6
Jézù je i-zó-zò ji ndâ ꞌduù álìfì vô
1 Ta ꞌbí o gbaànjé bìndi bà dele ndâ Jézù ta ndâ mbe tala có mì wó ꞌdo Jùdéyà gí Gàlìléyà, ndú giì di ngo gí tìto kàpá Gàlìléyà, náa à kû nì mítí a kàpá Tìbérìyà delè.
2 Ndâ ꞌduù me mbè bà-i-nò giì kaa ya gí tàkò ndú, tacó ndú ŋo ŋa ndâ seṛè bà ꞌvala ndâ mbe nòꞌo tí nó náa Jézù bàkà ta ndi to nó gî.
3 Jézù bà-i-nò giì kaa ndâ mbe tala có mì wó, bìndi ndú giì ya gí bà ki tí ndú to á pí gú.
4 Ndú ya ta nó tí nò si o bà bàkà tàkìì bà Ndii-ta-muu-ndâ-Ìzìrìyélì-mì-Mbíṛì dooko gî.
5 Jézù mâ giì ꞌva ṛo wó ꞌdo pí gú kà gí tàgbà gú, yí giì ŋò ndâ ꞌduù mósú-mosu-mòsù á kèjì gí tàkò ndú ta ndâ mbe tala có mì wó pí gú kà. Jézù bà-i-nò giì ꞌvee ꞌbí mbe tala có mì wó ta ṛè wó a Fìlípò máa, «Ndoo wúnó bà sì i-zó-zò ꞌdo kòtí ꞌdi tacó bà je ji ndâ ŋa ndâ ꞌduù tí zó kèjì zó?»
6 Jézù ꞌvee ꞌvé tí nò ká tacó bà ꞌdi có ꞌdo gbí yì Fìlípò, tacó yí tí Jézù ŋò i bà bàkà ji ndâ ꞌduù tí nò ni sàà gî.
7 Káa Fìlípò giì ꞌvìsì có ji Jézù máa, «Ndoo kpêtí má ꞌdè có máa, ndoo pà ji ndú káa làmbu i tacó bà njù ta ngo, gbí go énó máa, ndoo bà sì i-zó-zò ta i me gbolò, ndâ-ꞌbî-lá go njì fádà 200.»
8 ꞌBí mbe tala có mì Jézù ta ṛè wó a Àndèréyà, tí náꞌvindí Sìmónè Pìyétòrò, giì ꞌvìsì có ji Jézù gí tàkò có tí nò náa ndú kû ꞌdè ta Fìlípò nò, máa,
9 «Ye kùtàá ŋò ndâ ꞌbí cèe kù kô tí nó mì ndoo nó vô, ta ndâ njì sè sósòꞌô, á mì ꞌbí ꞌviì-ꞌdakò, káa, ye ŋò ni gî máa, à nò me i gítí ŋa mbè tí nò á kèjì nò lá.»
10 Ndâ ꞌduù tí nò mâ giì yee pí gú tàkò ndâ Jézù gî, Jézù giì ꞌdè có ji ndâ mbe tala có mì wó máa, «Yo si ndâ ꞌduù tí nò ꞌví ki tí ndú to.» Mbílì ta o tí nò màꞌbàà kuu ta to tí bàndò tí nò. Tacó énò, ndâ ꞌduù giì ki tí ndú to ta ndi gbí mbílì tí nò. Muu ndâ ꞌdakò ta o tí nò ꞌdáá gî álìfì vô.
11 Ndâ ꞌduù tí nò mâ giì ki tí ndú to gî, Jézù giì kaa ndâ kù kô tí nó vô náa Àndèréyà ꞌdè có gítí ndú ji yí mì ꞌbí ꞌviì nó, yí giì ꞌdè nìkì maa ji Mbíṛì, má kózò gî, yí giì kaa ji ndâ ꞌduù. Yí giì dele ndi wó giì kaa ndâ njì sè tí nó sósòꞌô mì gbèe ꞌviì tí nò nó, yí kákáꞌi giì ꞌdè nìkì maa ji Mbíṛì, bìndi yí giì kaa ndú gí tàkò ndâ kù kô tí nó vô nó ji ndâ ꞌduù.
12 Ndâ ꞌduù mâ giì zò i yè yì ndú ꞌdáá gî gî, Jézù giì ꞌdè có ji ndâ mbe tala có mì wó máa, «Yo kili ndâ sè i-zó-zò ŋìnó ta to bìndi ndú nó ꞌdáá gî. Yo si ꞌbí làmbu i ꞌví volo mí to lá.»
