49
Unna míllëꞌ won Yakop ra
1 Filoon fi baaha, Yakop dëekké koyyi, tëekíɗté wë won wa tih :
« Ëyí ɓéeɓ, mi won ɗon iña nay lahe ɗon na fayu ra.
2 Tëekí fíi sëꞌ dee koyyi soꞌ. Síkíríi sëꞌ, soꞌ mi Israyel boffon.
3 Ɗo fi Ruben, daa fu koy ki saawi soꞌ.
Na lah mi ro ra, ɗeef mi lahte doole te ñif mi soꞌ na múkë.
Daa fu luk koy-baappu doole a jom.
4 Fu madaꞌ a húlbí basaꞌ basoo !
Fanoha fanoh fu a ow di ɓeleɓɓi soꞌ sun fi tigal ki soꞌ ra nék
sëpíɗté sëꞌ lool, daa tah fii këllíil koy-baappu.
5 Simewoŋ a Léwí if a ɓëlgís : ñéerëꞌí wë poyaꞌ gin.
6 Mi fahaay bok a wa nuf múk ! Ɗamaay mi ɗeefee teeꞌaꞌ yi wa,
ndah wa bëemúté i ow haayluu wa ra,
te ɓosi nufa waa na ɓekke wa lec síl kot i naal fana.
7 Haaylohi misiga waa na ow mínéh yin na ra, tahan wa alkoh !
May woralsaꞌ koyyi wa a séttí wë filiɓ Israyel,
mi haslaꞌ wa ɓéeɓ gin Yakop.
8 Ɗo fi Yudaa, koy-yaayyu ay roo kañ,
te koy-baappu ay roo sígímíɗ,
ndah biti ɓëewë na haaꞌuu ro ra ay ƴek fíyú.
9 Yudaa koy soꞌ, fu man fiili gaynde fi baa
malohte ɓoorsohi níi na nimil faami ra nen !
Múumé fanoh hílsée rëe, daa kaañ rii këlíɗ ?
10 Nguur ka ii koloh yaꞌ Yudaa,
te duudi nguur ka ay home tali níi bín ayaa yíkíi rë :
daa ri ɓëeꞌ ɓëewë ɓéeɓ ay ñee uni ra.
11 Ɗi ay pokee mbaam fi tal béeñ,
pok koy ka yaꞌ béeñë lukki wun ra.
Ɗi ay hosee búuɓɓí a béeñ, hosaꞌ sabidoori a ñif reseñ.
12 Béeñ ay takil íllí, miis naaꞌil síssí.
13 Sabuloŋ ay déké ɓúk kísí fë, tígí ay lah teeraa gaal,
te feey fi ay laɗ níi waal Sidon.
14 Isakaar madaꞌ a mbaam fi lahte doole.
Fanaꞌ ri hanndal ki líikkí gélíkkë,
15 ɗi otte biti tígë neɓpe hílsëe te gina wunte.
Ɗi yeraꞌte bíiŋí séfëe, tahte légéy ñaam.
16 Dan ay aattiyaꞌ ɓëewí ti talli kayya Israyel nen.
17 Dan madaꞌ a goŋ fa ɓúk waala,
ɗi man ti hiliñ fa laroh kúyíɗ kë rë nen ;
ɗoɓaa ri pënís fë kot rek, jégëe júlkíñëh keen.
18 Ëey Koo-Yahwee sëmlëꞌ sëꞌ ! Daa fu yaakaari soꞌ !
19 I haaꞌoh yejuute Gaat na,
ndaa ri míllëꞌtée wëe lík, ñeete talli wa.
20 Gin Aseer ay loof níi loof !
Feey fi ay ɗúhíɗ ñami neɓaꞌ buur.
21 Neftali madaꞌ a fandaay fa fús baa ra ;
na lím koyyi wunna ra nen.
22 Suseef kilki na lím hom ɓúk warla ra.
Yaꞌ yi kilka ƴúukké tiŋ ka !
23 I yeesoh kas tooñute ri, yejuute ri haaꞌ, yeesute ri kas.
24 Ndaa ɗi hampe hélí kas ki híin, bi lah ri doole te ri tarte ;
ɗi hampe hélí kas ki híin, bi habraꞌ ri Koope fi Gaana na jaamiyoh Yakop ra,
Koope fa na níiɗ rë,
bee na woh Israyel ra.
25 Koope fi boffu sëmlëe rë,
ɗi fa mín ɓéeɓ rë barkela ro.
Ɗémíin ɗi barkel ro a mulii caagi ɗúhëꞌ sun,
a ƴi ɗúhëꞌ keeñ feey.
Ɗémíin ɗi barkel ro níi fu keñ te yuppa caak.
26 Iñi wunna pagiɗ Koope boffu ra luk ƴee mëssí ɗúhëꞌ daŋŋa ra,
wa luk alal mi dúŋŋée kíil níi rë.
Ɗo fi Suseef, ɗo fa paaꞌ koy-baappu ɓéeɓ sun ra,
ɗémíin iñi wunni ƴaaha cép sun fu, ti ɗee pagiraꞌ ri soꞌ ra nen.
27 Beŋsame madaꞌ a baade fi sohoorte !
Ɓaaba, ɗi ñam yee hap ri ra ;
fíníin fín, ɗi woralsaꞌ yii lah ri. »
28 Ƴaa daa ɓëewë yípú talli sabboo a ana yi Israyel ra. Boffa wonaꞌ wa ɗah. Ow fi ow waa na ɓéeɓ, ɗi wonte ri unna míllëꞌ rí ríi won ɗa.
29 Filoon fi unni ƴah, Yakop nahte koyyi won wa tih : « Soꞌ nék, mi ee ɗeefiɗ caacci soꞌ ɓúudé rë ee, lah féhéyí níi ɗon hacaꞌ soꞌ hëbís wë filiɓ kila hom meey Eforon fi ɓëy tali Het ɗa :
30 daa ri kila Makpelaa bee jaanndaꞌ gini Mamre di Kanaan ra. Abraham saam kila hacaa, daa tah ɗi lom ɓani meeya Eforon fi ɓëy tali Het na.
31 Daa ri tígë hacuu Abraham a Saara ɓeleɓi ra ; tígë hacuu Isaak a ɓeleɓi Rebekaa ra ; mi hacaꞌ Leyaa tígí daaha ɓal.
32 Meeya a kila hom na ra lomuu Hetta na. »
33 Wonaꞌ Yakop koyyi na níi wocce ra nék, ɗi yeɗɗohte tigal ka lússé, ɗeefiɗte caacci.