Téerëe ɗéɓpí bíníyú unna won Pool Timoote ra
Kúnsëe
Pool bíníyëꞌté Timoote waal ana. Ƴee daa unna ɗéɓ ɗí ríi bíní rë. Na bíní rí Pool unni ƴee ra ɗeef ɗi fi Timoote ín Efes. Tii Timoote nék caakutee capu filiɓ Téerëe bíníyúu tílëdí apootarra ra a unna bíní Pool ra.
Ɗi fi Timoote, yaafa húmú yëwúdí haalte ngémë, boffa húmú gerek. Pool na yëedíɗ ɗí, habaꞌte ri koy kah-kah ɗii na, ɓani Pool na ñéerúu waarii Uni Neba (Saame Tílëdí apootarra 16.1-3).
Tígí húmú kelaa Pool gini fí yúhté biti ngémí ɓëy ílí jaŋaa hompe ëylëh ɓéeɓ, mbée tígí ɗi húmú fahaꞌ yúh yee homuu ɓëy ílí jaŋii baaha ra, ɗi hoñci wolaꞌ Timoote. Ɗi húmú wolte ri ɓëy Tesalonik na (Saame 1 Tesalonik 3.2-3) ; wolte ri ɓëy Korente na (Saame 1 Korente 4.17) ; wolte ri ɓëy Efes na.
Wolaꞌ ri ri ɓëy Efes na ra, ɗi húmú nah ri habraꞌi wa nda wa ham ngémí wë híin, ndah húmú lahaꞌ ɓëewí në yëeddúu iñi bokaay a ngémë, na múuƴɗú wë (1.3-7).
Unna ɗéɓ ƴee ra, Pool líkínté ɗi fi Timoote a faanaŋ fi, wonte ri iña waɗ ɗii líkín ɓëy íllí jaŋi ya ra ɓal.
Ɗi wonte wa :
- yii leŋke di waɗ waa fahantuun hanndal ki wa (1.5),
- yii leŋke líkíní Timoote ɓëy ílí jaŋaa (1.18-19 ; 4.7, 11-16),
- yii leŋke di waɗti tílëe jaŋaa (2.1-15 ; 5.1 níi 6.2 ; 6.17-19),
- a yii leŋke di waɗti madun njíittí jaŋi ya (3.1-7).
Ɓëyí fí jaŋi téeríi bee ɓéeɓ ay yúh ɗee waɗti tílëe jaŋaa ra te ri ay mín moytoh ɓëewí në múuƴɗú ɓëewë a yëeddëꞌ yí wë rë.
1
Wodohi Pool Timoote
1-2 Ɗo fi Timoote, ɗo fa habaꞌ mi koy kah-kah filiɓ ngémë rë, soꞌ mi Pool, soꞌ mi apootari Yéesú-Kiristaa daa mi na wodoh ro. Koope Sëmlëhí yen a Yéesú-Kiristaa yaakaari yen daa falu soꞌ apootar. Baap-Koo a Yéesú-Kiristaa Yíkíi yen líhún ɗë mal, teeɓ ɗo naaꞌ-keeñ, on ɗo jaamma !
Yëeddëh yí paɗɗah ya
3 Na húmú saañ mi Maseduwaan ra, mi húmú nahte ro fu tas Efes, fu won ɓëewë në yëeddúu iña na múuƴíɗ ɓëewí kayya ra biti wa ɓan ɗii paŋ. Di húmú nahaꞌ mi ro ri, mi nahaꞌ ro ri ɗaaha woteh,
4 fu kaddaꞌ wa wonna waa na saku sako ra a cabi tii yi caacca mínéh ɗúmmë homuu wa ra. Wonni ƴaa kúrëꞌ capaꞌ kep, na ɓaateh dara yee fahaꞌ paŋ Koope ra. Yee fahaꞌ paŋ Koope baa ra nék, ngém kep nay tahe ow yúh rí.
5 Fu ot mi nah ro kaddaꞌi ɓëewë në yëeddúu iñƴaa ra, nda ɓëy ílí jaŋaa fahantaꞌ hanndal ki wa a keeñi lante, nufi lante a ngémí mitte.