13 Ndâ mbe tala có mì Jézù bà-i-nò giì kili sè i-zó-zò bìndi ndâ ꞌduù tí nò yeke ndâ kèè muuꞌbì-nje só.
14 Ndâ ꞌduù mâ giì ŋò ŋa seṛè tí nó náa Jézù bàkà nó, ndú giì ꞌdè có máa, «Ŋìnó dú káa mbe ꞌdòkò có mì Mbíṛì tí nó náa Mòze táánò ꞌdè có ji ndâ ꞌduù gítí wó máa, yí bà gì gí muu to tí nó nó ká nô.»
15 Jézù mâ giì ꞌdi có tí nò, yí giì ŋò ni gî máa, a gbí muu ndâ ꞌduù tí nò a có bà zèè yì, wàa ndú ꞌví bàkà yì tí gba mì ndú ta wotí. Tacó énò, yí giì ndo ta kpéétí wó ꞌdo gbí òkò tí ndú ya gí gbí òkò ndâ gú.
Jézù nò nó có ṛo ngo
16 ꞌDêꞌo mâ giì bàkà tí gî, ndâ mbe tala có mì Jézù giì kaa ꞌdo pí gú ya gítí kàpá,
17 tacó bà di ngo ya gí gbí gbata Kàpàrànáwùmù, si Jézù ta kpéétí wó mí gbí òkò ndâ gú, si o kû me pìtì-pìtì énô.
18 Káa si ndú ta gbâ ṛo ngo, ngo giì ꞌbìtà bà gbàngà tí gbí pù ta pípìṛi ngé ndii gî.
19 Ndâ mbe tala có mì Jézù mâ giì ya ta gbâ ta kpéétí ndú kpòṛó gí gbí u ngo gî, ndú giì ŋò ꞌduù kû nò nó có ṛo ngo kèjì gí tàkò ndú. Káa ndú ŋò ni énó máa ꞌduù tí nò a Jézù nò lá. Yí mâ giì dooko ta ndú gî, gúku giì zèè ndú tí vò ŋa ŋìnô.
20 Káa Jézù giì ꞌdè có ji ndú máa, «Yo cì gúku lá; a ye!»
21 À giì dù gbí muu ndâ mbe tala có mì Jézù bìndi bà tùbà tí wó ji ndú nò a có bà te yí mí gbí gbâ, wàa ndâ yì ꞌví ya ta ndú gí tìto, káa ndú mâ giì kì ṛo ndú, ndú giì ꞌde tí ndú ta ndâ Jézù ngé tì ngo tí bàndò tí nó náa ndú kû koṛo có bà ya gítí nô.
Ndâ ꞌduù pà bà tí Jézù
22 Ndâ mbè ꞌduù tí nó mbe tè ṛì gbí kùdù kô nó mâ giì ya gí tàbèꞌdè kàpá ta dúꞌo ta yé bìndi bà je i-zó-zò ji ndú mì Jézù, ndú giì ꞌde gbèe gbâ ṛo ngo lá, káa ndú ŋò Jézù o gí gbí gbâ ta o bà di ngo mì ndâ mbe tala có mì wó lá.
23 Ndâ ꞌbí gbâ mbe gì ꞌdo gbí gbata Tìbérìyà mâ giì ṛò tíyò dê ꞌvii ta bàndò tí nò náa ndâ ꞌduù zò i tí nò,
24 ndâ mbè ꞌduù tí nò mbe kû pà bà tí Jézù nò giì oloko mí gbí ndú, tacó ndú ꞌde Jézù lá. Ndú delè ꞌde vòó ndâ mbe tala có mì wó lá. Ndú bà-i-nò giì di ngo gí gbí gbata Kàpàrànáwùmù, tacó bà pà bà tí Jézù.
25 Ndú mâ giì ꞌde yí gî, ndú giì ꞌvee yí máa, «Wò di ngo gí tìto kàá ta o ngàyi, mbe nìbà i?»
26 Káa Jézù giì ꞌvìsì có ji ndú máa,
«Ye kû ꞌdè có ji yo ta yúcó máa,
yo kû pà bà tí ye me tacó máa,
yo ŋò ndâ seṛè tí nó náa ye bàkà ndú nó gî, nò lá.
Yo kû pà bà tí ye,
tacó yo zò i yè yì yo gî.
Jézù a cèe i-zó-zò
27 Yo si bà yeeke tí yo ká tacó ŋa i-zó-zò ŋìnó mbe dù gbí yì yo tí ká lá nó cuki mí to.
Yo bàkà nèté a i tacó ŋa i-zó-zò ŋìnó mbe je ꞌválá ŋìnó mbe cee lá nó ji yo nô.
