कोरिन्थय् च्वंगु मण्डलीयात पावलं च्वःगु न्हापांगु पौ
म्हसीका
थ्व पौ पावलं थःम्हं नीस्वना थकूगु मण्डलीया इसाई जीवन व विश्वासया बारे खनेदः वःगु समस्यायात कयाः च्वःगु खः। उबलय् कोरिन्थ थाय्थासं मनूत वयाः च्वनीगु ग्रीसया छगू तःधंगु शहर खः। नापं रोमी साम्राज्यया छगू प्रान्त अखैयाया राजधानी नं खः। थ्व ब्यापार, संस्कृति, थीथी धर्मया निंतिं नां जाः।
पावलं भिंगु खँ न्यंकेगु निगूगु यात्राय् दकलय् लिपा कोरिन्थय् वनाः यहूदीतय् धर्मशास्त्र स्यनीगु छेँय् भिंगु खँ न्यंकल, तर अप्वः थें यहूदीतय्सं पावलया शिक्षायात मानय् मयागुलिं यहूदीतय् धर्मशास्त्र स्यनीगु छेँ त्वःताः वं मेगु जातियापिन्त भिंगु खँ न्यंकेगु यात। (प्रेरित १८:१-२०) कोरिन्थय् न्हूगु मण्डली शुरु याये धुंकाः पावलं व थाय् त्वःताः एफिससय् वनाः अन व निदँ तक च्वन। एफिसस कोरिन्थं समुद्र पारि प्यसः व चयस्वँगू किलोमिटर पुर्बय् (आःया टर्की देशय्) लाः।
पावलं पतिइ कोरिन्थया मण्डलीइ ल्वापु व व्यभिचार जुयाच्वंगु, ब्याहाया खँय् कचकच जूगु, मूर्तियात छाःगु प्रसाद नयेगु, गुकथं मण्डलीइ सेवा यायेगु, पवित्र आत्मां बियादीगु वरदान व सीपिं म्वाना वइ धयागु खँय् जोर बियाः च्वयातःगु दु। पावलं भिंगु खँय् थुमिगु बारे गुकथं च्वयातःगु दु धकाः दुग्यंक च्वयातःगु दु।
थ्व पौयात कोरिन्थय् च्वंपिन्त च्वःगु न्हापांगु पौ धकाः धाःसां थ्व इमित च्वःगु न्हापांगु पौ मखु, वं थ्व पतिइ न्हापा नं छगू पौ च्वये धुंकूगु खँ न्ह्यथनातःगु दु (५:९)। इमिसं नं वयात पौ च्वल (७:१)। इमित च्वःगु न्हापांगु पतिइ इमिसं न्यंगु खँया लिसः नं बियातःगु दु। १३ अध्यायलय् परमेश्वरं थः मनूतय्त बियादीगु दकलय् तःधंगु वरदान मायायागु खँ न्ह्यथनातःगु दु। थ्व अध्याय सफूया दक्वसिबय् नांजाःगु अध्याय खः। ईस्वी सम्बत ५४ पाखे पावलं एफिससं इमित थ्व न्हापांगु पौ च्वःगु खः।
धलः पौ
न्ह्यखँ १:१-९
मण्डलीइ ल्वापु जूगु १:१०–४:२१
व्यभिचार व ब्याहाया खँ ५:१–७:४०
विश्वासी व विश्वासी मखुपिं ८:१–११:१
मण्डलीइ गुकथं सेवा यायेगु ११:२–१४:४०
ख्रीष्ट सिनाः म्वानावःगु व विश्वासीत १५:१-५८
यहूदियाय् च्वंपिं विश्वासीतय्त चन्दा ब्यूगु १६:१-४
थःगु खँ व क्वचाय्कूगु १६:५-२४
१ कोरिन्थी
1
पावलपाखें ज्वजलपा
1 परमेश्वरं ख्रीष्ट येशूयाम्ह प्रेरित यानातःम्ह पावल व झी किजा सोस्थेनेसपाखें
2 कोरिन्थय् च्वंगु मण्डलीयापिन्त ज्वजलपा!
