15
Malaaka yi paana ya a loolla míllëꞌ rë
1 Filoon fi baaha, mi otte yin kay, yii gaante te éemílëꞌté sun-Koo : mi ot malaaka paana yi kúrú lool paana, loolli paana ya míllëꞌ, teeɓaꞌ Koope ɓëewë neeɓi ra.
2 Mi olaatte yin ti kísí fí mulaa heleŋ ti pilaatu nen ñéerëꞌté a kíi. Ɓëewë ɓagu raba, ɓagute netli a síifërí tiyi ra cagute sun fi kísí fë na tiriñ ra, wa habute koraa yi Koope daa yeɗ wa wa,
3 wa na ƴeeku ƴeekii Mëyíis súrgíi Koope a ƴeekii Har fa yeraꞌ Koope sarah ra na wonu tih :
« Ɗo fi Koo-Yíkëe fë mín ɓéeɓ ɗë,
fu gaante pagaɗ,
fu éemílëꞌté pagaɗ.
Ɗo fi Buuri heetta,
waallu júɓpé,
waallu kaah.
4 Daa kaañ roo neeheh Yíkëe ?
Daa kaañ roo kañeh ?
Ɗo kep daa fu sela !
Heetta ɓéeɓ ay ac fíyú,
heetta ɓéeɓ ay ac jaamiyohu.
Iña paŋ fu ra júɓpé,
iña paŋ fu ra teeɓaꞌte affi wa. »
5 Filoon fi baaha, mi otte Faam fi gaani Koope, bee ëmbë taantaa na nédís ɓëewë biti Koope ee leelii wa ra, kúnsëhté sun-Koo.
6 Malaaka yi paana ya kúrú loolli paana ya ra ɗúhúté Faam fi gaana ; wa ɓekuu búuɓ naaꞌ peyeɓ, ƴi yugusuu píisí kofeelte, pokuute geñu úrís kinoh yi wa.
7 Mbínéef yínë di mbínéeffí iniilla yeɗte malaaka yi paana ya guluŋŋi úríssí paana ya túm neeɓi Koope ra níi líiffé, Koope fa na pes faraah ra.
8 Faam fi gaana yíppée líif a ɗúukëe, teeɓaꞌi ndami Koope a doolii. Te ow mínéh haal Faam fa te ɗeefa loolli paana ya kúrú malaaka ya ra laɓeh níi gét.