Ŋìnò a ŋa i-zó-zò náa ꞌViì-mì-ꞌDakò kû je ji yo,
tacó Bu ye tí Mbíṛì bàkà ꞌdóó ndi ꞌbì wó mítí ꞌViì-mì-ꞌDakò gî.»
28 Káa ndâ ꞌduù tí nò giì ꞌvee Jézù máa, «Ze ꞌví bàkà a ŋa yè, tacó wàa ze ꞌví bàkà ta ndâ i ŋìnó mbe nìkì tí Mbíṛì nó?»
29 Jézù bà-i-nò giì ꞌvìsì có ji ndú máa, «Nèté ŋìnó ta go tí Mbíṛì máa yo ꞌví bàkà nó a bà ùnje ta njembí yo gbaànjé gítí ꞌduù tí nó náa yí tí Mbíṛì tuu yí nô.»
30 Káa ndâ ꞌduù tí nò giì ꞌvee Jézù máa, «Ze ꞌví ŋò ni ta yè máa, a Mbíṛì ká tuu wò? Wò bà bàkà ji ze a ŋa yè, wàa ze ꞌví ŋò ta wò ni tí tú mì Mbíṛì?
31 Ze ꞌvee wò énò tacó Mòze dígísèé je mánà tí i-zó-zò ji ndâ ká gù ze si ndú gbí kángáá nga ngoò, go có tí nó náa à cu mí gbí wáràgà mì Mbíṛì énó máa, ‹Yí táánò je i-zó-zò ji ndú ꞌdo gbíṛì› nô.»
32 Káa Jézù giì ꞌvìsì có ji ndú máa,
«Ye kû ꞌdè có ji yo ta yúcó máa,
à dígísèé me Mòze ká je i-zó-zò ꞌdo gbíṛì ji ndâ ká gù yo lá.
À Bu ye táánò ká je i-zó-zò ji ndú á ꞌdo gbíṛì.
À kpónó delè káa Bu ye ká kû je i-zó-zò ji yo ꞌdo gbíṛì, tí cèe i-zó-zò,
33 tacó i-zó-zò mì Mbíṛì a ŋìnó mbe kû gì ꞌdo gbíṛì.
I-zó-zò mì Mbíṛì a ŋìnó mbe kû ꞌvala ndâ ꞌduù muu to tí nô.»
34 Ndâ ꞌduù tí nò bà-i-nò giì ꞌdeke tí ndú ji Jézù máa, «Je ŋa i-zó-zò tí nò ta o ꞌdáá gî ji ze.»
35 Káa Jézù giì ꞌvìsì có ji ndú máa,
«Ye a i-zó-zò ŋìnó mbe kû je ꞌválá ji ndâ ꞌduù nô.
ꞌDuù má gì gí mì ye gî,
go bà bàkà yí kákáꞌi wálá.
ꞌDuù má ùnje ta njembí wó gbaànjé gítí ye gî,
go ngo bà bàkà yí kákáꞌi wálá.
36 Ye ꞌdè có ji yo sàà gî máa,
yo ŋò ye gî,
káa ta ndâ ŋìnò ꞌdáá gî,
yo ùnje gítí ye lá.
37 Ndâ ꞌduù ŋìnò ꞌdáá náa Bu ye je ndú ji ye nó bà gì gí mì ye.
Káa ꞌduù má gì gí mì ye gî,
ye bà bè yí wálá.
38 Tacó ye gì ꞌdo gbíṛì me tacó bà bàkà go ꞌdóó có mì ye gbí muu ye lá.
Ye gì a i tacó bà bàkà go có mì mbe tuu ye.
39 Káa có mì mbe tuu ye énó máa,
ye ꞌví si ꞌbí ꞌduù gbaànjé ꞌdo gbí òkò tí ndâ ꞌduù tí nó náa yì kaa ndú ji ye nó ꞌví giṛi lá.
Có mì wó máa,
ye ꞌví ꞌvala ndi ndâ ꞌduù tí nó náa yì kaa ndú ji ye nó ꞌdo gbí muuꞌdú ndú ꞌdáá gî ta ndòngbú o.
40 Có mì Bu ye énó máa,
ꞌduù mbe ŋò ꞌViì mì yì ni gî,
bìndi yí giì ùnje ta njembí wó gbaànjé gítí wó gî nó,
bà ꞌde ꞌválá ŋìnó mbe cee lá nô;
à má énò, ye bà ꞌvala ndi ndú ꞌdo gbí muuꞌdú ndú ta ndòngbú o.»
