10
Jézù lòkòꞌbò có gítí ŋa ꞌduù ŋìnó mbe ꞌvii tí mbe kpolo tí ndâ i-kó-ko
1 Jézù giì lòkòꞌbò có ji ndâ ꞌduù máa, «Mbe ꞌvìì ndùgù tacó bà ṛì gí tàꞌi mì ndâ i-kó-ko a mbe ngbà tí mbe kùmùkù i mì ndâ ꞌduù.
2 Káa, mbe ṛì gí tàꞌi co tí njekèjì ndùgù a cèe mbe kpolo tí ndâ i-kó-ko.
3 Mbe kpolo tí njekèjì ndùgù mì ndâ i-kó-ko kû njaanga njekèjì ji yí. Ndâ i-kó-ko delè ꞌdi kòcò wó ni gî. Yí kû tèꞌé tí ndâ ꞌdóó i-kó-ko mì wó ꞌdo gbí òkò tí ndâ ŋìndi ndâ ꞌbí ꞌduù ta ṛè ndú, tacó bà gbà ndú gí sè.
4 Yí má njaanga ndâ i-kó-ko ꞌdo gbí ndùgù gî, yí kû tè kùṛo ndú, bìndi ndú kû ṛu ndi wó, tacó ndú ꞌdi kòcò wó ni gî.
5 Káa ndâ i-kó-ko bà ꞌvaaka ꞌdo tí vò ꞌduù ŋìnó náa ndú ŋò yí ni lá nó gî. Ndú jé gítí bà ṛu ndi wó wálá, tacó ndú ŋò yí ni lá, ndú delè ꞌdi kòcò wó ni ká lá.»
6 Jézù lòkòꞌbò có tí nò ji ndâ ꞌduù, káa, ꞌbí ꞌduù gbaànjé mbe ꞌdi gbí wálá.
7 Tacó énò, Jézù giì ꞌdè có ji ndú ngbáṛángàꞌi énó máa,
«Ye kû ꞌdè có ji yo ta yúcó máa,
ye a njekèjì ndùgù mì ndâ i-kó-ko.
8 Ndâ ꞌbí ꞌduù ŋìnó ꞌdáá gî táánò mbe gì gí mì yo kùṛo bà gì ye nó a ndâ mbe ngbà,
tí ndâ mbe kùmùkù i mì ndâ ꞌduù;
tacó énò, ndâ i-kó-ko sè tù tí ndú lá.
9 Káa, ye a njekèjì ndùgù.
I-kó-ko má ṛì gí tàꞌi có a i mì ye,
i-kó-ko tí nò ꞌvala gî.
Yí bà ṛì gí tàꞌi ta gbí dìì wó ngbáṛángàꞌi,
yí bà co gí sè ta dìì wó ngbáṛángàꞌi,
yí delè bà ꞌde i-zó-zò gî.
10 Mbe ngbà gì ŋìndi wó cuki ká gítí nèté bà ngbà i,
ta bà ziki ndâ i-kó-ko,
ta bà mèèkèꞌi tí ndú.
Káa ye gì a i tacó wàa ndú ꞌví ꞌde ta ꞌválá,
wàa ndú ꞌví ꞌvala pètèkèè go dó kpâ ta bèmbílì.
11 Ye a tó mbe kpolo tí ndâ i-kó-ko.
Tó mbe kpolo tí ndâ i-kó-ko a ŋa mbe kpolo tí ndâ i-kó-ko ŋìnó mbe kû cì á muu ndâ i-kó-ko mì wó nô.
12 ꞌDuù ŋìnó mbe kû kpolo tí ndâ i-kó-ko mì ꞌbí ka wó ká tacó bà pà yê tí wó cuki nó ká kû ì ngèlè jee ndâ i-kó-ko ji kàzà.
Yí má ŋò sílì tí kàzà ngé gî,
yí kû ì ngèlè si tàmuu ndâ i-kó-ko ji kàzà kû zèè ndú,
delè kû njè gbí ndú jááká-jaaka ta gbí jìlì.
13 Yí kû ì ngèlè jee ndâ i-kó-ko ji kàzà tacó yí kû gbà ndú ká tacó bà pà yê tí wó cuki,
nèté mì wó ta ndú wálá.
