29
पुजाहारीतय्गु अभिषेक
लेवी ८:१-३६
1 “हारून व वया काय्पिन्त जिगु सेवा यायेत पलिस्था यायेबलय् छं यायेमाःगु ज्या थ्व हे खः, छम्ह खू मदुम्ह द्वहंचा व निम्ह खू मदुपिं भ्याःचा हजि।
2 सोडा मतःगु भिंगु छुचुं कयाः चिकं ल्वाकछ्यानातःगु मरि व चिकनं बुलातःगु सालुगु मरि दय्कि।
3 थ्व मरि छगः दालाचाय् तयाः द्वहंचा व निम्हं भ्याःचानापं हजि।
4 अनंलि हारून व वया काय्पिन्त नापलायेगु पालया ध्वाखा लिक्क हयाः म्वःल्हुकि।
5 वसः हयाः हारूनयात जामालं, पुजाहारीया लं, एपोद व छातिपाता फिकाः बांलाक थानातःगु जँनी एपोदया द्यःने चिनाब्यु।
6 अले वयागु छेनय् बेतालि चिनाः बेतालिया न्ह्यःने लुँ बाला तयाब्यु।
7 अनं लिपा अभिषेक याइगु चिकं कयाः वयागु छेनय् प्वंका अभिषेक या।
8 अले वया काय्पिन्त हयाः इमित जामालं फिकाब्यु।
9 अले जँनी चिकाः इमित बेतालि हिनाब्यु। थुगु ज्यापाखें हारूनया सन्तानतय्सं पुजाहारीया सेवा न्ह्याबलें यायेमाः। थुकथं छं हारून व वया काय्पिन्त अभिषेक या।
10 “अनं लिपा व द्वहंचा नापलायेगु पालया ध्वाखाय् हजि, अले हारून व वया काय्पिन्सं द्वहंचाया छेनय् थथःगु ल्हाः तयेमाः।
11 अले व द्वहंचायात परमप्रभुया न्ह्यःने नापलायेगु पालया ध्वाखाय् बां ब्यु।
12 द्वहंचाया हि भतिचा थःगु पतिंचां कयाः वेदीया नेकुलिइ तिकाब्यु। ल्यं दुगु हि धाःसा वेदीया तःलय् प्वंकाब्यु।
13 अले छं आतापति भ्वरि त्वपुइगु फुक्क दाः, सेँ त्वपुइगु पिलि व दाःनापया निगलं जलासेँ कयाः वेदीइ छ्वय्की।
14 द्वहंचाया ला, छेंगू व सउ धाःसा छाउनी पिने मिइ छ्वय्काछ्व। व पापबलि खः।
15 “छं छम्ह भ्याःचा नं का, अले हारून व वया काय्पिन्सं चिधिकःम्ह भ्याःचायागु छेनय् थथःगु ल्हाः तयेमाः।
16 व भ्याःचायात स्यानाः वयागु हि वेदीया जःखः छ्वाकाब्यु।
17 व भ्याःचाया ला कुचा कुचा यानाः छ्यं अले आतापति भ्वरि व तुति लखं सिलाः ला कुचात व छ्यं नापं वेदीइ तयाब्यु।
18 भ्याःचाया म्ह छम्हं वेदीइ छ्वय्काछ्व। थ्व परमप्रभुया निंतिं विशेष देछा, नस्वाःगु होमबलि खः।
19 “छं मेम्ह छम्ह भ्याःचा का, अले हारून व वया काय्पिन्सं भ्याःचायागु छेनय् थथःगु ल्हाः तयेमाः।
20 वयात स्यानाः भतिचा हि कयाः हारून व वया काय्पिनिगु जव जव न्हाय्पंया ज्वालय्, जव जव ल्हाःया बुरा-पतिंचाय् व जव जव तुतिया बुरा-पतिंचाय् तिकाब्यु। अले हि वेदीया जःखः छ्वाकाब्यु।
21 अले वेदीइ च्वंगु हि व अभिषेकया भतिचा चिकं कयाः हारून व वया वसतय् अले वया काय्पिं व इमिगु वसतय् नं छ्वाकाब्यु। थथे हारून, वया काय्पिं व इमिगु वसः शुद्ध जुइ।
22 “छं भ्याःचायागु दाः, दाःखाःगु न्हिप्यं, आतापुति-भ्वरी त्वपुइगु फुक्क दाः, सेँ त्वपुइगु पिलि, दाः नापंया निगलं जलासेँ व जव खम्पा का। थ्व अभिषेकयाम्ह भ्याःचा खः।
23 परमप्रभुया न्ह्यःने दुगु दालां सोडा मतःगु छपा मरि, छगः ग्वारमरि व चिकनं बुलातःगु मरि कयाः
24 व फुक्कं हारून व वया काय्पिनिगु ल्हातय् तयाब्यु। अले परमप्रभुया न्ह्यःने संकाबीगु बलिकथं देछा।