41 Ndâ Jùdéyà mâ giì ꞌdi có tí nò náa Jézù ꞌdè nò, ndú giì ꞌbìtà bà fiini có gbí òkò tí ndú gítí Jézù, tacó có tí nó náa yí ꞌdè énó máa, yì a i-zó-zò mbe gí ꞌdo gbíṛì nô.
42 Máa, «À kû gbúú-gbuu nó a Jézù tí nó tí ꞌviì mì Jùzépè nó ká kuu kùṛo ndoo nô. Ndoo ŋò ndâ bu wó ta nawu wó ni ngbáṛángàꞌi gî. Káa yí giì dù ndíi ŋìnó kû ꞌdè có máa, yì gì ꞌdo gbíṛì nó, ta ŋa kpokèjì ngàyi?»
43 Káa Jézù giì ꞌvìsì có ji ndú máa,
«Yo si bà fiini có gbí òkò tí yo mí to.
44 Tacó ꞌbí ꞌduù gbaànjé bà gì gí mì ye ta muu wó wálá,
sè káa ŋìnó máa,
a Bu ye tí nó tí mbe tuu ye nó ká gbà tàmuu wó gì tí ji ye.
Káa ye bà ꞌvala yí ꞌdo gbí muuꞌdú wó ta ndòngbú o gî.
45 Tacó à cu mí gbí wáràgà mì ndâ mbe ꞌdòkò có mì Mbíṛì énó máa,
‹Mbíṛì bà nìbà i ji ndâ ꞌduù ꞌdáá gî.›
Káa bà gì gí mì ye a bà sè tù tí bà nìbà i mì Bu ye,
ta bà mèlè bà bàkà go có tí nò náa wò ꞌdi nò.
46 Gbí có tí nò me énó máa,
ndâ ꞌduù ꞌdáá gî ŋò Bu ye ta ṛo ndú gî nò lá.
À káa ꞌduù tí nó gbaànjé mbe gì ꞌdo mì Mbíṛì nó ká ŋò Bu ye ta ṛo wó.
47 Ye kû ꞌdè có ji yo ta yúcó máa,
ꞌduù ŋìnó mbe ùnje gítí ye gî nó bà ꞌvala ká dúú bà ya tí .
48 Ye a i-zó-zò mbe ꞌvala ndâ ꞌduù.
49 Ndâ ká gù yo dígísèé zò mánà gbí kángáá nga ngoò,
káa ndú giì mìì ꞌdáá gî.
50 Káa ye a i-zó-zò ŋìnó mbe gì ꞌdo gbíṛì,
tacó wàa, ꞌduù má zò ye gî,
yí ꞌví cì lá nô.
51 Ye a i-zó-zò ŋìnó mbe gì ꞌdo gbíṛì,
mbe kû ꞌvala ndâ ꞌduù nô.
ꞌDuù ŋìnó mbe zò i-zó-zò tí nò gî bà ꞌvala ká dúú bà ya tí .
Káa i-zó-zò tí nò náa ye bà je ji ndâ ꞌduù nò a dìì ye,
tacó bà ꞌvala ndâ ꞌduù á muu to tí nô.»
52 Ndâ Jùdéyà bà-i-nò giì ꞌbìtà bà ꞌviiki gbí có tí nò náa Jézù ꞌdè nò ta wotí tí ta kpéétí ndú máa, «ꞌDakò tí nò bà waa dìì wó ji ndoo wàa ndoo ꞌví zò ta ŋa kpokèjì ngàyi?»
53 Káa Jézù giì ꞌvìsì có ji ndú máa,
«Ye kû ꞌdè có ji yo ta yúcó máa,
yo má zò dìì ꞌViì-mì-ꞌDakò lá,
yo delè má njù mbelè wò lá,
yo bà ꞌde ꞌvala ŋìnó mbe cee lá nó wálá.
54 ꞌDuù mbe zò dìì ye gî,
bìndi yí giì njù mbelè ye gî,
bà ꞌvala ká dúú bá ya tí .
Ye delè bà ꞌvala yí ꞌdo gbí muuꞌdú wó ta ndòngbú o.
55 Tacó dìì ye a cèe i-zó-zò,
bìndi mbelè ye a cèe ngo.
56 ꞌDuù mbe zò dìì ye gî,
bìndi yí giì njù mbelè ye gî,
ꞌduù tí nò á ꞌdóó dìì ye,
ye delè a ꞌdóó dìì wó.
57 ꞌDuù tí nò bà ꞌde ꞌválá ꞌdo mì ye,
go ŋìnó náa ye kû ꞌde ta ꞌválá ꞌdo mì Bu ye tí ṛèngbó ꞌválá, tí mbe tuu ye nô.
