3
Daa lukki yeeliyoh kañ hanndal ki Yéesú a Mëyíis ?
1 Koy-yaayyi ƴeh, kon ɗon fa henu ƴi Koope ra, ɗon fa ɗi dëek ɗën ɗë, yéelí Yéesú në. Daa ri ɓëeꞌ Koope wol ri ra te daa ri Seeƴohi gaani ngémë na waariyu yen ra.
2 Di húmú pokaꞌ Mëyíis légéyë déŋéenú rí kúrí ɓëy faam Koope filoon, Yéesú pokaꞌ légéyë déŋéen ɗí Koope ra ɗaaha.
3 Ndaa nék Yéesú luk Mëyíis yeeliyoh kañ ti faam a ɓëeꞌ taɓah ri ra nen : ɓëeꞌ taɓah faam fa ra, daa luk faam fa yeeliyoh laas !
4 Faam fi faam ɓéeɓ ow daa taɓah ri, ndaa Koope daa taɓah iña ɓéeɓ.
5 Mëyíis húmú pokohte légéyë húmú déŋéenú rí kúrí ɓëy faam Koope ra, ndaa ti súrgë nen kut, nda ri hen seedii yee nay wone Koope filoon fe ra.
6 Ɗi fi Kiristaa nék, pokohte ndaa ti Koy nen, Koy ka tíkú sun fi ɓëy faam Koope, na ílíf wë rë. Yen fi ƴee nék, yen daa ɓëy faami hém yen ham híin te yen damaꞌ yee yaakaaru yen ɗa níi lúsëenín.
Ɗee nay tahe ow non hílsëhë waaƴiɗ Koope ɓëewí rë
7 Yii baa daa tah ɗon waɗti tík nuffon yee won Ruuh-Peseŋ bee ra :
« Woteh fee Koo beh,
ɗon keloh Un Koope,
8 ngënë súhrí keeññon ɗon kaaꞌ ñeyi na,
ti di húmú kaaꞌuu caaccon ñeyi na filoon,
bee húmú homuu wa luufa,
na saamu olsohi Koope ra. »
9 Koope won tih :
« Caaccon húmú tíkúuté sëꞌ af,
saamute olsohi soꞌ.
Añcaŋ, wa húmú tíkúté íllí wë sun fi iña paŋ mi ra
10 níi hente kíil sabay iniil (40).
Yii baa daa tah keeñ soꞌ húmú haay ɓëy jamanii bah,
mi won tih :
“Níɓɓí wë dékëꞌ múuƴɗí wë,
wa kaaꞌuute yúhí yee nahaꞌ mi ra.”
11 Filiɓ haayi keeñ soꞌ,
mi añohte biti wa ii mëssí non hílsëhë húmú waaƴiɗ mi wa ra. »
12 Kon koy-yaayyi ƴeh, lah mëytíi ! Ow yínë sah ɗon na waray súh keeñ kaaꞌ gém níi súugée Koope fa na pes ɗa.
13 « Woteh fee Koo beh » fa wonu Téerëe rë, daa lís níi a ɗeh. Kon hém ɗi gétëy rek, lah ënëntíi doole hanndal kon faraah, toñeh ow di ɗon na yeris bakaaɗ kúrëelëh rí níi ɗi súhíl keeñi kaaꞌ keloh Un Koope.
14 Nagajek, yen nonu Kiristaa na hém yen ham yaakaara húmú lahu yen dalaana ra híin níi lúsëenín.
15 Yen olute biti Téerëe won tih :
« Woteh fee Koo beh,
ɗon keloh Un Koope,
ngënë súhrí keeññon ɗon kaaꞌ ñeyi na,
ti di húmú kaaꞌuu caaccon ñeyi na filoon. »
16 Te sah ɓëewë húmú keluu Un Koope, kaaꞌuute ñeyi na ra, wa i wah ? Wa ɓëewë Mëyíis húmú ɗúhíɗ wë ɓéeɓ Ésíp rë neh a ?
17 Ɓëewë keeñ Koope húmú haay wa kíil sabay iniil (40) ra, wa i wah ? Wa ɓëewë húmú bakaaru te húlú ɓéeɓ luufa ra neh a ?
18 Koope húmú añohte won tih : « Wa ii mëssí non hílsëhë húmú waaƴiɗ mi wa ra. » Ɗi húmú wonaꞌ i wah ? Ɗi húmú wonaꞌ ɓëewë húmú kaaꞌuu ñee woni ra neh a ?
19 Ɗaaha, yen olute biti caacci yen míníh haal gina nay waa hílsée koon ɗa, ndah kaaꞌa kaaꞌuu wa gém Koope na ra.