25 अनंलि व फुक्कयात इमिगु ल्हातं कयाः परमप्रभुयात यःगु नस्वाःकथं वय्कःयात विशेष देछा, होमबलिया वेदीइ छ्वय्काब्यु। थ्व परमप्रभुयात मिं छाःगु बलि खः।
26 हारूनया अभिषेकयाम्ह भ्याःचायागु ह्याकुला कयाः परमप्रभुया न्ह्यःने संकि। थ्व छंगु हे ब्व जुइ।
27 “लिपतय् हारूनया अभिषेकयाम्ह भ्याःचाया ह्याकुला व खम्पा कयाः परमप्रभुया न्ह्यःने संकाबीगु बलिकथं संकि, थ्व छिमिगु हे ब्व जुइ।
28 अले इस्राएलयापिं मनूतय्सं थ्व ब्वःयात हारून व वया काय्पिन्त बी। इस्राएलयापिं मनूतय्सं परमप्रभुयात मेलबलि छाइबलय् थ्व ब्व न्ह्याबलें पुजाहारीतय्गु जुइ। थ्व ब्व पुजाहारीतय्त बीबलय् परमप्रभुयात ब्यूगु थें हे जुइ।
29-30 हारून सी धुंकाः वयागु पुजाहारीया वसः वया लिपा पुजाहारी जुइम्ह वया सन्तानयात बीमाः। अले अभिषेकया ज्याझ्वलय् न्हय्न्हु तक वं व वसः फिनाः पवित्र पालय् ज्या यानाः नापलायेगु पालय् च्वनेमाः।
31 “अले अभिषेक यायेत हःम्ह भ्याःचायागु ला कयाः चुकय् छथाय् दय्कि।
32 इमिसं व भ्याःचायागु ला व दालाय् दुगु मरि नापलायेगु पालया दुने ध्वाखाया लिक्क च्वनाः नयेमाः।
33 इमिसं पलिस्था यायेत व प्रायश्चित यायेत देछाःगु इमिसं नये ज्यू। व पवित्र जूगुलिं मेपिन्सं नये मज्यू।
34 अभिषेक यायेत हःम्ह भ्याःचायागु ला व मरि छुं सुथय् तक ल्यन धाःसा व ल्यं दुगु मिइ छ्वय्काछ्व। व नये मज्यू छाय्धाःसा व पवित्र खः।
35 “न्हय्न्हु तक जिं छन्त बियागु फुक्कं आज्ञा कथं हारून व वया काय्पिन्त पलिस्था या।
36 छं न्हियान्हिथं प्रायश्चित यायेत पापबलियाम्ह द्वहंचा बां बीमाः। थुकिया हि कयाः वेदीयात शुद्ध या, अले वेदीयात पवित्र यायेत जैतूनया चिकनं अभिषेक या।
37 न्हय्न्हु तक छं वेदीया निंतिं प्रायश्चित यानाः उकिं व शुद्ध जुइ। अले वेदी तच्वकं पवित्र जुइ। व उकियात थ्यूगु न्ह्यागु नं पवित्र जुइ।
न्हियान्हिथं बां बीगु
लेवी ६:८-१३; गन्ती २८:१-८
38 “अले छं वेदीइ न्हियान्हिथं मदिक्क छायेमाःगु खँ थुपिं हे खः – दच्छि दुपिं निम्ह चिधिकःम्ह भ्याःचात।
39 छम्ह सुथय् अले मेम्ह सन्ध्याकाः इलय् छा।
40 छम्ह चिधिकःम्ह भ्याःचानापं भिंगु छगू हीनया प्यब्वय् छब्व जैतूनया चिकनय् न्हायातःगु एपाया झिब्वय् छब्व भिंगु छुचुं अले त्वँसाबलिया निंतिं छगू हीनया प्यब्वय् छब्व दाखमद्य छा।
41 मेम्ह चिधिकःम्ह भ्याःचा सन्ध्याकाः इलय् छा। सुथय् थें अन्नबलि व त्वँसाबलि नापं छायेमाः। थ्व परमप्रभुया निंतिं नस्वाःगु विशेष देछा जुइ।
42 “छिमि पुस्तां पुस्ता तक नापलायेगु पालया ध्वाखाया लिक्क परमप्रभुया न्ह्यःने मदिक्क होमबलि छाना च्वनेमाः। नापलायेगु पालय् जि छनापं खँ ल्हायेत नापलाः वये।
43 इस्राएलीत नापं जि व हे थासय् नापला वये। अले व थाय् जिगु महिमां पवित्र जुइ।
44 “थुकथं जिं नापलायेगु पालयात व वेदीयात पवित्र याये। अले हारून व वया काय्पिन्त जिगु निंतिं पुजाहारी जुयाः सेवा याकेत अभिषेक याये।
45 जि इस्राएलीतय्गु दथुइ बाय् च्वने, अले जि इमि परमेश्वर जुइ।
46 जि इमि दथुइ बाय् च्वनेत इमित मिश्र देशं पितहयाम्ह परमप्रभु इमि परमेश्वर खः धकाः इमिसं सी। जि परमप्रभु इमि परमेश्वर खः।”