8
भ्याःचा व दुगुया दर्शन
1 बेलसजर जुजु जूगु स्वंगूगु दँय्, जि दानिएलं हानं मेगु छगू दर्शन खना।
2 दर्शनय् जिं थःत एलाम प्रान्तया राजधानी शूशन शहरय् खना। शूशन शहरया प्यखेरं पःखाः ग्वयातःगु दु। दर्शनय् जि ऊलै खुसिया सिथय् दनाच्वनागु दु।
3 जिं स्वयाबलय्, अन खुसिया सिथय् निपु ततःपुगु नेकू दुम्ह छम्ह भ्याःचा दनाच्वंगु खना। वयागु छपु नेकू मेगु स्वयाः ताहाक। व ताहाःगु नेकू लिपा बुयावःगु खः।
4 व भ्याःचां पच्छिम, उत्तर व दच्छिनपाखे ब्वांय्ब्वांय् जुयाः च्वयाच्वंगु जिं खना। वयात पने फुम्ह छम्ह नं पशु मदु। सुनानं वयागु शक्तिपाखें बचय् याये मफुत। वं थःयत्थें यात अले व झन बल्लात।
5 जिं थुकिया बारे बिचाः यानाच्वनाबलय् आकाझाकां पच्छिमं छम्ह दुगु हथासं ब्वांय् वल। व दुगु हथासं बँय् मथ्युसे सारा संसार पुलावल। वयागु मिखाया दथुइ छपु अजू चायापुसे च्वंगु नेकू दु।
6 अले व जिं खुसिया सिथय् खनाम्ह निपु नेकू दुम्ह भ्याःचायाथाय् वल। तंपिकयाः भ्याःचायात तसकं च्वल।
7 व भ्याःचायात तसकं तंम्वयाः च्वःगु अले वयागु निपु नेकू त्वथुलाब्यूगु जिं खना। वलिसें ल्वायेत व भ्याःचायाके बल मन्त। वयात बँय् बस्वात अले दुगुं वयात न्हुत्तुन्हुल। भ्याःचायात बचय् याये फुम्ह अन सुं नं मदु।
8 अले दुगु झन तःधंछु जुल, व तसकं बल्लाःबलय् वयागु नेकू त्वधुल। उगु थासय् प्यखेपाखे स्वःगु प्यपु अजू चाइपुगु नेकू बुयावल।
9 उपिं प्यपु नेकू मध्ये छपु नेकुलिं चिपुगु नेकू बुयावल, अले उकियागु शक्ति दच्छिन व पुर्बपाखे अले बांलाःगु देश तक नं न्ह्यज्यात।
10 व थुलि बल्लात कि वं स्वर्गया सेना व नगुतय्त हमला यात। अले नगुयात पृथ्वीइ क्वफानाः तुतिं न्हुत्तुन्हुल।
11 व नेकुलिं थःत स्वर्गया सेनाया सेनापति ति हे तःधंकल। वय्कलं न्हियान्हिथंया बां बीगु दीकाबिल, अले देगःयात अपवित्र यानाबिल।
12 न्हियान्हिथं बां बीगु पलेसा अन हे इमिसं पाप याना विद्रोह यात। अले सत्ययात बँय् वांछ्वयाबिल। वं याःगु फुक्क ज्याय् व नेकू ताःलात।
13 अले जिं छम्ह स्वर्गदूत न्ववाःगु ताया। हानं मेम्ह छम्ह स्वर्गदूतं न्हापा न्ववाःम्हय्सित न्यन, “थ्व दर्शनय् खनेदुगु खँ गबले तक जुयाच्वनी? न्हियान्हिथंया देछाया पलेसा गबले तक घच्चाय्पुगु पाप जुयाच्वनी? देगः व स्वर्गया सेनायात न्हुत्तुन्हुइगु ज्या गबले तक जुयाच्वनी।”
14 अले वं जितः धाल, “निइस्वसः (२,३००) बहनि व सुथ तक! अनंलि पवित्र थाय्यात हाकनं शुद्ध याइ।”
गब्रिएल स्वर्गदूतं दर्शनया अर्थ कंगु
15 थ्व खँ दर्शनय् खनाः जि दानिएलं थुइकेगु कुतः यानाच्वनाबलय् मनू थें च्वंम्ह छम्ह जिगु न्ह्यःने खनेदत।
16 जिं ऊलै खुसिं वःगु मनूया सः ताया। व सलं धाल, “हे गब्रिएल, थ्व मनूयात दर्शनयागु अर्थ थुइकाब्यु।”
17 गब्रिएल जि दनाच्वनागु थासय् वःबलय् जि ग्यानाः बँय् दल। वं जितः धाल, “हे सीमानिम्ह मनू, थ्व दर्शनं अन्तया ईया बारे धाइ।”
18 व जिलिसें न्ववाना च्वंबलय् जितः स्याक्क न्ह्यः वयाः जिगु ख्वाः बँय् भ्वसुल। अले वं जितः थियाः हाकनं थन।
19 वं धाल, “परमेश्वरयागु तंया लिच्वः छु जुइ व जिं छन्त कनेत्यनागु दु। थ्व दर्शनं अन्तया ई क्यनी।
20 छं खंम्ह निपु नेकू दुम्ह भ्याःचा मादी व फारसया जुजुत खः।
21 सँ यक्व दुम्ह दुगु ग्रीसयाम्ह जुजु खः। वयागु मिखाया दथुइयागु तःपुगु नेकू व देशयाम्ह न्हापांम्ह जुजु खः।
22 व त्वधूगु नेकूया थासय् बुयावःगु प्यंगू नेकूया अर्थ थथे खः – व हे देशं प्यंगू देश पिहां वइ, तर इमिके उलि बल दइ मखु।
23 “उपिं देशतय्गु लिपांगु इलय् इमिगु पाप दकले च्वय् थ्यनीबलय् छम्ह तसकं मभिंम्ह व छल यायेसःम्ह जुजु दनी।
24 व तसकं बल्लाइ तर थःगु हे बलं मखु। अले ग्यानापुसे च्वंक मनूतय्त नाश याइ, अले वं याःगु न्ह्यागु ज्याय् नं व ताःलाइ। वं बल्लाःपिं मनूतय्त व पवित्र मनूतय्त नाश याइ।
25 व चलाखम्ह जूगुलिं वयागु छल ताःलाइ। अले वं तःधंछुयाः छुं हे मस्यूपिं यक्व मनूतय्त नाश याइ। वं दकले तःधंम्ह जुजुयागु नं विरोध याइ। अय्नं सुं मनुखं मथीकं व नाश जुइ।
26 “बहनि व सुथ बारे छं छु छु खनागु व न्यनागु खः व खःगु खँ खः। तर छं दर्शनय् छु छु खनागु खः व सुयातं सीके मते छाय्धाःसा व ता ई लिपा जक जुइ।”
27 अनंलि जितः तसकं त्यानुल, छुं न्हि तक जितः ल्वचं कयाच्वन। अनंलि जि दनाः जुजुया ज्याय् वना। अय्नं जिं खनागु दर्शनं यानाः जि छु याये छु याये जुल। थ्व जिं थुइके मफुत।