8
Yéesú-Kiristaa daa Seeƴoha lukki gaan ɗa
1 Yee lukki lah solo woni fun ra, daa ri beh : Yen lahuu Seeƴohi gaani man ɗah, ti di wonuu fun ɗon ɗi nen. Ɗi ín tookke sunaa-sun hëbís Koope fa gaan doole ra, hompe yaꞌi ñamaa fi,
2 na légéy filiɓ tígí selaa. Tígí selii baaha, daa taantii Koo-Yíkëe kah-kah, bee rí yíp rí ndée ow neh ra.
3 Seeƴoh gaan ɓéeɓ tansu jébëlí iña nay yeree ɓëewë sarah ra, a ƴee nay waa hawre Koope ra. Kon, bi yen ɓal waɗtee lah yii nay rii jébëlé sarah.
4 Ɗi homa feey fi bee koon, tin ɗi lukki heneh seeƴoh sah, ndah feey fa lahte seeƴoh yi na jébëlú sarah ya nahaꞌ Kootaa ra.
5 Wa fi seeƴoh yi ƴaa légéyúu tígí selaa naam, ndaa tígí selii baaha netli tígí kah-kah fa hom sun-Koo ra kut, ɗi man sëegú nen ɗii na. Na húmú waaƴaꞌ Mëyíis yíbí taantii selaa ra, Koope húmú won ri tih : « Yuguse iña ɓéeɓ níi ri madaꞌ a bee teeɓ mi ro sun fi daŋa ra. »
6 Légéyí seeƴoha yeru Yéesú rë nék, luk bi seeƴoh yi ƴaa lah solo fap. Ti ɗaaha nen, yii hasa pok Koope hanndal ki ɓani ɓëewë te Yéesú hom hanndal ka ra luk bee ɗéɓ ɗë lah solo fap. Yee pok Koope baa ra yípëh sun fi iña gapaꞌ ri ra, te iña gapaꞌ ri ƴaa ra daa gén ƴee ɗéɓ ɗë.
7 Ƴaha biti koon yee húmú pok Koope a ɓëewée filoon ɗa lahay yii wonun na koon, tin yii baaha nísíh níi kay tíkëe.
8 Ndée nagajek, Koope húmú wonte affi ɓëewí won tih :
« Síkíríi ! Soꞌ mi Koo-Yíkëe, mi won tee :
ay lah jamanii,
may pok yin has
hanndal ki funi ɓëy Israyel
a funi ɓëy Yudaa.
9 Yii baa ii madaꞌ a bee húmú pok mi hanndal ki funi caacci wa filoon,
bee húmú habaꞌ mi yaꞌ yi wa,
mi ɗúhíɗté wë Ésíp rë.
Wa fi ƴaa húmú ñeyuy yee húmú pok mi baa ra,
daa tah soꞌ mi ɗúhíɗté nuf soꞌ waa na.
Soꞌ mi Yíkëe, mi won ɗaaha.
10 Filoon fi baaha,
yee nay mii poke
hanndal ki funi ɓëy Israyel ra,
daa ri beh :
may ɓek túuƴëꞌ yí sëꞌ affi wa,
mi bíní wë keeññi wa,
mi hen Koope fi wa,
wa hen ɓëewí sëꞌ.
Soꞌ mi Yíkëe, mi won ɗaaha.
11 Ɓëewë ɓéeɓ ay soo yúh !
Ii sohliil ow ëe ow waa na yëeddé moroomi.
Ii sohliil ow wone koy-yaafi tih :
“Yúhé Koo-Yíkëe !”
Dalaꞌte bee lukki hen kúkëy rë
níi bee lukki hen ɓaha ra ɓéeɓ ay soo yúh !
12 May waa baal iñi ɓossa pagu wa ra,
te nuf soꞌ ii payil bakaaɗɗi wa. »
13 Ɗon ot Koope won ban pok yin has hanndal ki ɓani ɓëewë, ɗeef bee ɗéɓ rii pok hanndal ki wa ra ɓahate, te yii ɓahate, ɓaha níi cohoɓ raa, ay yooɓpi saañ waali.