19
पावल एफिससय् थ्यंकः वःगु
1 अपोल्लोस कोरिन्थय् हे दनिबलय् पावल थाय् थासय् जुयाः एफिससय् थ्यंकः वल। अन वं चेलातय्त नापलात।
2 वं इमित न्यन – “विश्वासी जुयाः छिमिसं पवित्र आत्मा काये धुन ला?”
इमिसं धाल – “मधुंनि। जिमिसं ला पवित्र आत्मा दी धकाः आः तकं न्यनागु मदुनि।”
3 अले वं धाल – “अय्सा छिमिसं सुयापाखें बप्तिस्मा कयाः लय्?”
इमिसं धाल – “यूहन्नायापाखें कयागु।”
4 थ्व न्यनाः वं धाल – “यूहन्नां ब्यूगु बप्तिस्मा पश्चातापयागु बप्तिस्मा खः। वं थः लिपा वयाच्वंम्ह येशूयात विश्वास याः धकाः मनूतय्त कनीगु खः।”
5 अले थ्व खँ न्यनाः इमिसं प्रभु येशूया नामं बप्तिस्मा काल।
6 वं इमिगु छेनय् ल्हाः तयेवं इपिं पवित्र आत्मां जाल। अले इमिसं थीथी भाषां नवात वनापं अगमवाणी नं धाल।
7 इपिं झिंनिम्ह ति दु।
8 अले पावलं स्वला तक धर्मशास्त्र स्यनीगु छेँय् वनाः इपिं दक्वसिया न्ह्यःने मनूतय्त मग्यासे परमेश्वरया राज्ययागु खँ कनाः विश्वास याकेगु कुतः यात।
9 गुम्हं गुम्हय्सिनं ला विश्वास मयासें अःखतं दक्वसिया न्ह्यःने प्रभुयागु लँयात बांमलाकल। अय्जूगुलिं पावलं इमित त्वःता वल। अले चेलातय्त जक थःलिसें ब्वना यंकाः टुरान्नसयागु इस्कुलय् वनाः स्यनेकने याना जुल।
10 पावलं निदँ तक थथे यानाच्वन। अय्जूगुलिं एशियाय् च्वंपिं यहूदीत व यहूदीमखुपिं फुक्कसिनं प्रभुयागु खँ न्यने खन।
11 परमेश्वरं नं पावलयात अजू चायापुगु ततःधंगु ज्या याकादिल।
12 थुलि तक नं जुल, पावलयागु म्हय् रुमाल व कापः जक थीकाः उसाँय्मदुपिन्थाय् यंकल कि लना वनीगु। अथे हे भूतआत्मां नं त्वःता वनीगु।
13 थ्व खनाः चाचाःहिलाः झाँक्री ज्या यानाजुइपिं यहूदीतय्सं नं येशूयागु नामं थथे धयाः भूतआत्मा पितिनाछ्वयेत सना जुल – “पावलं न्यंका जूम्ह येशूया नामं जिं छन्त पिहां वनेत उजं बियाच्वना।”
14 थथे याना जूपिं यहूदीतय् नायःतय् दकलय् तःधंम्ह पुजाहारी स्केवासया न्हय्म्ह काय्पिं खः।
15 अले भूतआत्मां इमित थथे लिसः बिल – “येशूयात जिं म्हस्यू, अले पावलयात नं जिं म्हस्यू। छिपिं धाःसा सु खः लय्?”
