46
Saañi Yakop Ésíp
1 Yakop tíkëhté waala a iña lahaꞌ ri ra ɓéeɓ. Lahaꞌ ri Beer-Sebaa ra, ɗi hawiɗte Koope fa na húmú jaamiyoh Isaak boffi ra.
2 Elgin, di filiɓ yodaɗ, Koo dëekké rí won ɗi tih : « Yakop ! Yakop ! » Ɗi tahte won tih : « Yëew ! »
3 Koope ɓaatte won tih : « Daa mi Koo, Koope fi boffu. Ngana néekíñëꞌ yin saañu Ésíp, ndée may paŋ níi talu ɓaatoh dín fë caak níi caak.
4 Soꞌ mi beh, daa mi nay roo ɓede Ésíp, te mi yeɗte ro un soꞌ, daa mi nay roo wëegísíré ɓal. Yiin nay fuu ñame gaawa súhíɗ rë, fay lúsée yaꞌ Suseef. »
5 Yakop kolaꞌ ɗaaha Beer-Sebaa ; koyya yëegírúté boffi wa, ɓeleɓɓi wa a koyyi wa sareetta kéyrëꞌ wë buur kalii wa ra.
6-7 Wa kúrëelúuté yuppi wa ɓal, a alal ma lahuu wa Kanaan ra ɓéeɓ. Yakop ñéerëꞌ a ɓëy faami ɓéeɓ Ésíp : ɓani koyyi, séttí a sétëettí, ƴaal a ɓeleɓ. Yakop a ɓëy faami ɓéeɓ kélsúuté ɗaaha Ésíp.
Ɓëy faam Yakop di Ésíp
8-15 Tii yi ɓëy faam Yakop, ƴee ñéerúu a ri Ésíp rë, daa wa ƴeh :
Koyyi Yakop a Leyaa, séttí a sétëettí :
Ruben saawa a koyyi : Hanok, Palu, Hesron a Karmi.
Simewoŋ a koyyi : Yemuwel, Yamin, Ohat, Yakin, Sohar a Sawul koy ɓelaa dék Kanaan ra.
Léwí a koyyi : Gerson, Kehat a Merari.
Yudaa a koyyi : Selaa, Peres a Serah (Er a Onaan húlúu Kanaan). Peres a koyyi ana yi : Hesron a Hamul.
Isakaar a koyyi : Tola, Puwah, Yasup, a Simron.
Sabuloŋ a koyyi : Seret, Elon a Yahleyel.
Ƴaa daa tala límíɗ Leyaa Yakop homuu wa Padan ra ; wa henute ow sabay éeyë a ow éeyë (33), ɓaatte Dinaa koy wa ɓeleɓ ñéerëꞌté a wa ɓal.
16-18 Koyya, séttë a sétëettë lahuu Yakop a Silpaa ra daa wa ƴeh :
Gaat a koyyi : Sifiyon, Haggi, Súní, Esbon, Eri, Arodi a Areyeli.
Aseer a koyyi : Yimna, Yiswa, Yiswi, Beriyaa a Seerah koy-yaafi wa ɓeleɓ. Beriyaa a koyyi : Hebeer a Malkiyel.
Ƴaa daa tala límíɗ Silpaa Yakop ra ; wa henute ow sabboo a ow pëenë (16). Silpaa húmú súrgíi Leyaa. Laban daa húmú ɓeɓ Silpaa yeɗte ri koohi Leyaa.
19-22 Koyya a séttë lahuu Yakop a Rasel ra daa wa ƴeh : Suseef a Beŋsame.
Suseef a Asnat koy Potiferaa, seeƴoh di On lahute koy ana Ésíp : Manase a Efarayim.
Beŋsame a koyyi : Belaa, Bekeer, Asbel, Geraa, Naamaan, Éhí, Roos, Múpím, Húpím a Arde.
Ƴaa daa tala límíɗ Rasel Yakop ra ; wa henute ow sabboo a ow iniil (14).
23-25 Koyya a séttë lahuu Yakop a Bilhaa ra daa wa ƴeh :
Dan a koohi Húsím.
Neftali a koyyi : Yahseyel, Gúní, Yeseer a Silem.
Ƴaa daa tala límíɗ Bilhaa Yakop ra ; wa henute ow paana. Bilhaa húmú súrgíi Rasel. Laban daa húmú ɓeɓ Bilhaa yeɗte ri koohi Rasel.
26 Ɓëy faam Yakop, ƴee nonu tala ñéerúu a ri Ésíp rë henute ow sabay pëenë a ow pëenë (66), bokaay a ɓeleɓɓi koyyi.
27 Ɓaat koyyi ana ya lahaꞌ Suseef Ésíp rë rëe, ɓëy faam Yakop ɓéeɓ henute ow sabay paana (70).
Yíbí faam Yakop Gosen
28 Yakop këllíɗté Yudaa, wolte ri Suseef na woni biti ɗi ac ɓani teeꞌaꞌ Gosen. Lahuu Yakop a ɓëy faami Gosen ra,
29 Suseef pokke wëtíirí, ɗeefiɗte boffi dín fë. Lahaꞌ ri fíyí rë, ɗi ñuŋaarohte lúumë, looyte na yii maañce.
30 Yakop antee won Suseef tih : « Hém daa fu líssí pes níi mí tíkké rë íl rëe, mi mín húl leegi a sos-keeñ ! »
31 Tígí daaha, Suseef won koy-baappi a ɓëy faam boffi tih : « Cëgí mi pay woni buur biti koy-baappi soꞌ a ɓëy faam baasoꞌ, ƴee húmú Kanaan ra ayute.
32 May rii won biti ɓal ɗon i níirëh har, peꞌ a fana ; te ɗoni yuppi ron a iña lahuu ron ra ɓéeɓ daa ayu.
33 Buur dëek rën níi meel ron yee na pagu ron raa,
34 lah wëní rí biti ɗon ɓaahuu níiɗ. Ɗaaha raa, ɗon ay mín yípëꞌ faamon deyi Gosen deh, ndée ɓëy Ésíp wonuy yin níirëh. »