7
क्वःबुइँचाया दर्शन
1 परमप्रभु परमेश्वरं जितः छगू दर्शन क्यनादिल – जुजुया ब्वयागु बाली लये धुंकाः अले न्हूगु बाली सयावये धुंकाः वय्कलं छबथां क्वःबुइँचात सृष्टि यानादीगु जिं खना।
2 इमिसं बुँइ च्वंगु बालीनाली नये धुंकाः जिं धया, “हे परमप्रभु परमेश्वर, क्षमा यानादिसँ। याकूब गथे यानाः म्वाये फइ? व तसकं हे चीधिकः तिनि।”
3 थ्व खँय् परमप्रभु इपिंलिसें नरम जुयादिल।
“थथे जुइ मखु,” परमप्रभुं धयादिल।
मियागु दर्शन
4 परमप्रभु परमेश्वरं जितः थ्व क्यनादिल, मिं न्याय यायेत परमप्रभु परमेश्वरं क्वछिनादिल। व मिं ततःजाःगु समुन्द्रयात गंकाः जमिनयात नं भस्म यानाबिल।
5 उबले जिं तसलं धया, “हे परमप्रभु परमेश्वर, बिन्ति दु, पनादिसँ। याकूब गथे यानाः म्वाये फइ? व तसकं हे चीधिकः तिनि।”
6 थ्व खँय् परमप्रभु इपिंलिसें नरम जुयादिल।
“थथे नं जुइ मखु,” परमप्रभु परमेश्वरं धयादिल।
साहुलया दर्शन
7 वय्कलं जितः थ्व नं क्यनादिल, का दुगु गँचा तयाः दय्कातःगु अंगः लिकसं थःगु ल्हातय् का दुगु गँचा ज्वनाः प्रभु दनाच्वंगु जिं खना।
8 परमप्रभुं जितः धयादिल, “आमोस, छं छु खनाच्वना?”
जिं लिसः बिया, “छगू का दुगु गँचा।”
अले परमप्रभुं धयादिल, “स्व, जिं थः मनू इस्राएलीतय्गु दथुइ छगू का दुगु गँचा तयाबी। आः जिं इमित बाकि तये मखुत।
9 “इसहाकया ततःजाःगु पुजा याइगु थाय् भज्यंक नाश जुइ,
अले इस्राएलया पवित्रथाय् भज्यंक स्यनी।
जिं तरवार ज्वनाः यारोबामया घरानायात हमला याये।”
आमोस व अमस्याह
10 अले बेथेलया पुजाहारी अमस्याहं इस्राएलया जुजु यारोबामयाथाय् थथे धाय्के छ्वल, “इस्राएलया मनूतय्गु दथुइ आमोसं छिगु विरोधय् जाः ग्वयाच्वंगु दु। थ्व देशं वयागु दक्व खँ सह याये फइ मखु,
11 छाय्धाःसा आमोसं थथे धयाच्वंगु दु,
“ ‘यारोबामयात तरवारं स्याइ,
अले इस्राएलयात धात्थें हे
थःगु देशं तापाक ज्वनायंकीतिनि।’ ”
12 अले अमस्याहं आमोसयात धाल, “अय् अगमवक्ता, थनं वनाछ्व यहूदाय् हुँ, अन नयेगु नसा कायेगु या, अले अगमवाणी धा।
13 बेथेलय् हाकनं गुबलें अगमवाणी धाये मते, छाय्धाःसा थ्व ला जुजुया पुजा याइगु थाय् व राज्य याइगु देगः खः।”
14 आमोसं अमस्याहयात थ्व लिसः बिल, “जि ला ज्यालाया निंतिं अगमवाणी धाइम्ह अगमवक्ता मखु, अगमवक्ताया पुचःयाम्ह नं मखु। तर जि ला छम्ह फैजवाः व यःमरिमात स्वइम्ह मनू खः।
15 तर परमप्रभुं जितः फै-च्वलय् ज्वयेगुपाखें सःतादिल अले धयादिल, ‘हुँ, वनाः जिमि इस्राएली मनूतय्त अगमवाणी धाः।’
16 अथे जुयाः आः परमप्रभुया वचन न्यँ। छं धाइगु,
“ ‘इस्राएलया विरोधय् अगमवाणी धाये मते,
अले इसहाकया घरानातय्गु विरोधय् प्रचार यायेगु त्वःति।’
17 “अय्जूगुलिं परमप्रभुं थथे धयादी –
“ ‘छं कलाः शहरय् छम्ह वेश्या जुइ,
छं काय्म्हाय्पिन्त तरवारं स्याइ।
छंगु देशयात नापय् याइ अले इनी।
छ थः हे नं छगू मूर्ति पुजा याइगु छगू अशुद्धगु देशय् सी,
अले इस्राएलया मनूतय्त धात्थें हे
थःगु देशं तापाक ज्वना यंकी।’ ”