12
पावलं खंगु दर्शन
1 फुइँ यानाः भिं जुइ मखु धकाः सीक सीकं नं जिं फुइँ याये माल। प्रभुं जितः क्यनादीगु दर्शन जिं आः कने।
2 झिंप्यदँ न्ह्यः छम्ह विश्वासीयात ज्वनाः स्वंगूगु स्वर्गय् थत यंकल, व मनूयात जिं म्हस्यू। थथे वयात म्हनापं यंकल कि म्ह मदय्क व जिं मस्यू, परमेश्वरं जक स्यू।
3 जिं हानं धाये – स्वर्गय् थथे थत यंकूम्ह मनूयात जिं म्हस्यू। थथे वयात म्हनापं यंकल कि म्ह मदय्क व जिं मस्यू, परमेश्वरं जक स्यू।
4 स्वर्गय् वं धयां मब्यागु खँ ताल, गुगु मनूतय्गु म्हुतुं धाये हे मज्यू।
5 थ्व मनूयागु खँय् धाःसा जिं फुइँ याये फु, थःगु खँय् धाःसा जिं फुइँ याये मफु। जि गुलि बमलाः धयागु खँय् जक जिं फुइँ याये फु।
6 जिं फुइँ हे याये मास्ति वय्कूसां जि मूर्ख जुइ मखु, छाय्धाःसा जिं सत्य खँ जक धयाच्वनागु दु। अय्नं जिं फुइँ याना जुइ मखु, छाय्धाःसा जिं धाःगु खँ ताःपिन्सं व जिं याना जूगु ज्या खंपिन्सं जि गुलि ग्यं धकाः सि हे स्यू, थुलिं अप्वः सुनानं तःधंकूगु नं जितः मयः।
7 थज्याःगु अजू चायापुगु तःगू हे खँ खना धकाः जिं तःधंछुना जुइ धकाः जिगु म्हय् अतिकं तःधंगु दुःख बियादिल। थुकिं शैतानया मनुखं थें जितः म्हय् च्वाच्वां सुयाः तःधंछुइ मफय्का तल।
8 थ्व दुःख मदय्कादिसँ धकाः जिं स्वकः तक प्रभुयात बिन्ति याये धुन।
9 प्रभुं जितः थथे लिसः बियादिल – “जिं छन्त दया माया यानाच्वनागु द हे दु नि। छ बमलाःसां जिगु शक्तिं छन्त बल्लाकी।” थुकथं जि बमलाःसां तसकं लय्ताः, छाय्धाःसा जि बमलाइबलय् ख्रीष्टया शक्तिं जितः बल्लाकी।
10 थथे जूगुलिं ख्रीष्टयागु निंतिं बमलाःसां, बेइज्जत याःसां, मछिंसां, दुःखकष्ट जूसां, स्यंकेत स्वःसां, जि तसकं लय्ताः। गुबलय् जि बमलाइ अबलय् जितः बल्लाकी।
कोरिन्थय् च्वंपिन्त पावलयागु माया
11 छिमिसं यानाः मूर्खम्ह मनुखं थें जिं छिमित थथे धया च्वनेमाली। धायेमाल धाःसा छिमिगुपाखें जि तःधने माःगु खः। जि छुं मखुसां छिमिसं जितः हनेमाःगु खः। तःधं धाःपिं प्रेरितत स्वयाः जि कम मजू।
12 दुःखकष्ट जूसां तःकः मछि अजू चायापुगु ज्या व चिं यानाः जि प्रेरित खः धकाः छिमित दसु क्यनागु दु।
13 जिं छिमित थःत नयेत्वने मयाकेगु बाहेक मेगु मण्डलीयापिन्त स्वयाः छुकिं नं चिधंकेत स्वयागु मदु। खः का, जिं छिमिगुपाखें नयेत्वने मयाना। जिं द्वंके लात, जितः माफ यानाब्यु।
14 जि छिमिथाय् हानं वयेत्यनागु दु। जि वयागु थ्वनापं स्वकः जुइ। छिमिके जिं छुं हे काये मखु। छिमिगु धिबा जितः माःगु मदु, जितः माःपिं ला छिपिं हे खः। मस्तय्सं मांबौया लागि धन मुंकातये म्वाः, मां बौपिन्सं जक मस्तय्गु लागि मुंकेगु याइ।
15 छिमित ग्वाहालि यायेत जिके दुगु फुक्कं बी। थथे याये दःसा जि लय्ताः। थुलि जक मखु, छिमिगु निंतिं सी माःसां जि लय्ताः। जिं छिमित थथे यक्व माया यानागुलिं हे छिमिपाखें जिं कम माया काये खंगु ला कि छु?
16 थुकथं जिं छिमित दुःख बियागु मदु धकाः ला छिमिसं सि हे स्यू। अय्नं छिपिं मध्ये सुनानं जिं छिमित झंगः लात धकाः धायेफु।
17 जिं छिमित गुकथं झंगः लात? छिमिथाय् जिं मनूत छ्वयाहयाः छुं काय्के हयागु दु ला?
18 जिं तीतस व मेम्ह किजायात नं छिमिथाय् छ्वयाहयागु दु। तीतसं छिमिथाय् वःबलय् छिमिके छुं कयाहःगु दु ला? जिमिसं थथे यानागुलिं जिमिगु मन छगू हे खः अले ज्या नं छगू हे खः धकाः छिमिसं थुइका काये म्वाः ला?
19 जिमिसं थःपिं बचय् जुइत थथे धयाच्वंगु धकाः छिमिसं मतिइ तल जुइ। यःपिं, अथे मखु, छिमित हे भिंकेत जिमिसं थथे धयाच्वनागु खः धकाः परमेश्वर व ख्रीष्टं स्यू।
20 आम्कन वयेबलय् जिं मतिइ तया थें छिपिं मजूगु, व छिमिसं मतिइ तः थें जि मजुइ फु धकाः जि ग्यानाच्वना। छिमि दथुइ थःथवय् ल्वापु जुइगु, नुगः मुइकेगु, थःथवय् तंम्वया जुइगु, थःगु जक भिं स्वयेगु, मभिंकाः खँ ल्हायेगु, कर्पिनिगु निन्दा यायेगु, घमण्ड यानाजुइगु, गतिपति मदय्क सना जुइगु, थज्याःगु मभिंगु खँ दये फु।
21 जि छिमिथाय् हानं वय्बलय् परमेश्वरं जितः छिमिगु न्ह्यःने लज्या चाये माय्कादी धकाः जि ग्यानाच्वना। अले जितः न्हापा पाप यानाः मह्यूपिं, न्हापा मभिंगु ज्या यानाः व्यभिचार यानाः व लाः लाः थें सनाः पश्चाताप मयाःपिं खनाः ख्वये वइ।