22
1 Filoon fi baaha, malaakaa teeɓpe soꞌ laahi mulaa na onaꞌ pesa na ɗúméh rë, bi hente heleŋ ti pilaatu nen, kolaꞌ ñaani Nguur ki Koope a Har fa,
2 na hút këemí gina. Hanndal ki salli laaha, tal kilka na onaꞌ pesa na ɗúméh rë hompe na, bee na límëꞌ waal sabboo a waal ana kíilë rë, lahaa céyín ɓéeɓ ɗi lah koy ra. Saaffa daa na paƴ heetta.
3 Alkoh wocce, ñaani Nguur ki Koope a Har fa ay home filiɓ gina, súrgë yë jaamiyee ri.
4 Wa ay ot kanama, te tiyi ay bíníyú púkkí wë.
5 Elek wocce, wa ii sohliil lampii nay waa niiñle, sohluuy naꞌa, ndah Koo-Yíkëe ay waa niiñil, wa hom nguur ka faw.
Nimili Yéesú
6 Filoon fi baaha, malaakaa won soꞌ tih : « Unni ƴaa wëerté te wa kaah. Koo-Yíkëe fë në soɗ yonente ya Ruuhi ra daa wol malaakii teeɓi súrgë yí yee na saañ lahe te wulay wulay ra. »
7 Yéesú won tih : « Síkíríi ! Soꞌ may nimil te ii maañ ! Lahute sos-keeñ ɓëewë helu nuf unnee ke Koope filiɓ téeríi bee ra ! »
8 Soꞌ mi Saŋ, mi kelohte te mi otte iñƴaaha. Filoon fi bee kelaꞌ mi wa mi otte wa ra nék, mi yeɗɗohte kotti malaakaa teeɓ soꞌ wa ra, ma na saañ jaamiyohi,
9 ndaa ɗi won soꞌ tih : « Bëyít ! Ngana paŋ ɗi ! Soꞌ mi súrgë ti ɗo a koy-yaayyu yonente ya, a ɓëyí fí helte nuf unna filiɓ téeríi bee ra nen. Fu waɗti jaamiyaa Koope kep ! »
10 Malaakaa ɓaatte won tih : « Ngana ɗap yin unnee ke Koope filiɓ téeríi beh, ndah wahtii wa ee saañ lahe ra.
11 Ɓëyí ɓosse haba paŋ yin ɓos ; ɓëyí sobete homaa a sobii ; ɓëyí júɓpé haba paŋ yin júɓ ; ɓëyí selate, súhë në. »
12 Yéesú won tígí daaha tih : « Síkíríi ! Soꞌ may nimil te ii maañ, mi yíníl ow fi ow ɓéeɓ yee légéy rí rë.
13 Daa mi Alfaa daa mi Omegaa, daa mi ɗéɓ daa mi míllëꞌ, daa mi dalaana daa mi lúsëenë.
14 Lahute sos-keeñ ɓëewë na hosu búuɓɓí wë rë, wa ay mín ñam na koy kilka na onaꞌ pesa na ɗúméh rë, wa ñeyaꞌ íllë, wa haal filiɓ gina.
15 Ɓëewí ɓossa nék : wa fi luunna, ɓëewë na njaaliyuu ra, ƴee na bëemú ow ra, ɓëy yúullë a ɓëewë fahuu fel te dékúu në rë homun ëssín.
16 « Soꞌ mi Yéesú, daa mi wol malaakii soꞌ teeɓi ɗon fi ɓëy ílí jaŋaa iñƴeh : Soꞌ mi sédí Dawit, te daa mi hula na niiñ hagaɗ ɗa. »
17 Ruuh-Peseŋ a kílëegí Har fa wonu tih : « Aye ! »
Ɓëyí fí keloh uni baa rek wona : « Aye ! »
Ɓëyí fí sifiroh aya !
Ɓëyí fí fahaꞌ na mulaa na onaꞌ pesa na ɗúméh rë meeluy na dara !
18 Soꞌ mi Saŋ, mi won a ɗon, ɗon fi ɓëewë keluu Unni Koope filiɓ téeríi bee ra ɓéeɓ në : ɓëyí fí ɓaat na yin, Koope ay rii ɓaat loolla wonu filiɓ ra.
19 Te ɓëyí nís në yin, Koope ay rii nísíɗ wodi di koyyi kilka na onaꞌ pesa na ɗúméh rë, nísíɗ ɗí tígí di gini selaa na wonuu filiɓ téeríi bee ra.
20 Ɓëeꞌ won biti iñƴaa ɓéeɓ kaah ra won tih : « Mantee : Soꞌ may nimil te ii maañ ! »
Ɗémíin ! Aye Yéesú-Yíkëe !
21 Yéesú-Yíkëe líhë rën ɓéeɓ mal !