14 Káa ye a tó mbe kpolo tí ndâ i-kó-ko.
Ye ŋò ndâ i-kó-ko mì ye ni gî,
ndâ i-kó-ko mì ye delè ŋò ye ni gî.
15 Ze ŋò tí ze ni ta ndâ i-kó-ko mì ye,
ká go bà ŋò tí ze ni ta Bu ye.
Ye delè gbì gbí njembí ye gítí ku muu ndú gî.
16 Ndâ ꞌbí i-kó-ko mì ye kuu tí ,
náa ndú kpónó kû dù me ta ndâ ŋìnó ta ꞌbá muu ndú nó lá.
Káa kózò tí ye bà gì ta ndú gítí ndâ ꞌbí ka ndú,
ndú delè ꞌví ꞌdi kòcò ye,
wàa ndú ꞌví dù ꞌdáá bà gbèe to,
tacó wàa ye tí mbe kpolo tí ndú ꞌví dù káa gbèe ꞌduù.
17 Bu ye kû dù ta go ye tí wó,
tacó ye ùnje gítí bà cì ye,
wàa ye ꞌví ꞌvala ndi ye kákáꞌi nò gî.
18 À me ꞌduù ká kû zi ye lá.
À káa ye ká ùnje gítí bà cì ye ꞌdo gbí ꞌdóó có mì ye gbí muu ye.
Bu ye je wotí bà cì ye go có mì ye gbí muu ye nò ji ye gî.
Yí delè giì je wotí bà ꞌvala ndi ye á ꞌdo gbí ku ji ye gî.»
19 Có tí nò náa Jézù ꞌdè nò giì bàkà a ꞌbè mí gbí òkò tí ndâ Jùdéyà.
20 Ndâ ꞌduù me mbè gbí òkò tí ndú giì ꞌdè có ji ndâ ꞌbí ka ndú máa, «Gbí ndeṛè bà sè tù ndâ ꞌduù tí ndâ có mì wó wálá. A i ká gbí muu wó! Yì a mbe mâ!»
21 Káa, ndâ ꞌbí ꞌduù ŋìndi ndú giì ꞌvìsì có gí tàkò có mì ndâ ka ndú nò máa, «Ndâ có mì wó me go ndâ có mì ꞌduù ŋìnó ta i ká gbí muu wó nó lá. ꞌDuù ŋìnó ta i ká gbí muu wó nó bà njaanga ṛo mbe sú ṛo ta ŋa kpokèjì ngàyi?»
Ndâ kpo ꞌduù mì ndâ Jùdéyà bè Jézù gî
22 À ta o tí nò Jèrùzàlémè a o bà kùyà dèṛè mítí ꞌbá-Mbíṛì. O tí nò gì gbí pì mì côꞌo,
23 tacó énò, Jézù giì dù kû wùùkù to á tà ꞌbí i náa à bì yàꞌbàà énó mí gbí ndùgù ꞌbá-Mbíṛì, náa ndâ ꞌduù kû nì mítí a Tàzo-mì-Sólómònì tí gbolò gbà mì ndâ Jùdéyà.
24 Ndâ Jùdéyà mâ giì ŋò yí, ndú giì tì yí jèlè ꞌdee gî. Bìndi ndú giì ꞌvee yí máa, «Wò bà si ze kû koṛo có sàkàmàà énò yee tí ŋa o ngàyi? Wò má a Bìndi-Mbíṛì, ꞌdè ji ze ngbáṛángàꞌi!»
25 Káa Jézù giì ꞌvìsì có ji ndú máa,
«Ye ꞌdè có tí nò ji yo sàà gî,
káa a yo ká biya bà ꞌdi gî.
Ndâ seṛè tí nó náa ye kû bàkà ta wotí mì Bu ye nó kû tùbà ji yo máa,
ndâ có mì ye a ndâ yúcó;
26 káa, yo biya bà ùnje gítí ye gî,
tacó yo me ndâ i-kó-ko mì ye lá.
27 Ndâ i-kó-ko mì ye ꞌdi kòcò ye ni gî.
Tacó énò, ndú kû ṛu ndi ye.
Ze ŋò tí ze ta ndú ni gî.
28 Gbèe i-kó-ko mì ye bà giṛi wálá,
tacó ye je yeè-ꞌválá ŋìnó mbe cee lá nó ji ndú gî.
