2
मोजमज्जा यायेगु सितिं वं
1 जिं मनयात धया, “वा, भिंगु छु खः धकाः सीकेत जिं मोजमज्जा यानाः छन्त जाँचय् याये।” तर व नं सितिं वंगु खँ खः।
2 जिं थथे धया, “न्हिलीगु वेँ खँ खः। अले मोजमज्जा यानाः छु दइ?”
3 दाखमद्य त्वनाः वा मूर्ख खँयात घय्पुनाः जिं थःत लय्ताय्केगु कुतः याना। अझ नं जिगु मनयात बुद्धिं न्ह्यज्याका यंकाच्वंगु खः। आकाशया क्वय् चिहाकःगु जीवनय् सुं मनूया निंतिं बांलाःगु खँ छु खः धकाः सीकेगु जिं इच्छा याना।
4 जिं ततःधंगु ज्या याना। जिं जिगु निंतिं ततःखागु छेँ दय्का। जिं दाखया क्यबत दय्का।
5 जिं स्वांया क्यबत व फलफुलया क्यबत दय्का अले उकी थीथी कथंयागु फलफुलया सिमात पिना।
6 उपिं तसकं बांलाःगु झ्वःलाक वनाच्वंगु सिमातय्गु निंतिं व ख्वःसिँया निंतिं लः बीत जिं ततःधंगु पुखूत दय्का।
7 जिं दास-दासीत न्याना, अले जिगु थः हे छेँ बूपिं दास-दासीत नं दु। यरूशलेमय् जि स्वयाः न्हापा दुपिं सुयाके नं जिके स्वयाः अप्वः सा द्वहं व फैच्वलय्तय् बथां मदु।
8 जिं थःगु निंतिं लुँ व वहः वा जुजुत व देश देशपाखें धन-सम्पत्ति मुंका। जिं थःत न्ह्याइपुकेत म्ये हालीपिं मिसा व मिजंपिं अले मनूया नुगःयात लय्ताय्केत यक्व कलाःतय्त मुंका।
9 यरूशलेमय् जि न्हापायापिं मनूत स्वयाः तसकं तःधंम्ह जुल। जिं थःके दुगु बुद्धि न्ह्याबलें थःके हे तया।
10 जिगु मिखां लोभं चाय्कूगु फुक्क जिं कया।
फुक्क कथंयागु मोजमज्जा यायेगु जिं मत्वःता।
जिं हिचःति हाय्काः यानागु फुक्क ज्याखं जिगु नुगः लय्ताल।
अले थ्व जिं हिचःति हाय्काः यानागु फुक्क ज्याया लिच्वः खः।
11 अनंलि जिगु ल्हातं यानागु फुक्क ज्याया बारे जिं बिचाः याना,
जिं गुलि दुःखसिया उपिं ज्यात यानागु खः।
थुपिं फुक्कया छुं अर्थ मदु,
थ्व ला फय्यात लिइगु थें जक खः।
थ्व संसारय् छुं नं फाइदा मदु।
बुद्धि व मूर्खता सितिं वं
12 अले जिं बुद्धि, वँय्सू
व मूर्खता धयागु छु खः धकाः सीकेगु निंतिं उकिया बारे बिचाः याना।
जुजुं न्हापा हे याना वयाच्वंगु ज्या स्वयाः
लिपा वइम्हं मेगु छु हे अप्वः याये फइ?
13 जिं थ्व खनागु दु, गथे खिउँगु स्वयाः तुयुजः तसकं बांलाः,
अथे हे मूर्खता स्वयाः बुद्धि हे बांला।
14 बुद्धि दुम्ह मनूया मिखा वया छेनय् दइ,
तर मूर्खम्ह धाःसा खिउँथाय् जुइ।
तर जिं खनागु दु थुपिं निम्हय्सित नं
छगू हे दशा वइतिनि।
15 अनंलि जिं थःगु मनय् बिचाः याना,
“मूर्खम्हय्सिगु दशा जिके नं वइतिनि।
जि बुद्धि दुम्ह जुयाः छु फाइदा जुल?”
अले जिं थःगु मनय् बिचाः याना,
“थ्व नं सितिं वंगु खँ खः।”
16 छाय्धाःसा मूर्खम्ह मनूयात थें बुद्धि दुम्ह मनूयात नं ताःई तक लुमंका तइ मखु।
वइगु दिंनय् निम्हय्सित नं ल्वःमंकाछ्वइ।
छाय्धाःसा मूर्खम्ह थें बुद्धि दुम्ह नं सी हे मानि।
थाकुगु ज्या यायेगु नं सितिं वं
17 अथे जुयाः जिं थःगु जीवनयात घृणा याना, छाय्धाःसा थ्व संसारय् ज्या यायेगु तसकं थाकुगु खँ खः। थ्व फुक्कया छुं अर्थ मदु, थ्व फय्यात लिइगु थें जक खः।
18 थ्व संसारय् जिं तसकं दुःखसिया यानागु फुक्क ज्यायात जिं घृणा याना, छाय्धाःसा उपिं फुक्कं दुःखसिया यानागु ज्या छन्हु जिगु लिपा वइम्हय्सिगु निंतिं त्वःता हे वनेमानि।
19 अले व बुद्धि दुम्ह ला कि मूर्खम्ह धकाः सुनां स्यू? अय्नं जिं थ्व संसारय् दुःखसिया यानागु फुक्क ज्या वयागु हे अधीनय् दु, गुकिया निंतिं जिं थःगु फुक्क बल व सीप छ्यलागु दु। थ्व सितिं वंगु खँ खः।
20 अथे जुयाः थ्व संसारय् यानागु फुक्क थाकुगु ज्यायात लुमंकाः जि निराश जुयागु दु।
21 छाय्धाःसा बुद्धि, ज्ञान व खुबीं सुं मनुखं हिचःति हाय्काः याःगु फुक्क ज्या सुं छम्हय्सित त्वःता हे वनेमानि, गुम्हय्सिनं उकिया निंतिं थाकुगु ज्या याःगु हे मदु। थ्व नं सितिं वंगु खँ खः। अले वयागु निंतिं थ्व तःधंगु संकट हे खः।
22 थ्व संसारय् थम्हं याःगु फुक्क थाकुगु ज्यां व धन्दा कयाः हिचःति हाय्काः याःगु फुक्क ज्यां मनूतय्त छु दतलय्?
23 वयागु फुक्क दिनया ज्या पीर व दुःख जक खः। चान्हय् नं वयागु मनय् शान्ति दइ मखु। थ्व सितिं वंगु खँ खः।
24 मनुखं नयेगु त्वनेगु व थःगु थाकुगु ज्यां लुधंकिगु स्वयाः मेगु बांलाःगु छु हे याये फइ धकाः। थ्व नं जिं परमेश्वरया ल्हातं वःगु खना।
25 छाय्धाःसा वय्कलं मबीकं सुनां नयेत्वने व आनन्द काये खनी धकाः?
26 परमेश्वरयात लय्ताय्कीम्ह मनूयात वय्कलं बुद्धि, ज्ञान व आनन्द बियादी। पापीतय्त धाःसा वय्कलं परमेश्वरयात लय्ताय्कीपिं मनूतय्गु निंतिं धन-सम्पत्ति मुंकेगु ज्या बियादी। थ्व नं सितिं वंगु अले फय्यात लिइगु थें जक खः।