15
Jézù a cèe bè nèbítì
1 «Ye a cèe bè nèbítì,
káa Bu ye a cèe mbe ṛò njí nèbítì.
2 Yí kû saaka ndâ nèꞌbì ye ŋìnó mbe ṛì lá nó ꞌdáá gî gí ꞌdè,
bìndi yí giì waaka gàna tí ndâ bèꞌi á ꞌdo tí ndâ ŋìnó mbe ṛi gî nó gî,
si ndú ngbáṛángàꞌi,
tacó wàa ndú ꞌví ṛì túkàꞌi.
3 Yo kpónó a ndâ ngbáṛángà ꞌduù;
ndâ có mì ye náa ye ꞌdè ji yo nó
bàkà yo tí ndâ ngbáṛángà ꞌduù sàà gî.
4 Yo zèè ye tí kpoò,
wàa ye delè ꞌví zèè ta yo tí kpoò.
Yo ŋò ni gî máa,
nèꞌbì mû ŋìnó mbe yaka ꞌdo tí kpo ṛèngbó mû gî nó
jé ṛì mí to kà ta kpéétí wó lá,
sè káa ŋìnó yí má ká kuu tí kpo ṛèngbó mû.
Yo delè ká énò,
yo má ta kpéétí yo,
gbí có mì yo bà dù wálá,
sè káa ŋìnó yo má zèè ye tí kpoò.
5 Ye a ꞌdóó kpo ṛèngbó bè nèbítì,
káa yo a ndâ nèꞌbì bè nèbítì tí nò.
À má énò, ꞌbí ꞌduù gbí òkò tí yo má zèè ye tí kpoò,
wàa ye ꞌví zèè yí tí kpoò,
a ꞌduù tí nò ká bà bàkà tó i túkàꞌi,
tacó yo má mò tí yo ꞌdo tí ye gî,
yo gí bà bàkà i gbaànjé wálá.
6 ꞌDuù ŋìnó mbe zèè ye tí kpoò lá nó,
go nèꞌbì mû ŋìnó náa à da ꞌdo tí kpo ṛèngbó mû gí ꞌdè gî nô.
Ndâ ŋa ndâ nèꞌbì mû tí nò
náa à kû saaka ndú ꞌdo tí kpo ṛèngbó mû gî nò má aanga gî,
à kû kili ndú, bìndi à giì doo ndú ta wu.
7 Yo má zèè ye tí kpoò,
wàa ndâ có mì ye ꞌví dù gbí njembí yo,
yo má yù i ŋìnó ta go tí yo nó ꞌdo mì Mbíṛì,
Mbíṛì bà je ji yo gî.
8 Ndâ ꞌduù kû ùlù ṛè Bu ye ta o tí nó náa yo má kû bàkà tó i,
tacó bà tùbà tí yo máa,
yo a ndâ mbe tala có mì ye nô.
9 Ye kû zè yo nìkì ká go bà zè ye nìkì mì Bu ye.
À má énò, yo ꞌví ne ꞌdo tí ye lá.
10 Yo má ꞌdi ndâ có mì ye gî,
ye bà zè yo nìkì maa,
á go ŋìnó náa ye kû ꞌdi có mì Bu ye,
káa yí kû zè ye nìkì maa nô.
11 Ye ꞌdè ndâ có tí nò ji yo,
tacó wàa ŋa líkíꞌo tí nó á tí ye nó ꞌví dù tí yo,
delè tacó wàa ŋa líkíꞌo tí nò ꞌví dù tí yo ta ŋa wálá.
12 Có mì ye ji yo énó máa,
yo ꞌví zè tí yo gbí òkò tí yo nìkì maa,
á go ŋìnó náa ye kû zè ta yo nìkì maa nô.
13 ꞌDuù má ùnje gítí bà cì á muu ndâ kómbe wó,
gbí énó máa,
yí zè ndâ kómbe wó tí nò nìkì ta ŋa wálá.
14 Yo má bàkà go ndâ có mì ye nò gî,
yo bà dù tí ndâ kómbe ye.
15 Ye kákáꞌi bà nì bòò mítí yo wálá,
tacó ꞌduù ꞌdè ndâ có kóó mì wó ji bòò mì wó lá.