6 Lahte ɓëewí helute waali baa múuƴúté, haalute wonni lahay njiriñ.
7 Wa habuu affi wa ɓëewí yëeddúu Kootaa, wa anti yíih dara iña na wonu wa ra a ƴee na digiru wa ra.
Yee tah Kootaa koloh ra
8 Nagajek, yen yúhúté biti Kootaa yii wunte, hém ɗi pesuu ti di waɗ ɗii pesuun nen.
9 Yen yúhún biti Kootaa saamɗuy ɓëewë júɓú rë. Kootaa saamɗu ɓëewë në ñéyíh woni Koope ra, ƴee faaliyuuy ri ra, ƴee kaañu Koope ra, bakaaroh ya, ƴee onuy Koope cér onuy yii kolaꞌ Koope na cér rë a ƴee na bëemú yaayyi wa mbée baappi wa mbée ɓëewí kayya ra.
10 Kootaa saamɗu ɓëewë na pagu yii tappe njaaliyoh ɓéeɓ rë ɓal, gëer-jígéennë, ɓëewë na habu ɓëewë yaaye wa wa hen ñaam ra, feloh ya a ƴee na añuu di yii henay kaah ra. Maanam, Kootaa saamɗu ɓëewë na pagu yii haaƴaay a iña yëeddú rën te daa kaaf ka ra.
11 Iña wonu ƴaa ra ee filiɓ Uni Neba teeɓaꞌ ɗee líifëꞌ Koope a ndam ra. Ɗi fi Koope fa baah teem ɗii na ra déŋéenté sëꞌ Uni Nebi bah.
Símí Pool Yéesú-Kiristaa
12 Kon, ma na sím Yéesú-Kiristaa Yíkíi yen, ɗi fa lekoh soꞌ yeɗte soꞌ légéyí beh, antee tík onte soꞌ doolaa waɗ na ra.
13 Te añcaŋ, filoon mi húmú wonaꞌ ɓos sun fi, mi sole ɓëewë gémú ɗii na ra, mi mokle wa. Ndaa ɗi yérémpé sëꞌ ndah mi húmú gémëy ɗii na, mi yéeh yee na húmú paŋ mi ra.
14 Yéesú Yíkíi yen onte soꞌ mali mínéh ɗúm : mi gémpé ɗii na, mi fahaꞌte moroomi soꞌ fahaꞌi kolaꞌ ɗi fi Yéesú-Kiristaa na.
15 Woni wëerté te mit lekoh abeh : Yéesú-Kiristaa ac ëldúnë sëmlëꞌí bakaaroh ya. Soꞌ mi beh, daa mi bakaaroha lukki gaan ɗa,
16 ndaa Koope yérémpé sëꞌ, nda Yéesú-Kiristaa ñeyaꞌ soꞌ fa lukki gaan bakaaroh ya bee ra, teeɓaꞌ míní múñí. Hen ɗaaha raa, ɓëewë gémú ɗii na nay haale pesa na ɗúméh rë yeel yee kat soꞌ raa, wa ɓaatti ham ngémí wë.
17 Ɗi fi Koope fa daa Buur faraah ra,
ɗi fa na pes faraah ra,
ɗi fa ow mësëy ríi tík íl rë,
ɗi fa yínë kut ɗa,
daa ri mit ɓéyíɗ,
daa ri yeeliyoh ndam
dee níi kiri fi kirih ! Ɗémíin !
18 Leegi ɗo fi Timoote koy soꞌ, yee líkín mi ro baa ra, ɗeefiɗte iña húmú wonu ɓëewë në léhínú unni kolaꞌ Koope na sun fu bín fë rë. Iñƴaaha hena ganaay ɗoo na wa ɓeddaꞌ ro légéyí wuna nah mi ro ra,
19 fu paŋ ɗi a ngém a nufi lante. Lahte ɓëewí kaaꞌuute paŋ nufi wuna hom waa na ra níi tahte ngémí wë saatate.
20 Himene a Iliksaan nonu ɓëewí ƴaaha. Mi tíkké wë yaꞌ Seytaane nda wa koroh, wa ɓanti solil Koope.