe fahaꞌ waay ! »
33 Leyaa pokaatte loo, lahaatte koy ƴaal kay. Ɗi won tih : « Biti mi fahuuy, Yahwee keloh na, daa kúɗ koy ki ƴaali ana fi beh. » Ɗi dëekëꞌté rí Simewoŋ (daa ri : kelohte).
34 Ɗi pokilte loo kay lahilte koy ƴaal. Ɗi won tih : « Waali beh, ƴaali soꞌ ay pokoh soo na koma kom mi ri koy ƴaal éeyë rë. » Koy ka dëekúuté Léwí (daa ri : ay pokoh).
35 Ɗi poklaatte loo, lahlaatte koy ƴaal. Ɗi won tih : « Waali yíníi beh, may kañe Yahwee ! » Ɗi dëekëꞌté rí Yudaa (daa ri : ay kañ). Ɗi antee caŋ, lécíɗté lah koy.