ख्रीष्ट येशूपाखें पवित्र जूपिं परमेश्वरया मनू जुइत सःतातःपिं व थाय् थासय् च्वंपिं झी प्रभु येशू ख्रीष्टयागु नां काइपिं सकसितं
3 झी परमेश्वर बाः व प्रभु येशू ख्रीष्टं दया माया व शान्ति बियादीमा।
4 ख्रीष्ट येशूं छिमित दया माया यानादीगुलिं जिं न्ह्याबलें परमेश्वरयात सुभाय् बियाच्वनागु दु।
5 ख्रीष्टयात विश्वास याःगुलिं छिपिं फुक्क खँय् तःमि जुल। छिमिके सकतां ज्ञान नं दत, अले बांलाक थुइकाः खँ नं ल्हाये सल।
6 ख्रीष्टयागु खँ छिमिसं बांलाक थुइका कयाः थःगु नुगलय् दुने तयातःगु नं दु।
7 अय्जूगुलिं येशू ख्रीष्ट झायादी तिनि धकाः छिपिं पियाच्वंगुलिं छिमित छुं नं आत्मिक वरदान मगाःमचाः जुइ मखु।
8 झी प्रभु येशू ख्रीष्ट झायादीबलय् तक परमेश्वरं छिमित विश्वासय् क्वात्तुकाः द्वं मदुम्ह यानातयादी।
9 परमेश्वर विश्वास याये बहःम्ह खः। वय्कलं हे थःकाय्, झी प्रभु येशू ख्रीष्टनाप झीत मिलय् यानादीगु खः।
मण्डलीइ ल्वापु जूगु
10 यःपिं दाजुकिजापिं, झी प्रभु येशू ख्रीष्टया नामय् छिमित जिगु बिन्ति दु – छिपिं सकसिनं छगू हे खँ ल्हायेगु या। छिमिगु दथुइ ल्वापु मजुइमा बरु छिपिं फुक्कं मिलय् जुयाः छगू हे बिचाः व छगू हे मन जुयाच्वनेगु त्वःते मते।
11 छिपिं थःथवय् ल्वानाच्वन धयागु खँ जितः क्लोएया छेँयापिन्सं कंगु खः।
12 जिं न्यनागु खँ छु धाःसा छिपिं गुम्हय्सिनं – “जि पावलयाम्ह” धाइगु हं, गुम्हय्सिनं “अपोल्लोसयाम्ह,” गुम्हय्सिनं “केफासयाम्ह,” गुम्हय्सिनं “ख्रीष्टयाम्ह” धकाः धाइगु हं।
13 छु ख्रीष्ट तःम्ह मछि दु ला? छिमिगु लागि क्रूसय् सीम्ह पावल खः ला? अले पावलयागु नामं छिमिसं बप्तिस्मा कयागु खः ला?
14 क्रिस्पस व गायसयात बाहेक जिं मेपिं सुयातं बप्तिस्मा मबिया। उकिं जिं परमेश्वरयात सुभाय् बियाच्वना।
15 अय्जूगुलिं जिगु नामं बप्तिस्मा बिल धकाः सुनानं धाये फइ मखु।
16 अँ, स्तिफनसयात व वया छेँयापिन्त नं बप्तिस्मा बियागु दु। इपिं बाहेक मेपिं सुयातं जिं बप्तिस्मा बिया थें मच्वं।
17 ख्रीष्टं जितः बप्तिस्मा बीत छ्वयाहयादीगु मखु, बरु भिंगु खँ न्यंकेत छ्वयाहयादीगु खः। थथे भिंगु खँ थःगु बुद्धिं न्यंकागु मखु। मखुसा ख्रीष्ट क्रूसय् सिनाः शक्ति क्यनादीगु सितिं वनी।
परमेश्वरयागु बुद्धि व शक्ति ख्रीष्ट हे खः
18 परमेश्वरयात म्हमस्यूपिं मनूतय्त ला ख्रीष्ट क्रूसय् सिनादिल धयागु खँ मूर्ख खँ खः। झी बचय् यानातःपिन्त ला ख्रीष्ट क्रूसय् सिनादीगु खँ परमेश्वरयागु शक्ति खः।
19 थ्व हे खँ धर्मशास्त्रय् थथे च्वयातःगु दु –
“जिं ज्ञानीपिनिगु ज्ञानयात
नाश यानाबी,
अले बुद्धिमानतय्गु बुद्धियात
ज्यालगय् मजुइकाबी।”
20 ज्ञानी धाःपिं गन वन ग्व? सःस्यूपिं धाःपिं गन वन? थ्व संसारय् जवाःसवाः यानाजुइपिं गन वन? परमेश्वरं थ्व संसारयागु ज्ञानयात मूर्ख यानादीगु मदु ला?
