16
छुत्काराया नखः
प्रस १२:१-२०; लेवी २३:५-८; गन्ती २८:१६-२५
1 आबीब लायात लुमंकाः परमप्रभु छिमि परमेश्वरयागु छुत्काराया नखः हनेगु या, छाय्धाःसा आबीब लाय् हे वय्कलं छिमित चान्हय् मिश्रं पित हयादीगु खः।
2 छिमिसं परमप्रभु छिमि परमेश्वरयात वय्कलं थःगु नां तयेत ल्ययादीगु थासय् छुत्काराकथं फैच्वलय् व साद्वहंपाखें बां ब्यु।
3 व नापं सोडा दुगु मरि नये मते। न्हय्न्हु तक सोडा मतःगु मरि धाःसा नयेगु या, थ्व दुःखया मरि खः। छाय्धाःसा मिश्रं छिपिं हथाय् चाचां वःगु खः। मिश्रं पिहां वःगु छिमिसं जिवंकाछि लुमंका तयेत थ्व नयेमाःगु खः।
4 न्हय्न्हु तक छिमिगु देशय् सुनानं सोडा थःगु छेँय् तये मते। न्हापांगु न्हिया बहनी बां ब्यूम्ह पशुया ला सुथय् जुइ न्ह्यः तकं फुकेमाः, छकुचा नं ल्यंकातये मते।
5 छुत्काराया नखःयाम्ह पशुयात छिमिसं परमप्रभु छिमि परमेश्वरं छिमित बियादीगु छुं नं शहरय् बां बी मते।
6 परमप्रभु छिमि परमेश्वरं थःगु नां तयेत ल्ययादीगु थासय् जक बां बीगु या। आबीब लाया सूर्य बिनावनीगु इलय्, छिपिं मिश्रं पिहां वःगु लुमंकाः हनीगु दिनय् छुत्काराया पशु बां ब्यु।
7 परमप्रभु छिमि परमेश्वरं ल्ययादीगु थासय् हे व पशुया ला छुयाः न। अले सुथय् थथःगु छेँय् लिहां हुँ।
8 खुन्हु तक सोडा मतःगु मरि न, अले न्हय्न्हु खुन्हु परमप्रभु छिमि परमेश्वरयात आराधना यायेत पवित्र मुँज्या या। उखुन्हु छुं ज्या याये मते।
सामाज्याया नखः
प्रस ३४:२२; लेवी २३:१५-२१; गन्ती २८:२६-३१
9 सःगु बाली ईंचां लयेगु ज्या शुरु यायेगु इलंनिसें न्हय्वाः ल्याःखा।
10 अले परमप्रभु थः परमेश्वरं छिमित बियादीगु सुवाःकथं थः यःछिं बलि छायाः परमप्रभु छिमि परमेश्वरया निंतिं सामाज्याया नखः हनेगु या।
11 परमप्रभु छिमि परमेश्वरं थःगु नांया लागिं च्वनेगु ल्ययादीगु थासय् छिपिं, छिमि काय्म्ह्याय्पिं, दास दासी, शहरय् च्वंपिं लेवीया सन्तानत, परदेशीत, मांबौ मदुपिं मस्त व भाःत सी धुंकूपिं मिस्त, फुक्कसिनं थः परमेश्वरया न्ह्यःने लसता हँ।
12 छिपिं मिश्रय् दास दासी जुयाच्वंगु खः धइगु खँ ल्वःमंके मते अले थुपिं नियम बांलाक मानय् या।
बल्चाबाय्या नखः
लेवी २३:३३-४३; गन्ती २९:१२-३८
13 थःगु खला व दाख तिसीगु थासं फुक्क मुंके धुंकाः छिमिसं न्हय्न्हु तक बल्चाबाय्या नखः हनेगु या।
14 छिपिं, छिमि काय्म्ह्याय्पिं, दास दासी अले छिमिगु शहरय् च्वनिपिं लेवीया सन्तानत, परदेशीत, मांबौ मदुपिं मस्त व भाःत सी धुंकूपिं मिस्त फुक्कसिनं नखःबलय् लसता हँ।
15 वय्कलं ल्ययादीगु थासय् परमप्रभु छिमि परमेश्वरया लागिं न्हय्न्हु तक नखः हनेगु या। छाय्धाःसा परमप्रभु छिमि परमेश्वरं छिमिगु फुक्क बाली व ज्याय् छिमित सुवाः बियादी अले छिपिं लय्ताया च्वँ।
ल्ययादीगु थासय् स्वंगू तःधंगु नखः
16 परमप्रभु छिमि परमेश्वरं ल्ययादीगु थासय् दँय् स्वक्वः छिमि मिजंत धाक्व वय्कःया न्ह्यःने खनेदः वनेमाः, सोडा मतःगु मरिया नखःबलय्, सामाज्याया नखःबलय् अले बल्चाबाय्या नखःबलय् परमप्रभुया न्ह्यःने सुं नं खालि ल्हातं वने मते।
17 छिमि फुक्क मनूतय्सं परमप्रभु छिमि परमेश्वरं बियादीगु सुवाःकथं थथःगु देछा छायेमाः।
न्याय बीगु ज्या
18 परमप्रभु छिमि परमेश्वरं बियादीगु छिमिगु फुक्क शहरय् थथःगु कुलकथं न्याय याइपिं व मेपिं हाकिमत ल्य। इमिसं मनूतय्गु न्याय खःकथं यायेमाः।
19 इमिसं सुयागु पंलिनाः ज्या मयायेमाः। घुस मनयेमाः छाय्धाःसा घुसं मनूतय्त कां यानाबी अले भिंम्ह मनूया बचंयात हीकाबी।
20 खःगु खँया जक ल्यू हुँ। अले परमप्रभु छिमि परमेश्वरं बियादीगु देशयात त्याकाकयाः छिपिं म्वानाच्वने फइ।
ल्वहं वा सिँया मूर्ति धमस्वाकेगु
21 छिमिसं परमप्रभु थः परमेश्वरया निंतिं दय्कूगु वेदीया लिक्क अशेरा द्यःमय्जुया सिँया थां धस्वाके मते।
22 छिमिसं पुजा याइगु ल्वहं धस्वाके मते। परमप्रभु छिमि परमेश्वरयात थ्व तसकं मयः।