4
इस्राएलया मनूत परमेश्वरपाखे लिहां मवःगु
1 अय् सामरिया डाँडाय् च्वनीपिं बाशानया ल्ह्वंपिं सात,
छिपिं मिसात, गुपिन्सं चीमिपिन्त क्वत्यलाच्वन अले मगाःमचाःपिन्त दुःख बियाच्वन।
अले थः भाःतयात धयाच्वन, “जिमित त्वनेत छुं हयाबियादिसँ।”
2 परमप्रभु परमेश्वरं थःगु पवित्रतां थ्व पाफयादीगु दु,
“स्व, व दिं धात्थें वइ
गबले इमिसं छिमित न्यायात बल्छीं सालाकाः थें
अंकुसें सालायंकी।
3 छिपिं दक्वसित पःखाःया ह्वतं यनी,
अले छिमित हर्मोनपाखे वांछ्वइ,”
परमप्रभुं धयादी।
इस्राएलीतय्सं सय्के फइ मखु
4 “बेथेलय् वनाः पाप या।
गिलगालय् वनाः झन अप्वः पाप या।
सुथ पतिकं छिमिगु भेटी हति,
अले स्वन्हु स्वन्हु दुखुन्हु थथःगु झिब्वय् छब्व हति।
5 सोडा तःगु मरिं सुभाय्या बलि छा,
थःयसें बलिया निंतिं धक्कु त्वःताः न्यासि हुँ,
उकिया निंतिं घमण्ड या,
छाय्धाःसा अथे यायेगु छिमित यः,”
परमप्रभु परमेश्वरं धयादी।
6 “जिं दक्व शहरय् छिमित द्यांलाका बिया,
अले छिपिं च्वनीगु फुक्क थासय् मरि कम यानाबिया,
अथे जूसां छिपिं जिथाय् फहिला मवः,”
परमप्रभुं धयादी।
7 “अन्न मुनीगु स्वला न्ह्यः हे जिं छिमिथाय्
वा वयेगु दीकाबिया।
जिं छगू शहरय् वा वय्काबिया,
मेगु शहरय् वा मवय्का।
छगू बुँइ वा वल
अले मेगु बुँ वा मवयाः गना वन।
8 मनूत शहर शहर जुयाः लःया निंतिं धेधे चुइक जुयाजुल,
तर त्वनेत माक्व मदु,
अथे जूसां छिपिं जिथाय् फहिला मवः,”
परमप्रभुं धयादी।
9 “जिं तःकः मछि छिमिगु क्यब व दाखक्यबय् ल्वय्
व फ्वसा वय्काः सखाप याना।
छिमिगु यःमरि व जैतूनया सिमायात क्वःबुइँचातय्सं सखाप याका,
अथे जूसां छिपिं जिथाय् फहिला मवः,”
परमप्रभुं धयादी।
10 “जिं छिमिगु दथुइ मिश्र देशय् थें
महामारी छ्वयाहया।
जिं छिमि ल्याय्म्हपिं मनूतय्त छिमिसं लाका काःपिं
सलतनापं लडाइँलय् स्याना,
छिमि सीपिं मनूतय्गु सीम्ह तसकं नवयाच्वंगु दु,
अथे जूसां छिपिं जिथाय् फहिला मवः,”
परमप्रभुं धयादी।
11 “जिं छिपिं मध्ये गुलिंसित सदोम
व गमोरायात थें नाश याना।
छिपिं च्यानाच्वंगु मिं लिकागु ह्यंग्वाः थें जुल,
अथे जूसां छिपिं जिथाय् फहिला मवः,”
परमप्रभुं धयादी।
12 “अथे जुयाः अय् इस्राएलयापिं मनूत,
जिं छिमित सजाँय बी, जिं अथे याः हे याये।
अय् इस्राएलयापिं मनूत जिं अथे याये त्यनागुलिं छिपिं परमेश्वरया न्ह्यःने वयेत तयार जु।”
13 पर्वतत दय्कादीम्ह
व फय्यात सृष्टि यानादीम्ह परमेश्वर हे खः।
वय्कलं मनूतय्त थःगु बिचाः सीकेबी।
वय्कलं न्हियात चा यानादी,
अले पृथ्वीया ततःजाःगु थासय् न्यासि झायादी।
दक्व शक्ति दुम्ह परमप्रभु परमेश्वर वय्कःया हे नां खः।