21 थःगु हे ज्ञान बुद्धिं मनूतय्सं परमेश्वरयात म्हसीके फइ मखु धयागु खँ वय्कलं स्यू। उकिं सःस्यूपिन्सं मूर्ख खँ ताय्कूगु येशू क्रूसय् सिनादीगु खँ न्यनाः विश्वास याःपिन्त बचय् यायेगु क्वःछिनादिल।
22 थ्व खँ धात्थें हे खः धकाः सीकेत यहूदीतय्सं चिं माला जुइ, अले ग्रीकतय्सं ज्ञान माला जुइ।
23 जिमिसं धाःसा क्रूसय् सीम्ह ख्रीष्टयागु खँ न्यंका जुया। यहूदीतय्गु निंतिं थ्व पंगः जुल, अले ग्रीकतय्गु निंतिं थ्व मूर्ख खँ जुल।
24 थथे खःसां परमेश्वरं सःताःदीपिं यहूदीतय्त व यहूदीमखुपिन्त नं ख्रीष्ट हे परमेश्वरयागु शक्ति व बुद्धि खः।
25 परमेश्वरयागु मूर्ख खँ मनूतय्गु ज्ञान स्वयाः तःधं, अले परमेश्वरयागु कमजोरी मनूतय्गु बल स्वयाः तसकं बल्लाः।
26 यःपिं दाजुकिजापिं, परमेश्वरं सःतादीबलय् छिपिं गज्याःपिं खः छकः लुमंका स्व। मनूतय्गु न्ह्यःने छिपिं गुम्हं गुम्हं जक बुद्धिमान, शक्ति दुपिं, अले तःधंपिं खः।
27 संसारय् च्वंपिं बुद्धिमानतय्त लज्या चाय्केत परमेश्वरं मूर्खतय्त ल्ययादिल। अले संसारय् च्वंपिं शक्ति दुपिन्त लज्या चाय्केत बमलाःपिन्त ल्ययादिल।
28 संसारय् च्वंपिं मनूतय्सं चिधं धाःगु, क्वह्यंकातःगु व ज्यालगय् मजू धयातःगुयात परमेश्वरं ल्ययादिल। संसारं तःधं ताय्कूपिन्त नाश यायेत परमेश्वरं इमित ल्ययादीगु खः।
29 अय्जूगुलिं सुनानं परमेश्वरया न्ह्यःने तःधंछुइ फइ मखु।
30 परमेश्वरं छिमित ख्रीष्ट येशू नाप मिलय् यानादिल। वय्कलं झीत ख्रीष्टपाखें फुक्क खँ सीके थुइके फय्कादिल। ख्रीष्टं यानाः हे झीपिं परमेश्वर नाप मिलय् जुइ खन। ख्रीष्टं झीत पवित्र यानाः पापं मुक्त यानादिल।
31 अय्जूगुलिं धर्मशास्त्रय् थथे च्वयातःगु दु – “सुयां तःधंछुइ मास्ति वःसा परमेश्वरं यानादीगु खँय् तःधंछु।”