Ṛè yo a ndâ kómbe ye,
tacó ye ꞌdè gbí ndâ có ŋìnó náa ye ꞌdi ꞌdo mì Bu ye nó ꞌdáá gî ji yo gî.
16 À me yo táánò ká gì gí mì ye ta muu yo lá.
A ye táánò ká ṛuka yo máa,
yo dù tí ndâ kómbe ye,
bìndi ye giì bàkà yo tí ndâ ꞌduù mbe bàkà ndâ i ŋìnó ta i ká gbí ndú,
tí ŋa ndâ i ŋìnó mbe dù tí ká nó,
tacó wàa, Bu ye ꞌví je ta ndâ i ŋìnó náa yo yù ꞌdo tí wó ta ṛè ye nó ꞌdáá gî ji yo.
17 Ye ꞌdè ndâ có tí nò ji yo tacó wàa,
yo ꞌví zè ta tí yo gbí òkò tí yo nìkì maa.
Ndâ ꞌduù bà sogo ndâ mbe tala có mì Jézù
18 «Ndâ ꞌduù má kû sogo yo,
yo ꞌví te mí gbí muu yo énó máa, a ngú i nò lá.
Ndú táánò sogo ye kùṛo bà sogo yo mì ndú gî.
19 Yo kùtàá má a ndâ ꞌduù mì ndâ ꞌduù muu to tí nó,
ndú kùtàá bà zè yo nìkì maa,
tacó yo a ndâ ꞌdóó ndâ ŋìnó mì ndú.
Káa yo me ndâ ꞌduù mì ndâ ꞌduù muu to tí nó lá,
tacó ye ṛuka yo tí ndâ ꞌduù mì ye gî.
Tacó énò, ndâ ꞌduù kû sogo yo.
20 Nògí, yo je mbí yo mítí ndâ có tí nó táánò náa ye ꞌdè ji yo énó máa,
bòò me gbolò ndii mbe tí wó lá nô.
Ndú táánò má mèèkèꞌi tí ye gî,
ndú delè bà mèèkèꞌi tí yo gî.
Ndú táánò má ꞌdi có mì ye gî,
ndú delè bà ꞌdi có mì yo gî.
21 Káa ndú bà mèèkèꞌi tí yo á muu ye,
tacó ndú ŋò mbe tuu ye ni lá.
22 Ye táánò má gì lá,
ye táánò delè má ꞌdè có ji ndú lá,
Mbíṛì bà tù ꞌbì wó gí tà ṛo ndú máa,
ndú a mbe bàkà vò i nò, wálá.
Káa kpokèjì bà kììꞌbà mì ndú kpónó nè gî,
tacó ye gì gî,
tacó ye delè ꞌdè có ji ndú gî.
23 ꞌDuù má kû sogo ye,
yí kû sogo nò a Bu ye.
24 Ye táánò má bàkà ŋa ndâ kpo-kpò seṛè tí nó
náa ꞌbí ꞌduù jé bàkà sàà kùṛo lá nó
mí gbí òkò tí ndú lá,
Mbíṛì bà ꞌdè có gítí ndú wálá.
Káa ndú ŋò ndâ i tí nó táánò náa ye bàkà nó gî,
káa ndú kpòò kû sogo ye,
ndú delè kû sogo Bu ye.
25 Si ndú ꞌví bàkà énò,
tacó wàa có tí nó náa à cu mí gbí wáràgà mì ndâ muu-cè máa,
‹Ndú táánò sogo ye ta ndeṛè tí wálá,› nó
ꞌví dù tí tí yúcó.
26 Ta o tí nó náa mbe kpo-gbí-tà-tù yo tí nó
náa ye bà tuu yí ꞌdo mì Bu ye,
tí Bèṛi mbe kû co tí kpokèjì mì yúcó,
náa ṛèngbó wó ꞌdo tí Bu ye nó, bà gì nó,
yí bà dù tí mbe ma có tí ye.
27 Yo delè bà dù tí ndâ mbe ma có tí ye,
tacó yo dù ta ye ꞌdo tí bà ꞌbìtà nèté mì ye yee tí kpónó.