26
पवित्र पाल त्वपुइगु इलां
1 “छं झिपाः भिंगु वँचुगु प्याजी व ह्याउँगु रंगयागु सूती कापःयागु पवित्र पाल त्वपुइगु इलां दय्कि। ज्या सःम्ह शिल्पकारयात कापतय् भिंगु भिंगु कां करूबया बुत्ता भरय् याकेब्यु।
2 छपाः छपाः कापः १२ मिटर हाकः व २ मिटर ब्या दुगु जुइमाः। फुक्क कापः अपाय्कू हे जुइमाः।
3 न्याकू कापःयात स्वाना छकू हे या। अले मेगु न्याकू कापःयात नं अथे हे या।
4 न्हापां स्वाःगु कापःया सिथय् वँचुगु कापःयागु स्वःतिपाँय् दय्कि। अथे हे लिपाः स्वाःगु कापःया सिथय् सिथय् नं वँचुगु कापःयागु स्वःतिपाँय् दय्कि।
5 अले न्हापां स्वाःगु कापःया सिथय् नेय्गू स्वःतिपाँय् अथे हे लिपा स्वाःगु कापःया सिथय् नं नेय्गू स्वःतिपाँय् दय्कि। स्वःतिपाँय् चुलिंचू लाःगु जुइमाः।
6 अनंलि लुँयागु अंकुसि दय्काः थुपिं अंकुसिं निकू कापःयात छकू यानाः स्वानाब्यु। थुकथं निकू कापः छकू जुइ।
7 “अनंलि थ्व कापःया इलांयात त्वपुयेत च्वलय्चिगु सँयागु झिंछकू कापः दय्कि।
8 छपाः छपाः कापः १३ मिटर हाकः व २ मिटर ब्या दुगु जुइमाः। फुक्क कापः अपाय्कू हे जुइमाः।
9 न्याकू कापःयात स्वाना छकू या, अले मेगु खुकू कापःयात स्वाना छकू या। खुकूगु कापःयात धाःसा पालया न्ह्यःनें भचा लथ्या।
10 अले न्हापां स्वाःगु कापःया सिथय् नेय्गू स्वःतिपाँय् दय्कि, अथे हे लिपा स्वाःगु कापःया सिथय् नं नेय्गू स्वःतिपाँय् तयाब्यु।
11 अनंलि कँय्यागु नेय्गू अंकुसि दय्काः स्वःतिपाँय्लय् तयाः निकू कापःयात छकू हे यानाः स्वानाब्यु।
12-13 पवित्र पाल त्वपुइबलय् इलांया निगूगु तँ पच्छिमपाखें छगू मिटर ति, दच्छिन व उत्तरपाखें धाःसा बच्छि मिटर क्वखायेमाः।
14 थ्व हे इलांया निगूगु तँया द्यःने हानं नितँ तयेमाः। छगू ह्याउँगु रंग छिनातःगु फैया छेंगूयागु व मेगु डल्फिनया छेंगूयागु।
पवित्र पालया सिँपौ
15 “पवित्र पालया इलां दिकेत खयःसिँया सिँपौ धंस्वाकाः दय्कि।
16 फुक्क सिँपौ ४ मिटर हाकः व ६६ से.मि. ब्या दुगु जुइमाः।
17 फुक्क सिँपतिइ निगः निगः चूल तानाः स्वानातयेमाः। पवित्र पालया फुक्क सिँपौत थुकथं हे दय्केमाः।
18 पवित्र पालया दच्छिनपाखे तयेत निइपौ सिँपौ दय्कि।
19 निइपौ सिँपौया तःलय् वहःयागु पिइगू लिधंसा दय्कि। फुक्क सिँपौया तःलय् निगू निगू लिधंसा।
20 पवित्र पालया उत्तरपाखे तयेत निइपौ सिँपौ दय्कि।
21 अले निइपौ सिँपौया तःलय् वहःयागु पिइगू लिधंसा दय्कि। फुक्क सिँपौया तःलय् निगू निगू लिधंसा।
22 पवित्र पाल ल्युने पच्छिमपाखे तयेत खुपौ सिँपौ दय्कि।
23 अले ल्यूनेया निगू कुन्चाया निंतिं निइपौ सिँपौ दय्कि।
24 थुपिं निपतिं च्वंनिसें क्वथ्यंक देतनातःगु जुइमाः।
25 थुकथं अन फुक्कं यानाः च्यापौ सिपौँ दयेमाः। अले छपौ सिँपौया तःलय् निगू निगू यानाः झिंखुगू वहःयागु लिधंसा दयेमाः।
26 “छं खयःसिँयागु झिंन्यागू खगः दय्कि अर्थात दच्छिनपाखे न्यागू खगः,
27 उत्तरपाखे न्यागू खगः व पच्छिमपाखे न्यागू खगः।
28 सिँपौतय् दथुइ दुगु खगः धाःसा छगू कुनं मेगु कुनय् तक थ्यंगु छगू हे खगः जुइमाः।
29 अले सिँपौयात लुं हिनाब्यु। खगः दिकेगु चाःचात नं लुं हिनाब्यु। खगःयात नं लुं हिनाब्यु।
30 “जिं छन्त गुँच्वकाय् क्यनागु नमूनाकथं पवित्र पाल दय्कि।
महा-पवित्रगु थाय्या पर्दा
31 “अले वँचुगु, प्याजीगु व ह्याउँगु भिंगु सूती कापःयागु पर्दा दय्कि। उकी ज्या सःम्ह शिल्पकारयात भिंगु कां करूबया बुत्ता भरय् याकेब्यु।
32 उकियात वहःयागु प्यंगू लिधंसाया द्यःने च्वंगु लुं हिनातःगु पर्दा खयः सिमायागु प्यंगः थामय् अंकुसि काकाः यख्खानाब्यु।
33 थथे अंकुसि काकाः पर्दा यख्खाये धुंकाः उकिया ल्युने बाचाया सनू ति। व पर्दानं महा-पवित्र थाय्यात पवित्र थासं अलग्ग तयाबी।
34 “महा-पवित्रगु थासय् बाचाया सनूया द्यःने प्रायश्चितया कृपा-आसन तयाब्यु।
35 अले पर्दा पिने पवित्र थाय्या उत्तरपाखे तेबिल ति, अथे हे पवित्र थाय्या दच्छिनपाखे तेबिलया चुलिंचू त्वाःदेवा ति।
पवित्र पालया लुखायागु पर्दा
36 “पालया लुखाय् तयेत वँचुगु, प्याजीगु व ह्याउँगु भिंगु सूती कापःयागु बुत्ता भरय् यानातःगु पर्दा दय्कि।
37 थ्व पर्दाया निंतिं खयःसिँयागु न्यागः थां दय्कि। उकियात लुं हिनाब्यु। उकिया अंकुसि लुँयागु जुइमाः। अले न्यागः थांया निंतिं कँय्यागु न्यागू लिधंसा दय्कि।”