58 Dìì ye a i-zó-zò mbe gì ꞌdo gbíṛì.
ꞌDuù mbe zò i-zó-zò tí nò bà ꞌvala ká dúú bà ya tí .
Dìì ye a tende ŋa i-zó-zò,
a me ŋa i-zó-zò tí nó náa ndâ ká gù yo zò dígísèé,
káa ndú giì mìì gî nó, lá.»
59 Jézù ꞌdè ndâ có mì wó nò ji ndâ ꞌduù á mí bàndò bà kili ndú gí bà ùlù Mbíṛì gbí gbata Kàpàrànáwùmù.
60 Jézù mâ giì nìbà i ji ndâ ꞌduù cee gî, ndâ ꞌduù me mbè ꞌdo gbí òkò tí ndâ mbe tala có mì wó giì ꞌdè có gbí òkò tí ndú máa, «Wotí tí bà nìbà i mì wó ngé ndii gî. A ꞌdi ká bà ꞌdi gbí ndâ ŋa ndâ kpo-kpò có mì wó nò?»
61 Jézù mâ giì ŋò ni gî máa, ndâ mbe tala có mì yì kû ꞌdè kòlòwò gítí ndâ có tí nó náa yí ꞌdè ji ndâ ꞌduù nó, yí giì ꞌvee ndú máa, «Tàkòcò yo kû kpóló-kpolo gítí ndâ có tí nò náa ye ꞌdè nò?
62 Káa yo kùtàá má ŋò énò a bà ya ꞌViì-mì-ꞌDakò á gí gbíṛì, yo bà me ta tí yo ée?
63 A Bèṛi-mì-Mbíṛì ká kû je ꞌválá ji ꞌduù.
ꞌDuù ꞌvala ꞌduù lá.
Ndâ có tí nò náa ye ꞌdè nò a Bèṛi-mì-Mbíṛì tí mbe je ꞌválá ji yo.
Ndâ có tí nò delè a ꞌválá.
64 Káa ndâ ꞌbí ꞌduù gbí òkò tí yo ùnje gítí ndâ có mì ye nò lá.»
Jézù ꞌdè có tí nò tacó yí ŋò ndâ mbe ùnje gítí có mì wó lá, ta dê ꞌduù mì wó nó kpokèjì gí bà dù tí mbe ba ngbù wó nó ni sàà gî.
65 Tacó énò, Jézù bà-i-nò giì ꞌdè có ji ndâ ꞌduù máa, «Ŋìnò a ndeṛè có tí nò náa ye kùtàá ꞌdè ta có ji yo máa, ꞌduù bà ꞌde wotí gítí bà gì gí mì ye ta kpéétí wó wálá, sè káa ŋìnó a Bu ye ká ùnje ji yí nò ká nò.»
66 Ndâ mbe tala có mì Jézù me mbè giì jee bà ṛu ndi wó mí to á bìndi có tí nò náa yí ꞌdè nò gî.
67 Jézù mâ giì ŋò bà biya bà ṛu ndi wó mì ndâ ꞌbí mbe tala có mì wó, yí bà-i-nò giì ꞌvee ndâ ŋìnó muuꞌbì-nje só náa yí ṛuka ndú nó, máa, «Káa yo ŋìndi yo, go bà ya ta ndâ ka yo tí yo wálá?»
68 Káa Sìmónè Pìyétòrò giì ꞌvìsì có ji yí máa, «Ze ꞌví ya gí mì ꞌdi, Mbe tí ze? A wò ká kû ꞌdè ndâ có ŋìnó mbe kû ꞌvala ndâ ꞌduù nô.
69 Ze ùnje gî, ze delè giì ŋò ni ngbáṛángàꞌi gî, máa, wò a ꞌduù ŋìnó náa Mbíṛì kaa wò mò gí mì wó gî.»
70 Káa Jézù giì ꞌvìsì có ji ndâ Sìmónè Pìyétòrò máa, «À wálá a ye táánò ká cu ꞌbì ye mítí yo ta bà muu yo muuꞌbì-nje só nó? Káa ꞌbí ꞌduù gbaànjé á ꞌdo gbí òkò tí yo jìꞌvì kàzà mítí ye gî.»
71 Jézù ta o tí nò kû gbì tì kpô a i gítí Júdà, tí ꞌviì mì Sìmónè Ìsìkàrìyótè, tí ꞌbí ꞌduù gbaànjé ꞌdo gbí òkò tí ndâ mbe tala có mì wó muuꞌbì-nje só náa yí ṛuka ndú nô. Tacó a Júdà ká bà giì ba ngbù wó tí Jézù.