44
Yami Beŋsame loh
1 Suseef antee nah súrgëe kúɗ yii leŋke faam fa ra won ɗi tih : « Soɗɗe ɓëewí ƴee saaku yi wa yii mín wëe eɓ ɓéeɓ di pesaa, te fu wëegísíɗ hélsí wë ɓúk-ɓúkkë.
2 Lah ɓekaalee gulee ke soꞌ yugusuu hélíis rë ɓúk saakii bee lukki paaꞌ kúkëy rë, ñéerëꞌ a cadum fi pebi. » Ɓëeꞌ paŋke yee nah ri Suseef ra.
3 Yíilëꞌ Koo kéy fín, wa pëkísúuté, sayute a mbaammi wa.
4 Wa ɗúhúté gina, ndaa liiluy rii wuloh, na won Suseef ɓëeꞌ bitih : « Kolee fu daɓaat ɓëewée koon ; fu lah waa na raa, wone wa biti iñi wunna pagiru wa ra ɓéeɓ, wa símúu wë ɗaaha a ?
5 Yi tah wa loh gulaa na hanaꞌ a na ɗíkísëꞌ ɓahaa ra ? Wa pagute yii ɓosse ! »
6 Ɓëeꞌ daɓpe wa, wonte wa unni ƴaaha.
7 Ndaa wa tahute wonu ri tih : « Fu wonaꞌ yii baa ɗíh ɓahaa ? Fun kaañuy paŋ yii man ɗah !
8 Fu olay biti koluu fun Kanaan ra, fun kúrëelúuté hélsë olu fun ɓúkkí saaku ya ra, fun wëegísírúté rë wë ë ? Ay haalee yi níi fun ay lohe hélíis mbée úrís faam yíkúu ?
9 Ɓëeꞌ yaa nay oluu ɗii na ra hawun húl. Te fun fa tasu ra sah hen ñaammu. »
10 Ɓëeꞌ won tih : « Mi tahte yee wonu ron ra. Ndaa ɓëeꞌ yaa nay ɗeefu ɗii na ra kep daa nay hene ñaami soꞌ, ɓëewí kayya ladu ra yeɗɗu saañ. »
11 Wa yípútée cépíɗ saaku yi wa, ow fi ow waa na ɓéeɓ kúníssé bii.
12 Ɓëeꞌ ñeete saaku ya ɓéeɓ na saam, dalaꞌte bi saawa níi míllëꞌ bi bee lukki paaꞌ kúkëy rë. Gulaa ɗeefu saakii Beŋsame.
13 Wa tíkúté yaꞌ yi wa affi wa ; eɓaatute mbaammi wa, wëegísúté ginin.
Ɗee cagiraꞌ Yudaa Beŋsame ra
14 Lahuu Yudaa a koy-baappi faam Suseef ra, ɗeef ɗi na seh wa, wa hawuute feey líhúuté fíyí.
15 Suseef won wa tih : « Ɗon paguu pagadi baa ɗíh ? Ɗon yíih biti ɓëewë madu a fun ra mínú ɗíkís yin fi yin ɓéeɓ ë ? »
16 Yudaa tahte won tih : « Fun lahuy yii wonun fun ɓah, fun lahuy yii layuun fun níi fun lan. Koope daa yíiñ fun. Funi ɓëeꞌ gulaa ɗeefu ɗii na ra ɓéeɓ daa nay lígínée hen ñaammu. »
17 Ndaa Suseef won wa tih : « Mi kaañay paŋ yii bah. Ɓëeꞌ gulii soꞌ ɗeefu ɗii na ra daa nay hene ñaami soꞌ. Ɗon fi ƴah, wëegísí boffi ron na a jaamma. »
18 Yudaa antee leɓoh Suseef, won ɗi tih : « Ɓahaa baal soꞌ unna nay mi roo wone ƴee ra ; fu ɓanay naa haayloh ; ndée mi yúhté biti ɗoni buur yínë :
19 ɗéɓúu fun ac dee ra, fu meelte fun nda fun lahute baap, nda fun talluute koy-baap kay.
20 Fun wonute ro biti fun lahute boffi ɓahate a koy-boffi daa paaꞌ fun kúkëy. Lahi boffi fun koy ki bah, ɗeef ɗi ɓahate, te ɗi fahaꞌte ri níi fahaꞌ. Ɓahii húlté, ɗi tallaꞌ ri kut yaafi na.
21 Fu antee fun won tih : “Këmí sëꞌ rí, mi ot ri a íllí sëꞌ.”
22 Fun wonu ro tih : “Kúkëyë mínéh wuloh boffi, wa takaꞌ raa, boffa ay jomloh.”
23 Ndaa fu won fun tih : “Ɗon ñéerúuy a ñéedí ron raa, ɗon ii cagil fíi sëꞌ.”
24 Wëegísúu fun súrgúu boffi fun na ra, fun ɓíllúté rí yee won fu fun ra.
25 Daa tah wonaꞌ boffi fun bitih : “Wëegísí ɗon ɓaatee pesaa” ra,
26 fun wonu ri tih : “Fun mínlíh pay Ésíp, hém fun ñéerúuy a ñéedí fun. Ɗi ñéyrëꞌ a fun raa fun ay mín pay, henay baaha raa, fun ii mín caŋ fíi ɓëeꞌ.”
27 Súrgúu boffi fun won fun tih : “Ɗon yúhúté biti funi ɓeleɓ soꞌ Rasel lahuu koy ana :
28 ɓëyí yínëe kolohte yaꞌ soꞌ, mi habaꞌ biti yin daa palsaꞌ ri. Ndée mi ollilay ri níi a woteh.
29 Ɗon ɓeyil bee yaꞌ soꞌ bee níi yin kat ri raa, bee ɓahayaꞌ mi bee ra, ɗon ay tah súfúñ hap soꞌ húl.”
30-31 Mi wëegís faam níi baasoꞌ kan kúkëyë rëe, ñíinë mín nëe teem, ndah pokoha pokoh ri ɗii na ra. Te bi ɓaha ri súfúñ hap ri húl, ɗeef fun.
32 Ɓaatte biti daa mi cagoh ɓahaa, mi na ɗaŋ níi ɗi yeɗɗaꞌte soꞌ ri ; daa mi níidí. Mi gappe ri biti mi nimliray ri koohi raa, daa mi lahiɗ ɗi bakaadi baa pesi soꞌ ɓéeɓ.
33 Kon mi ɗaŋ ro biti fu yeris kúkëyë nimil a koy-baappi, fu ham soꞌ ñaam tígí.
34 May nimilee ɗí faam baasoꞌ te mi ñéerëey a ri ? Ɗamaay mi ole súfúñ fë nay homee baasoꞌ ra ! »