9
शाऊल विश्वासी जूगु
1 शाऊलं धाःसा प्रभुया चेलातय्त स्यायेगु व ख्याच्वः बीगु याना जुल तिनि। छन्हु थ्व शाऊलं दकलय् तःधंम्ह पुजाहारीयाथाय् वनाः
2 दमस्कसय् च्वंगु धर्मशास्त्र स्यनिगु छेँयाम्ह कजियात येशूं धाःथें जुइपिं मिसात व मिजंतय्त ज्वनाः यरूशलेमय् हये दयेमा धकाः भ्वं च्वया बीत धाल।
3 छन्हु थ्व हे शाऊल दमस्कसपाखे स्वया वनाच्वंबलय् अन थ्यनिथें च्वंकाः आकाशं तसकं थीगु जः वयागु छचाःखेलं थिल।
4 थथे जूगुलिं व बँय् भ्वसू वन। अले वयात थथे धया हःगु सः ताये दत -- “शाऊल, शाऊल, जितः छं छाय् दुःख बियाच्वनागु?”
5 अले शाऊलं धाल -- “हे प्रभु, छि सु खः?”
अले वय्कलं धयादिल -- “जि येशू खः, गुम्हय्सित छं दुःख बियाच्वन।
6 आः दनाः शहरय् हुँ, अन हे छन्त याये माःगु ज्या कनी।”
7 अबलय् व नाप दुपिं मनूत वातां दनाच्वन। इमिसं सः ताः, खँ धाःसा सुयातं मखं।
8 अले शाऊलं दनाः मिखा चाय्कूबलय् मिखां छुं हे मखन। अथेजूगुलिं मनूतय्सं वयात ल्हाः ज्वनाः दमस्कसय् हया बिल।
9 थथे व स्वन्हु तक मिखा कां जुइकाच्वन। थुबलय् वं नयेनीगु मयाः, लः तक नं मत्वं।
10 दमस्कसय् हननिया धाःम्ह छम्ह चेला च्वनाच्वंगु दु। थ्व हे चेलायात प्रभुं दर्शन बियाः -- “हननिया” धकाः सःतादिल।
अले वं लिसः बिल -- “प्रभु, जि थनसं दु।”
11 प्रभुं वयात धयादिल -- “याकनं तप्यं धाःगु गल्लि वनाः यहूदायागु छेँय् टार्ससयाम्ह शाऊल धाःम्ह मनूयात माः हुँ। वं प्रार्थना यानाच्वंगु दु।
12 हननिया धाःम्ह छम्ह मनुखं दुने वयाः मिखां खनेमा धकाः थःगु छेनय् ल्हाः तयाच्वंगु वं दर्शन खने धुंकल।”
13 अले हननियां लिसः बिल -- “प्रभु, थ्व मनूयागु खँ यक्व मनूतय्गु म्हुतुं न्यना तयागु दु। यरूशलेमय् च्वंपिं छिकपिनि चेलातय्त थ्वं यक्व हे सास्ति याना वःगु दु।
14 थन नं तःधंपिं पुजाहारीतय्के छिकपिनि चेलातय्त ज्वनाः यंकेगु अधिकार कया वःगु दु हं।”
15 तर प्रभुं वयात धयादिल -- “छ हुँ छाय्धाःसा यहूदीमखुपिन्त, जुजुपिन्त व इस्राएलीतय्त नं जिगु नां न्यंके छ्वयेत जिं थ्व मनूयात ल्ययागु दु।
16 अले हानं जिं वयात जिगु नांया निंतिं गुलि तक वं दुःखकष्ट सी माली तिनि धकाः क्यनेतिनि।”
17 अले हननियां शाऊल च्वनाच्वंगु छेँय् वनाः वयागु छेनय् ल्हाः तयाः थथे धाल -- “किजा शाऊल, लँय् वया च्वंबलय् छिं खंम्ह प्रभु येशूं हे छिं हानं मिखां खनेमा, अले पवित्र आत्मां जायेमा धकाः जितः थन छ्वया हयादिल।”
18 उलि धायेवं हे वयागु मिखां बिखू थेंज्याःगु छुं कुतुं वन, अले वं मिखां खन। अले वं दना वनाः बप्तिस्मा काल।
19 अनं लिपा नये धुंकाः वयागु म्हय् बल वल।
शाऊलं दमस्कसय् भिंगु खँ न्यंकूगु
छुं दिन तक शाऊल दमस्कसय् च्वंपिं चेलात नाप हे च्वन।
20 याकनं हे वं धर्मशास्त्र स्यनिगु छेँय् वनाः -- “येशू परमेश्वरया काय् खः” धकाः न्यंका जुल।
21 वयागु खँ न्यनाः मनूतय्सं अजूचायाः थथे धाल -- “यरूशलेमय् येशूयागु नां काःपिं मनूतय्त स्याना जूम्ह मनू थ्व हे मखु ला? अले थन नं छु व इमित तःधंपिं पुजाहारीतय्थाय् ज्वना यंकेत वःम्ह मखु ला?।”
