कोरिन्थय् च्वंगु मण्डलीयात पावलं च्वःगु निगूगु पौ
म्हसीका
पावल व कोरिन्थया मण्डलीया दथुइ खँ मिले मजूगु इलय् पावलं मण्डलीयात हाकनं थ्व पौ च्वःगु खः। अनया गुलिं गुलिं विश्वासीतय्सं पावलयात मभिंकाः खँ ल्हाना जुल। तर पावलं इमिगु द्वंबिद्वं ल्वःमंकाः इपिंलिसें मिलय् जुइ मास्ति वय्काच्वन।
न्हापांगु पौलय् पावलं ब्वःब्यूगुलिं कोरिन्थयापिन्सं थ्व पौयात लय्तायाः स्वीकार मया।
पौया न्हापांगु ब्वय् पावलं मण्डलीलिसे थःगु स्वापु दुगु खँ न्ह्यथनाः थःम्हं न्हापांगु पौलय् छाय् तमं ब्वः बिया हयागु धयागु खँ ध्वाथुइकातःगु दु। अले इमिसं गल्ती स्वीकार यानाः पश्चाताप याःगुलिं पावल लय्तायाच्वंगु खँ नं प्वंकातःगु दु।
अले यरूशलेमया चीमिपिं विश्वासीतय्त नुगः चक्कंकाः ग्वाहालि यायेत नं इनाप यानातःगु दु। (८-९)
पावल गज्याःम्ह मनू खः धइगु खँ थ्व हे पौपाखें झीसं सीके फइ। दकलय् लिपायागु अध्यायलय् (१०-१३) पावलं कोरिन्थय् थःपिन्त धात्थेंयापिं प्रेरितत, अले पावल फताहा प्रेरित खः धकाः धयाजूपिनिगु खँ न्ह्यथनाः थः सत्यम्ह प्रेरित खः धयागु दसु बियातःगु दु।
कोरिन्थय् च्वंपिन्त न्हापांगु पौ च्वःगु दच्छि ति लिपा पावलं माकेडोनियां ईस्वी सम्बत ५५-५७ पाखे थ्व निगूगु पौ च्वल।
धलः पौ
न्ह्यखँ १:१-११
पावल व कोरिन्थय् च्वंगु मण्डली १:१२–७:१६
यहूदियाय् च्वंपिं विश्वासीतय्त ग्वाहालि याःगु ८:१–९:१५
पावलं थः सत्यम्ह प्रेरित खः धकाः दसु ब्यूगु १०:१–१३:१०
क्वचाय्कूगु १३:११-१४
२ कोरिन्थी
1
पावलपाखें ज्वजलपा
1 परमेश्वरं हे ख्रीष्ट येशूयाम्ह प्रेरित यानातःम्ह पावलपाखें व झी किजा तिमोथीपाखें कोरिन्थय् च्वंगु परमेश्वरया मण्डलीयात व अखैयाय् फुक्कभनं च्वंपिं वय्कःया सकल मनूतय्त ज्वजलपा।
2 छिमित झी परमेश्वर बाः व प्रभु येशू ख्रीष्टयागु दया माया व शान्ति दयेमा।
परमेश्वरयात पावलं सुभाय् ब्यूगु
3 झी प्रभु येशू ख्रीष्टया परमेश्वर व बाःयात झीसं सुभाय् बी हे माः। वय्कः दया माया दुम्ह व फुक्क कथंया सान्त्वना बियादीम्ह परमेश्वर खः।
4 जिमित दुःखकष्ट जुइबलय् वय्कलं हे सान्त्वना बियादी। थुकथं परमेश्वरं हे थथे जिमित सान्त्वना बियादीगुलिं जिमिसं नं दुःखकष्ट सियाच्वंपिन्त सान्त्वना बी फु।
5 ख्रीष्टं यक्व दुःखकष्ट सियादी थें तुं जिमिसं नं दुःखकष्ट सियाच्वनागुलिं थ्व हे ख्रीष्टपाखें जिमित नं सान्त्वना दइतिनि।
6 जिमिसं दुःखकष्ट सियाच्वनागुलिं छिमित सान्त्वना व मुक्ति दइ। परमेश्वरं जिमित सान्त्वना बियादिल धाःसा छिमित नं सान्त्वना दइ। अथे हे दुःखकष्ट जुइबलय् जिमित थें छिमित नं सह याये फइगु शक्ति दइ।
7 थथे जिमिसं छिमिके थ्व हे आशा यानाच्वनागु दु। गथे जिमिसं दुःखकष्ट सियाच्वना अथे हे छिमिसं नं दुःखकष्ट सियाच्वंगुलिं जिमित सान्त्वना दुगु थें छिमित नं सान्त्वना दइ।