Mbe kaa ndú ꞌdo tí ye ta wotí wálá,
29 tacó ꞌbí ꞌduù ta wotí tí wó mbe ꞌvii ta Bu ye tí nó tí mbe kaa ndú ji ye nó wálá.
À má énò, ꞌbí ꞌduù mbe ṛa ndú tí ṛíngbá ꞌdo ꞌbì Bu ye wálá.
30 Ze ta Bu ye a ndâ gbèe ꞌduù.»
31 Ndâ Jùdéyà mâ giì ꞌdi có tí nò náa Jézù ꞌdè énó máa, «Ze ta Bu ye a ndâ gbèe ꞌduù» nò, ndú giì tuṛu díí tacó bà ꞌvaka ta yí.
32 Káa Jézù giì ꞌvee ndú máa, «Ye tùbà ndâ tó i mbe gì ꞌdo mì Bu ye ji yo me mbè. À má énò, yo kpónó kaa díí tacó bà ꞌvaka ta ye nò a i tacó ngàyi á ꞌdo gbí òkò tí ndú?»
33 Káa ndâ Jùdéyà giì ꞌvìsì có ji yí máa, «Ze kû tuṛu díí tacó bà ꞌvaka ta wò me tacó bà bàkà ndâ tó i mì lo a go có tí nò gbí nje lo nò lá. Ze bà ꞌvaka wò a i tacó bà ꞌdè zu có gítí Mbíṛì. Wò a ꞌduù, ta ndâ sìlì ꞌbì lo vô ká go ndâ ŋìndi ze, káa wò kû bàkà tí lo tí Mbíṛì ta wotí!»
34 Káa Jézù giì ꞌvìsì có ji ndú máa,
«ꞌBí có kuu gbí wáràgà mì Mbíṛì énó máa,
Mbíṛì máa, ‹Yo a ndâ mbíṛì.›
35 Káa ꞌvéṛè jé gbí wáràgà mì Mbíṛì wálá.
Nògí, Mbíṛì nì ‹mbíṛì› mítí ndâ ꞌduù tí nó náa yí tí Mbíṛì ꞌdè có mì wó ji ndú nó gî.
36 Káa, à má gítí bà miṛi ye,
a Bu ye ká cu ꞌbì wó mítí ye tí ꞌdóó ŋìnó mì wó,
bìndi yí giì tuu ye gí muu to tí nô.
À má énò, bà ꞌdè có mì ye énó máa,
ye a ꞌViì-mì-Mbíṛì,
giì ꞌvìsì tí gbí tù yo tí bà go Mbíṛì ta ŋa kpokèjì ngàyi?
37 Ye má kû bàkà me ndâ nèté mì Bu ye lá,
gbí ndeṛè bà ùnje mì yo gítí ye wálá.
38 Ye kû bàkà a ndâ nèté mì Bu ye,
káa go bà ùnje gítí ye kpêtí má sàà tí yo wálá,
yo kùtàá bà ù vòó nje gítí ndâ nèté tí nò náa ye kû bàkà ndú nò,
bìndi yo bà ŋò ni gî máa,
ze ta Bu ye a ndâ gbèe ꞌduù.»
39 À gbí muu ndâ Jùdéyà ta o tí nò a có bà zèè Jézù, káa yí giì fa ꞌdo tí ndú gî.
Ndâ mbe kaa ya gí mì Jézù á yì Jòròdánìyà ùnje gítí wó
40 Jézù giì dele ndi wó kákáꞌi ya gí tìto Jòròdánìyà, á gítí wúngbó to tí nó náa Jòvánì táánò sàà dù tí kû caka tí ndâ ꞌduù nô.
41 Ndâ ꞌduù me mbè giì kaa ya gí mì wó kà. Ndâ mbe kaa ya gí mì wó nò giì ùlù yí máa, «Jòvánì táánò jé bàkà ndâ seṛè lá, káa ndâ có mì wó táánò náa yí ꞌdè gítí ꞌdakò tí nó ꞌdáá káa yúcó.»
42 Tacó énò, ndâ ꞌduù ꞌdo gbí òkò tí ndú me mbè giì ùnje gítí Jézù ta njembí ndú gî.