22 तर शाऊल नवायेगुली तसकं बल्लाना वल। दमस्कसय् च्वंपिं यहूदीतय्त येशू हे मुक्ति बीम्ह ख्रीष्ट खः धयागु दसु बियाः इमित व धाये थ्व धाये मफय्का तल।
23 तःन्हु दये धुंकाः यहूदीतय् नायःतय्सं शाऊलयात स्यायेगु ग्वसाः ग्वल।
24 थ्व खँ शाऊलं सिल। यहूदीत वयात स्यायेत चा न्हिं दमस्कसया ध्वाखा पतिं पिवाः च्वना जुल।
25 शाऊलया चेलातय्सं वयात छन्हु चान्हय् खमुली तयाः शहरया पःखालं क्वछ्वयाः बिसिके छ्वल।
शाऊल यरूशलेमय् लिहां वःगु
26 अनं लिपा शाऊल यरूशलेमय् वयाः चेलात नाप मिलय् जुइत स्वल, तर व खनाः इपिं ग्यात, छाय्धाःसा इमिसं व नं छम्ह चेला खः धकाः पत्याः याये मफुत।
27 अले बारनाबासं वयात प्रेरिततय्थाय् ब्वना हयाः गथे लँय् वनाच्वंबलय् प्रभुं दर्शन बियाः शाऊल नाप नवानादिल, अले दमस्कसय् छफुति हे मग्यासे वं येशूयागु खँ न्यंकल धकाः कन।
28 अले तिनि शाऊल यरूशलेमय् च्वंपिं चेलात नाप च्वने फत। अन नं वं मग्यासे प्रभुयागु खँ न्यंका जुल।
29 अले ग्रीक भाय् ल्हाइपिं यहूदीत नाप नं जवाःसवाः याः जुल। अय्जूगुलिं इमिसं वयात स्यायेत स्वल।
30 थ्व खँ विश्वासीतय्सं सियाः शाऊलयात कैसरियाय् ब्वना हयाः अनं टार्ससय् छ्वया बिल।
31 थथे यहूदिया, गालील व सामरियाय् च्वंगु मण्डलीइ सुख शान्ति जुल। प्रभुयात हनेगु व वय्कःयागु खँ न्यनिगुलिं यानाः पवित्र आत्मायागु ग्वाहालि दयाः मण्डली च्वन्ह्याना वल, अले विश्वासीत नं यक्व दयावल।
पत्रुस लुड्डा व योप्पाय् वंगु
32 पत्रुस उखें थुखें न्यंका जुजुं लुड्डाय् च्वंपिं चेलातय्थाय् नं थ्यन।
33 वं अन एनियास धाःम्ह छम्ह मनूयात नाप लात। पक्षवातं यानाः व मनू लासां दना वये मफुगु च्यादँ दये धुंकल।
34 पत्रुसं वयात धाल -- “एनियास, येशू ख्रीष्टं छिगु ल्वय् लाय्कादी। दनादिसँ, छिगु लासा थनादिसँ।” थुलि धायेवं व मनू जुरुक्क दन।
35 लुडडाय् व शारोनय् च्वंपिं मनूतय्सं थ्व खनाः प्रभुयात विश्वास यात।
36 अबलय् योप्पा धाःगु थासय् तबीता धाःम्ह छम्ह मिसाम्ह चेला च्वनाच्वंगु दु। ग्रीक भासं वयागु नां डोरकास जुइ। व छम्ह भिंगु भिंगु जक ज्या याना व मेपिन्त ग्वाहालि याना जुइम्ह मिसा खः।
37 छन्हु थ्व मिसा उसाँय् मदयाः सित। सीम्हयात म्वःल्हुकाः चेलातय्सं तले च्वंगु क्वथाय् तया तल।
38 लुड्डा योप्पां तामपाःगुलिं चेलातय्सं पत्रुस अन दनि धकाः सीकाः निम्ह मनूयात सःतके छ्वल। इमिसं वनाः धाल -- “लिबाकादी मते, याकनं झासँ।”
39 पत्रुस इपिं नाप वन। अन थ्यनेवं इमिसं वयात तले क्वथाय् ब्वना यंकल। भाःत मदुपिं मिसातय्सं ख्वख्वं तबीता मसीनिबलय् वं इमिगु लागि दय्कातःगु वसः क्यन।
40 अले वं इपिं फुक्कसितं पिने छ्वयाः पुलिं चुयाः प्रार्थना यात। प्रार्थना याये धुंकाः सीम्हय्सिथाय् स्वयाः धाल “तबीता, दना वा।” अले वं मिखा चाय्कल, पत्रुसयात खनाः व फ्यतुत।
41 पत्रुसं वयात ल्हाः ज्वनाः थन। अले फुक्क चेलात व भाःत मदुपिं मिसातय्त सःताः तबीतायात इमित लः ल्हाना बिल।
42 थ्व खँ योप्पाय् फुक्कभनं बय्बय् जूगुलिं यक्वसिनं प्रभुयात विश्वास यात।
43 पत्रुस तःन्हु तक अन हे सिमोन धाःम्ह छेंगूया ज्या याइम्हय्सिगु छेँय् च्वन।