32
1 Kéy ɓaaɓ fin cúɓ Laban kolohte, langaamohte koyyi ɓeleɓ a séttí, ɗagiɗte wa, antee saañ nimilte gin wa.
Kolohi Yakop teeꞌaꞌi a Esawuu koy-yaafi
2 Yakop ɓeyaatte waali na saañ. Lahte malaaka yi Koope ƴi ayute téebílëhí.
3 Olaꞌ wa Yakop ra, ɗi tahte won tih : « Bee dali Koope kan ! » Ɗi dëekëꞌté tígë Mahanayim (daa ri : dalli ana ya).
4 Yakop antee yeñ i ndiik Esawuu koy-yaafi na, di deyi Edom fin gini Séyíir.
5 Ɗi won wa tih : « Lah wëní Esawuu biti soꞌ mi Yakop súrgíi, mi húmú saañ ɓaaɓ faam Laban, te mi húmú në níi a ɗeh.
6 Wëní rí biti mi lahte i fana a i mbaam, i har a i peꞌ, i súrgë ƴaal a ɓeleɓ. Lah wëní rí biti ɓal mi wolaꞌ ɗi fi kélfíi sëꞌ në ɗi teeɓu iñƴaaha, nda ɗi mín sëe tahaꞌ a yaꞌ ana. »
7 Ndiikka payute, ayute wonu Yakop tih : « Fun léhínúté koy-yaafu Esawuu. Ɗi ee ac téebílëhú rë, ñéerëꞌté a ow tíméer iniil (400). »
8 Kelaꞌ Yakop woni baa ra, ɗi tíit tíitë níi faana ɓéeɓ na saak. Ɗi ɗaralsaꞌte ɓëewí goomal ana, hente harra, peꞌ ya, fañnja a géléemmë ɗaaha ɓal.
9 Yakop won nufi daaha tih : « Esawuu yejoh haaꞌ goomal yínë rëe, yínëe ay mín hegoh ! »
10 Yakop antee yefoh ɗaŋ won tih : « Ɗo fi Koope fa na jaamiyuu cissoꞌ Abraham a baasoꞌ Isaak ra, ɗo fi Koo-Yahwee fa túuƴ sëꞌ nimil faam di gin fun, te fu won ti fay soo pagiɗ yin wun ra,
11 mi caleh naaꞌi-keeña teeɓ fu soꞌ ra ɓéeɓ a yeɗɗaya yeɗɗay fu soꞌ, soꞌ mi súrgúu rë. Mi húmú lahaꞌ duudi soꞌ kut yaꞌ soꞌ na húus mí laahi Yurdeŋ ra, ndaa mi nimilaꞌ a goomal ana woteh.
12 Sëmlëꞌ sëꞌ yaꞌ ɓahii soꞌ Esawuu, ndah mi kaañay ri ; te mi neehte biti ɗi ac boollaꞌ funi ɓeleɓɓa a tuŋka ɓéeɓ bëem fun.
13 Nérsée biti daa fu húmú won soꞌ tih : May roo pagiɗ yii wunte níi wun, mi paŋ níi talu gaan, séttú caak níi caak ti peppi feey fa tíñ kísí nen. »
14 Ɗagaꞌ Yakop níi wocce ra, ɗi neeꞌ tígí daaha yiin fa.
Ladaꞌ Koo ra, ɗi tansiɗte Esawuu ɓahii yoobbol, di júrë lahaꞌ ri ra :
15 hente peꞌ ɓeleɓ tíméer ana (200) a sékét sabay ana (20), har ɓeleɓ tíméer ana (200) a kuuy sabay ana (20),
16 géléem sabay éeyë (30) yí homu ɓëpíɗ a koyyi wa, fana ɓeleɓ sabay iniil (40) a naal sabboo, mbaam ɓeleɓ sabay ana (20) a mbaam ƴaal sabboo.
17 Ɗi tíkké yuppa, bina-bina ɓéeɓ yaꞌ súrgë yí kayaꞌ-kayaꞌ, antee waa won tih : « Ɗon ay soo këllée këllëe, ɗon hanndalaꞌ yuppa. »
18 Ɗi won súrgëe nay këllée rë tih : « Fu teeꞌaꞌ a ɓahii soꞌ Esawuu níi ri meel ro kélfúu, mbée tígë në saañ fu ra, mbée ɓëeꞌ lahaꞌ yuba këllíɗ fú rëe,
19 lah wone ri tih : “Ɓahaa, súrgúu Yakop daa kélfíi sëꞌ ; daa ri kéyrëꞌ rë yubi bee yoobbol, te ri ee ac filoon ra.” »
20 Yakop wonte unni ƴaa súrgëe ñee na ra, wonte waa bee tíkëh në rë ɓal, a ƴee yuppa tíkú yaꞌ yi wa ra ɓéeɓ, antee ɓaat won wa tih : « Ɗoni Esawuu teeꞌaꞌ raa, lah wëníi rí ɗaaha,
21 te ɗon ɓaat ɗii won biti Yakop súrgíi ee ac filoon ra. » Yakop habaꞌ nufi biti ɗi këllíɗ yoobbola raa, keeñ Esawuu mín yëellëh. Hen ɗaaha raa, Esawuu mín ríi téebílëꞌ wun.
22 Ɗaaha, yuppa yeraꞌ ri yoobbol ra këllúuté rí, ndaa ɗi fi bah, ɗi neeꞌ dala daaha elgi baaha.
Lofi tii Yakop, hente Israyel
23-24 Filiɓ elga, Yakop kolohte ɓeɓpe ɓeleɓɓi ana yi a súrgë yí wë, Bilhaa a Silpaa, a koyyi sabboo a yínë yí, húusíɗté wë laahi Yabbok a iña lahaꞌ ri ra ɓéeɓ.
25 Gétúu wë rë, Yakop a afi kut tasute daaha. Ow haalohte ri bërëꞌ daaha, wa neeꞌute bërëꞌ níi miir-miirin.
26 Yúhëꞌ ɓëeꞌ biti ɗi mínéh faas Yakop ra, ɗi laɓ ri laɓo poogal, muguƴce legeƴa,
27 antee ri won tih : « Yeris soꞌ mi saañ, Koo ee saañ lade ra ! » Ndaa Yakop won ɗi tih : « Mii roo yeris fu saañ te fu barkeleh soꞌ. »
28 Ɓëeꞌ meelte ri won tih : « Fu hínú ɗíh paaƴ ? » Ɗi tahte won tih : « Mi hínú Yakop. »
29 Ɓëeꞌ ɓaatte won tih : « Fii dëeklúu Yakop ; dalaꞌte woteh, fay dëekúu Israyel (daa ri : bërëꞌ a Koo), af biti fu tíkëꞌté Koope a ɓëewë af, te daa fu ɓaŋ. »
30 Yakop meelte ri won tih : « Teeɓ soꞌ tiyu hém neɓaꞌ ro. » Ɓëeꞌ won ɗi tih : « Fay pagee tii soꞌ yih ? » Tígí daaha, ɓëeꞌ barkelte ri.
31 Yakop antee won tih : « Mi tíkké Koo íl ngëeƴ te yin katay soꞌ ! » Yii baa daa tah Yakop yeɗ tígí daa tii Penuwel (daa ri : kanam Koo).
32 Lani Koo ɗeef Yakop húussé tígë lukki teeƴ laaha ra di Penuwel, ɗi na yíiɓ af muguƴohi legeƴa.
33 Yii baa daa tah níi a woteh, ɓëy Israyel na ñëmíh boꞌ poogal, ndah biti Yakop húmú laɓu poogal.