25
पावलं कैसरयात बिन्ति याःगु
1 फेस्तस कैसरियाय् वयाः स्वन्हु दय्काः यरूशलेमय् वन।
2 अन तःधंपिं पुजाहारीत व तःधंपिं यहूदीतय् नायःतय्सं फेस्तसयात पावलयागु विरोधय् खँ न्यंकाः बिन्ति यात।
3 पावलयात लँय् दथुइ हे स्यायेगु मतिइ तयाः इमिसं वयात यरूशलेमय् छ्वयाहयादिसँ धकाः फेस्तसयात बिन्ति यात।
4 तर फेस्तसं इमित थथे धकाः लिसः बिल – “पावलयात कैसरियाय् हे कुनातःगु दु। जि नं याकनं हे अन वनेत्यनागु दु।
5 छिमि छम्हनिम्ह नायःतय्त छ्वयाहिँ। अले वया न्ह्यःने हे वं द्वंकूगु दु धकाः उजुर या।”
6 इपिं नाप च्यान्हु झिन्हु च्वनाः फेस्तस कैसरियाय् लिहां वल। कन्हय् खुन्हु हे वं न्याय यायेथाय् वनाः पावलयात काय्के छ्वल।
7 पावलयात अन हयेवं यरूशलेमं वःपिं यहूदीतय् नायःतय्सं वयात यक्व हे दोष बिल। अथेसां इमिसं छुकियागुं दसि बी मफुत।
8 अले पावलं धाल – “जिं यहूदीतय्गु व्यवस्था, देगः, व कैसरयात मभिंकाः छुं नं धयागु मदु।”
9 फेस्तसं यहूदीतय्त लय्ताय्केत पावलयात थथे धाल – “जिं छन्त यरूशलेमय् छ्वयाबी, अले अन हे छंगु न्याय याये, मज्यू ला?”
10 अले पावलं धाल – “जिं कैसरयागु अदालतय् न्याय फ्वनाच्वनागु दु। थन हे जिगु न्याय जुइमाः। जिं यहूदीतय् नायःतय्गु छुं स्यंकागु मदु धकाः ला छसपोलं नं बांलाक सि हे स्यू।
11 जिं ज्यान सजाँय बीमाय्क छुं मभिंगु यानागु दुसा जि सीत नं न्ह्यचिलागु दु। इमिसं जितः पाः याःगु छुं नं सत्य मखुसेंलि जितः सुनानं इमिगु ल्हातय् लाके फइ मखु। जिं कैसरयात बिन्ति याये।”
12 अले फेस्तसं सल्लाह बीपिं लिसे खँ ल्हानाः थथे धाल – “छं कैसरयात बिन्ति यात। अय्जूगुलिं छन्त कैसरयाथाय् हे छ्वये।”
जुजु अग्रिपासं न्हूम्ह बडा-हाकिम नापलाःगु
13 निन्हु स्वन्हु लिपा जुजु अग्रिपास व बरनिकी कैसरियाय् फेस्तसयात नापलाः वल।
14 इपिं अन छुं न्हि तक च्वने धुंकाः फेस्तसं जुजुयात पावलयागु फुक्क खँ कन – “थन फेलिक्सं कुनातःम्ह छम्ह मनू दु।
15 जि यरूशलेमय् वनाबलय् तःधंपिं पुजाहारीतय्सं व थकालिपिन्सं वयात दोष बियाः सजाँय बीमाः धकाः जितः बिन्ति यात।
16 जिं इमित थथे धकाः लिसः बिया – ‘सुनानं मनूयात वयागु दोष ठहरय् मजुइकं सजाँय बीगु रोमीतय्गु चलन मदु। अले वं पाः याःपिनिगु न्ह्यःने थःगु खँ नं धाये दयेमाः।’
17 “इपिं वयेवं भचा हे लिमबाकुसे कन्हय् खुन्हु हे जिं वयात अदालतय् काय्के छ्वया।
18 वयात पाः याःपिन्सं गुलि नं वयात दोष ठहरय् याइ धकाः जिं मतिइ तयागु खः, अथे याये मफुत।
19 इमिसं ला इमिगु धर्मयागु खँ व सी धुंकूम्ह येशूयागु खँ कयाः जकं पाः याना हल। पावल धाःसा सी धुंकूम्ह येशू अज्जं म्वानाच्वंगु दनि धकाः धाइम्ह जुयाच्वन।
20 जिं छुं हे क्वःछी मफुगुलिं वयात थ्व खँय् जवाःसवाः यायेत यरूशलेमय् वनेगु ला धकाः न्यना।
21 पावलं कैसरपाखें न्याय याकेगु धकाः बिन्ति याःगुलिं जिं वयात कैसरयाथाय् मयंकुतले बांलाक पाः तयाः थन हे तया तयेगु उजं बिया।”
22 अले अग्रिपासं फेस्तसयात धाल – “व मनूयागु खँ जिं नं छकः न्यने दुसा ज्यू।”
फेस्तसं धाल – “कन्हय् हे न्यनादिसँ।”
पावल अग्रिपास व बरनिकीया न्ह्यःने
23 कन्हय् खुन्हु अग्रिपास व बरनिकी तसकं झःझः धाय्क तःधंपिं कप्तानत व शहरय् च्वंपिं ततःधंपिं मनूतय्त ब्वनाः सभा यायेगु छेँय् वन। अले फेस्तसयागु उजंकथं पावलयात नं दुने हल।
24 अले फेस्तसं धाल – “जुजु अग्रिपास व थन झायादीपिं सकल भाजु मय्जुपिं, थनच्वंपिं व यरूशलेमय् च्वंपिं फुक्क यहूदीतय्सं थ्व मनूयात स्याना छ्वयेमाः धकाः जिथाय् उजुर याः वःगु खः।
25 ज्यान सजाँय बीमाय्क वं अथे द्वंकूगु जिं छुं हे लुइके मफुत। वं कैसरयात बिन्ति याःगुलिं जिं वयात अन हे छ्वयेगु मतिइ तयागु दु।
26 “वयागु द्वंबिद्वं कैसरयात च्वया छ्वयेत जिके छुं हे खँ मन्त। अय्जूगुलिं जिं वयात छिकपिनिगु, अज्ज ला हे जुजु अग्रिपास, छिगु न्ह्यःने थने हयागु दु। छिकपिन्सं माःकथं जाँचय् यानाः जितः च्वयेत सल्लाह बियादिसँ,
27 छाय्धाःसा छुं हे दोष मक्यंकं वयात अथे छ्वयेत जितः मछिं ताल।”