3
Di waɗti man njíit jaŋi
1 Woni wëerté abeh : ɓëyí fahaꞌ hen njíit jaŋi, ɗeef ɗi fahaꞌ légéyí wunte.
2 Njíit jaŋi nék waɗti hena ɓëyí lahay dara yii wonun sun fi, teem ɓeleɓi na kut, ɗi hen ɓëyí teeyte, mín ham afi, ɗí hen ɓëyí yéŋké ow. Ɗi waɗti hena ɓëyí mínté haneel, mínté yëeddëꞌ,
3 ɗi ɓanti hen ɓëyí haaꞌ a han kep daa afi. Ɗi waɗti hena ɓëyí sosse te na íñéeh, ɗi ɓanti hen ɓëyí gémpé hélíis.
4 Ɗi waɗti hena ɓëyí kúɗté faami kúrí ñeete waal, ɗi koɗ koyyi níi wa yeɗ ɗi cérí mitte sëk.
5 Ɓëyí mínéh kúɗ faami kúrí ñeete waal, ɓëyí baa ay mínée kúɗ ɓëewí Koope ɗíh ?
6 Njíit jaŋi waray hen ɓëyí anti haal ngémë, toñeh ɗi paama gaan-gaanloha níi Koope daan ri ti di daanaꞌ ri Seytaane nen.
7 Ɗi waɗti hena ɓal, ɓëyí yéŋké biti ɓëewë nëníh yen na ra wonuu wun sun fi, toñeh ɗi keen fíirí Seytaane, wa habaꞌ ri ow ɓos.
Di waɗti man ɓëyí në habraꞌ njíit jaŋi
8 Ti ɗaaha nen, ɓëewë na habruu njíittí jaŋaa ra waɗti henun ɓëewí mitu yeɗ cér te wonuu kaah. Wa waruy hen ɓëewí han kep daa affi wa a ɓëewí paguu yii waray, saame na alal.
9 Wa warun ham kaaf ka hom ngémë teeɓ yen Koope ra a nufi lante.
10 Wa warun olsuu olsoo paaƴ níi lan biti lahay yii wonun sun fi wa, wa anti mín hen ɓëewí nay habree njíittí jaŋaa.
11 Ti ɗaaha nen ɓal, ɓeleɓɓa warun hen ɓëewí mitu yeɗ cér, në wëníh ɓos sun ow, teeyute, mitute lekoh iña ɓéeɓ.
12 Wa fi ɓëewë na habruu njíittí jaŋaa ra, ow fi ow waa na ɓéeɓ waɗti teya ɓeleɓi na kut, wa kúɗ faammi wa kúrí ñeete waal, koɗ koyyi wa kori wunte.
13 Wa fi ɓëewí ƴaaha légéyí wë wun ɗaa, wa ay kañu. Wa ay waariyee a fídí mitte sëk di yii leŋke ngémí wë Yéesú-Kiristaa na.
Yii gaana teeɓ yen Koope ra
14-15 Soꞌ nék, mi yaakaarte bitih, leegi mi ac yérú ndaa mín hen ayi soꞌ gaaweh. Baa daa tah mi bíní rë unni ƴeh. Hen ɗaa raa, fu yúh ɗee waɗti pesaa ow filiɓ Faam Koope ra. Faam fi baaha, daa ɓëy ílí jaŋii Koope fa na pes ɗa. Daa ri cíbë ham kaaf ka ra.
16 Woni ow mínéh ríi nís abeh : Kaaf ka teeɓ yen Koope nda yen pokoh ɗii na ra gaante !
Kiristaa acce hente ow,
Ruuh-Peseŋ teeɓaꞌte biti ɗi júɓpé,
malaaka ya tíkúté në íllí wë ngëeƴ.
Ɗi waariyute heetta,
lahte ɓëewí gémúté ɗii na ëldúnë ɓéeɓ.
Ɗi këllúté feey fa,
saañce sun-Koo a ndam.