16 थथे धयाः भूत दुब्यूम्ह मनुखं इमित छक्कलं हय्क्का वन, अले फुक्कसितं कसाः यात। अले इपिं म्हय् घाःया घाः जुइकाः पचिनांगां अनं बिस्युं वन।
17 थ्व खँ एफिससय् च्वंपिं यहूदीत व यहूदीमखुपिं फुक्कसिनं सिल। इपिं तसकं ग्यात। अले इमिसं प्रभु येशूयागु नां तःधंकल।
18 यक्व हे विश्वासीतय्सं ग्यानाः दक्वसिया न्ह्यःने वयाः थःपिन्सं झाँक्री ज्या यानाच्वंगु खँ न्यंकल।
19 अले इमिसं थथःगु छेँनं झाँक्री ज्यायागु सफू हयाः दक्वसिया न्ह्यःने छ्वय्काबिल। छ्वय्कूगु सफूयागु मू ५०,००० वहःयागु ध्यबा तू।
20 थुकथं प्रभुयागु वचन धिसिलाक्क न्यनावन।
21 अनं लिपा पावलं माकेडोनिया व अखैया जुयाः यरूशलेमय् वनेगु क्वःछिनाः – “यरूशलेमय् वने धुंकाः जि रोमय् नं छकः वने” धकाः धाल।
22 वं थःनाप ज्या याइपिं निम्ह मनूत तिमोथी व इरास्तसयात माकेडोनियाय् छ्वयाबिल। अले थः जक छुं ई एशियाय् हे च्वन।
एफिससय् खलबल जूगु
23 अबलय् हे अन प्रभुयागु खँयात कयाः तसकं हे खलबल जुल।
24 अन छम्ह डेमेत्रियस धाःम्ह वहः कःमिं आर्तेमिस द्यःमय्जुयागु वहःयागु खःचात दय्काः धिबा कमय् यानाच्वन। वं यक्व वहःकःमितय्त ज्या याकातःगु दु।
25 वं थज्याःगु ज्या याइपिं वहःकःमितय्त मुंकाः धाल –
“दाजुकिजापिं, झीसं थ्व ज्या यानाः धिबा कमय् यानाच्वनागु छिकपिन्सं सि हे स्यू।
26 एफिससय् जक मखु, सारा एशियाय् हे थ्व पावलं मनूतय्त ल्हातं दय्कूम्ह द्यः ला द्यः हे मखु धकाः स्यनाः विश्वास याकाः ल्हातय् कया जूगु ला छिकपिन्सं सि हे स्यू, अले न्यंगु नं द हे दु।
27 थथे हे जुया च्वंसा ला झीगु मूर्ति दय्केगु ज्या जक छखे लाइगु मखु, अपाय्धंम्ह आर्तेमिसयागु देगःनापं ज्यालगय् जुइ मखुत। अले हानं सारा एशियायापिं व सारा संसारयापिन्सं पुजा यानातःम्ह अपाय्धंम्ह द्यःमय्जुयात पुजा यायेगु नं त्वःता हइ।”
28 थ्व खँ न्यनाः इमिसं तसकं तं पिकयाः धाल – “एफिससयाम्ह आर्तेमिस दकलय् तःधंम्ह द्यः खः।”
29 थुकथं सारा शहरय् खलबल जुल। अले इमिसं मिलय् जुयाः पावल नाप जुइपिं माकेडोनियायापिं गायस व अरिस्तार्खसयात ज्वनाः रंगशालाय् साला यंकल।
30 पावलं नं अन वनेगु स्वत, अय्नं विश्वासीतय्सं वयात मछ्वसे पना तल।
31 पावलया अन च्वंपिं ततःधंपिं पासापिन्सं वयात अन वये मते धकाः बिन्ति याना हल।
32 अन खलबल जुयाच्वंगुलिं छम्हय्सिनं छगू धाःसा मेम्हय्सिनं मेगु हे धयाः हाला हइगु। अय्जूगुलिं गुलिसिनं ला इपिं अन छाये मुंवःगु धयागु हे मस्यू।
33 यहूदीतय्सं अलेक्जेन्डरयात हुलय् न्ह्यःने घ्वाना छ्वल। अले वं ल्हाःभाय् यानाः छुं नवायेत सन।
34 वयात यहूदी धकाः म्हसीवं इपिं निघौ तक थथे हालाच्वन – “एफिससयाम्ह आर्तेमिस हे दकलय् तःधंम्ह द्यः खः।”
35 अले शहरयाम्ह हाकिमं इमित सुम्क च्वं धकाः ल्हाःभाय् यानाः थथे धाल – “अय् एफिससयापिं दाजुकिजापिं, एफिसीतय्गु शहर थपाय्धंम्ह आर्तेमिस द्यःमय्जुया देगः व आकाशं कुतुं वःगु वयागु मूर्तिया रक्षक खः धकाः सुनां मस्यू?
36 अय्जूगुलिं छिकपिं सुम्क च्वनादिसँ, थथे बिचाः हे मयासें हाःहू यानाजुइगु बांमलाः,
37 छाय्धाःसा छिकपिन्सं ज्वना हयातःपिं मनूतय्सं न झीगु देगलय् च्वंगु मूर्ति हे खुगू दु, न झीम्ह द्यःमय्जुयात म्हुतु ल्हाना जूगु हे दु।
38 “डेमेत्रियस व वया ज्याकःमि पासापिं सुनानं सुयातं छुं यायेमाःगु दु धयागु खःसा अदालतय् वनाः नालिस तःसां ज्यूनि। हाकिमत नं द हे दु।
39 मखु थ्व स्वयाः तःधंगु हे खँ दु धयागु जूसा न्हिं न्हिं च्वनीगु सभां हे क्वःछी।
40 थौं थथे जूगुलिं दोष जिमित लाइ धकाः ग्याये धुन। म्वाःसां म्वाःसां थथे यानाः झीसं छु धकाः लिसः बीगु?”
41 थुलि धयाः वं सकल मनूतय्त लित छ्वयाबिल।