8 यःपिं दाजुकिजापिं, एशियाय् जिमित दुःखकष्ट जूगु खँ छिमिसं नं सीमा धयागु जिमिगु इच्छा दु। अबलय् जिमित जूवःगु दुःखकष्ट तसकं हे तःधंगुलिं जिमिसं सह याये तक नं मफुत। म्वाइ थें हे मच्वने धुंकूगु।
9 जिमिसं ला “सि हे सित” धाये धुनागु। थःके भरोसा मतसे सीपिन्त म्वाकादीम्ह परमेश्वरयाके भरोसा तयेमा धकाः क्यनेत थथे जूगु खः।
10 अथे सी हे धुंकूपिं जिमित परमेश्वरं बचय् यानादिल, थथे हे लिपा तक नं बचय् यानातयादी। वय्कलं हानं हानं जिमित बचय् यानातयादी धकाः वय्कःयाके जिमिसं आशा तयाच्वना।
11 छिमिसं नं जिमिगु ग्वाहालिया निंतिं थथे हे प्रार्थना यानाः परमेश्वरं जिमित आशिष बियादीगुलिं यक्वसिनं वय्कःयात सुभाय् बियाच्वंगु दु।
पावलं यात्राया ग्वसाः हीकूगु
12 जिमिसं मछाः मजुसे धायेफु – थ्व संसारय् जक मखु छिमिगु न्ह्यःने नं जिमिसं मभिंगु मतिइ मतसे ज्याखँ याना जुया। जिमिसं थथे थःगु हे ज्ञानं मखु, बरु परमेश्वरं बियादीगु दया मायां दया याये फुगु खः।
13 छिमिसं ब्वनाः थुइके फइगु खँ जक जिमिसं च्वयाहयागु खः। छिमिसं फुक्कं थुइके फइ धकाः जिं आशा यानाच्वनागु दु।
14 थौंकन्हय् छिमिसं जिमिगु खँ भचासां थुइ धुंकल। प्रभु येशू हानं झायादीबलय् छिपिं खनाः गथे जिमिसं छ्यं धस्वाके फइ अथे हे छिमिसं जिपिं खनाः छ्यं धस्वाके फइ।
15 थ्व हे खं यानाः जि नं छिमिथाय् वयेत कुतः यानाच्वनागु खः। थुकिं यानाः छिमित निदुगं आशिष दइ।
16 जि माकेडोनियाय् वनेबलय् छिमिथाय् छकः दुस्वयाः जक वनेगु मतिइ तयागु खः। अले माकेडोनियां लिहां वयेबलय् नं छकः छिमित नापलाः वयेगु मतिइ दु। अय्जुइबलय् जिं यहूदियाय् वनेत छिमिगुपाखें छुं भचा ग्वाहालि नं काये फइ।
17 थथे मन हीकल धकाः जि छु मभिंम्ह, भरोसा मदुम्ह मनू जुल ला? गुबलें “ज्यू,” गुबलें “मज्यू” धकाः जि थःत जक भिंकेत स्वइम्ह मनू खः ला?
18 गथे परमेश्वर विश्वास याये बहःम्ह खः, अथे हे जिमिसं नं म्हुतुं छता ज्यां छता याना मजुया।
19 सिलास, तिमोथी व जिं छिमित परमेश्वरया काय् ख्रीष्ट येशूयागु खँ न्यंकागु दु। वय्कःयाके गुबलें “खः” गुबलें “मखु” मदु। तर वय्कःयाके न्ह्याबलें “खः हे खः” जक दु।
20 परमेश्वरं बियादीगु बचं फुक्क येशूपाखें पूवनी। अय्जूगुलिं हे परमेश्वरयात सुभाय् बीबलय् येशूयागु नामं झीसं “आमेन” धकाः धायेगु खः।
21 ख्रीष्टयात क्वात्तुक विश्वास यानाच्वने फय्क छिमित नं जिमित नं शक्ति बियादीम्ह परमेश्वर हे खः। परमेश्वरं झीत ल्ययादीगु खः।
22 झीपिं वय्कःया मनूत खः धकाः म्हसीकेत वय्कलं चिं थें झीगु नुगलय् पवित्र आत्मा बैनाकथं बियातयादीगु दु।
23 जिगु नुगलय् च्वंगु फुक्क खँ स्यूम्ह परमेश्वरयात साक्षी तयाः जिं धयाच्वना। छिमित ब्वःबियाः छिमिगु नुगः ख्वय्के मास्ति मवःगुलिं जि आम्कन कोरिन्थय् मवयागु खः।
24 छिमिगु विश्वासयात जिमिसं थःगु ल्हातय् कायेत स्वयागु मखु। छिमिसं क्वात्तुक विश्वास यानाच्वंगु दु। छिमित लय्ताय्केत हे जिपिं छिपिंनाप ज्या यानाच्वनागु खः।