7
1 यःपिं दाजुकिजापिं, झीत थ्व बचं बियादीगुलिं म्ह व आत्मायात अशुद्ध याइगु फुक्क खँपाखें झीसं थःत पवित्र याये नु। अले परमेश्वरया भय कयाः झीसं पवित्र जुयाच्वनेगु कुतः याये नु।
पावल लय्ताःगु
2 जिमित छिमिगु नुगलय् तयाति। जिमिसं सुयातं अन्याय यानागु मदु, सुयातं स्यंकागु मदु, अले सुयाकें थगय् यानाकयागु मदु।
3 छिमित दोष बीत जिं थथे धयाच्वनागु मखु। छिपिं ला जिमित तसकं यः। सीसां म्वाःसां झीपिंनापं हे जुइ।
4 छिमित जिं यक्व हे पत्याः यानाच्वनागु दु। छिमिगुपाखें जिं फुइँ यायेथाय् दु। छिमिगुपाखें सान्त्वना दयाः न्ह्यागु दुःखकष्ट जूसां जितः लय्ता वः।
5 माकेडोनियाय् वयाः नं जिमित सुख दुगु मखु। अन न्ह्याथासं नं दुःखकष्ट जक जूवल। पिने ल्वापु, दुने भय हे भय दु।
6 अय्नं नुगः ख्वःपिन्त सान्त्वना बियादीम्ह परमेश्वरं तीतसयात छ्वयाहयाः जिमित लय्ताय्कादिल।
7 तीतस वयाः जक जिपिं लय्तायागु मखु, छिमिसं वयात सान्त्वना बीगु खँ न्यनाः नं जिपिं लय्तायागु खः। जितः स्वयेत छिपिं तसकं हे आय्बुया च्वंगु, व थथे जूगु खँय् छिमिसं दुःख मन ताय्कूगु, अले जिगु पंलिनाः नवाना जूगु खँ न्यने दयाः जि झन तसकं लय्तायागु दु।
8 जिगु पौ ब्वनाः छिमिसं नुगलय् ला स्याकल हे जुइ, थ्व खँय् जि न्हापा पस्ताय् चायागु जूसां आः जि पस्ताय् चाये मखुत। छाय्धाःसा जिं स्यू, जिगु पौपाखें छिमित पलख जूसां नुगलय् स्याकूगु दु।
9 जिगु पौपाखें छिमित नुगलय् स्याके फत धकाः जि लय्तायागु मखु, बरु छिपिं थज्याःगु ज्याखं लिचिलाः परमेश्वरयाथाय् वःगुलिं लय्तायागु खः। छिमित नुगलय् स्याकेगु ज्या यानादीम्ह ला परमेश्वर हे जुयादीगुलिं जिमिसं यानाः छिमित भिं हे जुल।
10 छिमित नुगलय् स्याकेगु ज्या परमेश्वरं हे यानादीगुलिं व छिमिसं पश्चाताप याःगुलिं छिमित मुक्ति दत, उकिं छिमिसं दुःख ताये माःगु मदु। अय्नं थ्व संसारं ब्यूगु पश्चातापं मनूतय्त स्याइ।
11 छिमिसं दुःख ताय्कूगुलिं परमेश्वरं छु यानादिल लुमंकी। थुकिं यानाः छिमित भिंपिं यानाबिल, द्वंबिद्वं मदु धकाः क्यनेत छिमित हथाय् चाय्कल। जिगु तमं छिमित ग्याकल, जितः स्वयेत छिमित आय्बुइकल। अले दोषीम्हय्सित सजाँय बीमाः धकाः मतिइ तय्कल। थुकिं हे छिमिके दोष मदु धयागु सीदत।
12 थथे जिं पौ च्वयाहयागु दुःख बियाच्वंम्ह मनूया लागि मखु, अले दुःख फया च्वंम्हय्सिगु लागि नं मखु, बरु परमेश्वरया न्ह्यःने छिमिसं जितः गुलि तक माया याः धकाः ध्वाथुइकेत च्वयाहयागु खः।
13 थुकिं हे यानाः जिमित सान्त्वना दुगु खः। छिमिसं तीतसयात माक्व ग्वाहालि बियाः लय्ताय्काः छ्वयाहःगुलिं जिपिं नं लय्ताया।
14 छिमिगु खँ जिं वयात फुइँ यानाः धया। जिं वयात फुइँ यानाः धया थें छिमिसं यानाक्यन। जिमिसं छिमित न्ह्याबलें सत्य खँ धयाच्वनागु दु। अथे हे तीतसयात जिमिसं धयागु खँ नं सत्य जुल।
15 छिमिसं वयात ग्याग्यां जूसां लसकुस यात, अले वं धाःगु खँ न्यनेत छिपिं फुक्क न्ह्यचिल। उकिं वं छिमित तसकं माया यानाच्वंगु दु।
16 छिमिपाखें बांलाक भरोसा काये फुगुलिं जि तसकं लय्तायाच्वना।