38
होमबलिया वेदी
1 इमिसं खयःसिँयागु २.२ मि. हाकः २.२ मि. ब्या व १.३ मि. तःजाःगु छगू प्यकुंलाःगु वेदी दय्कल।
2 उकिया प्यकुनय् छपु छपु नेकू दय्कल। फुक्क नेकू छस्वा जुयाच्वंगु जुल। वेदीयात कँय्नं हिनाबिल।
3 वेदीया नउ तयेगु थल, नउ तुइगु चतं, बाता, ला लिकायेगु नतू व मिथल दय्कल। थुपिं फुक्क कँय्यागु जुल।
4 वेदीया सिइ तयेत उकिया दथुइ तक थ्यनिगु कँय्यागु चालिंचा दय्कल।
5 न्वःत दुछ्वयेत उकिया प्यखें कँय्यागु प्यचाः चाः दय्कल।
6 वेदीया निंतिं खयःसिँयागु न्वःत दय्काः कँय्नं हिनाबिल।
7 वेदी क्वबीत निखेंया चालय् न्वः दुछ्वत। वेदी सिँपौयागु व दथुइ गावंक दय्कल।
ल्हाः सिलेगु बाता
8 बजलेलं नापलायेगु पालया ध्वाखाय् ग्वाहालि याइपिं मिसातय्सं ब्यूगु न्हाय्कनं कँय्यागु ल्हाः सिलेगु बाता व उकियागु लिधंसा दय्कल।
नापलायेगु पालया चुक
9 इमिसं पवित्र पालया प्यखेरं ख्वातुगु कापतं ग्वयाः चुक दय्कल। उकिया दच्छिन ब्व ४४ मिटर हाकः दुगु जुल। थुपिं ख्वातुगु कापः भिंगु सुति कां दय्कूगु खः।
10 उकियागु निंतिं निइगू कँय्यागु लिधंसाय् निइगः हे कँय्यागु थां दय्कल। थांतय्गु अंकुसि व डण्डी धाःसा वहःयागु दु।
11 उत्तरपाखें नं इमिसं अथे हे यानाः कापतं ग्वल। अले उकियागु थांत निइगः व लिधंसा नं कँय्यागु हे निइगः दय्कल। अंकुसि व डण्डी धाःसा वहःयागु जुल।
12 पच्छिम पाखेयागु ख्वातुगु कापः २२ मिटर ताहाकः। उकिया झिगः थां व झिगू लिधंसा दु। अंकुसि व डण्डी धाःसा वहःयागु जुल।
13 चुकया पुर्ब वा सूर्य लुइगु पाखेया ब्या २२ मिटर दु।
14-15 चुकया ध्वाखाया निखें ६.५ मिटर हाकःगु ख्वातुगु कापः दय्काः उकिया निंतिं स्वंगः स्वंगः थां व लिधंसा दय्कल।
16 चुकया प्यखें पाखेयागु ख्वातुगु कापः भिंगु सुति कां दय्कूगु खः।
17 चुकया थांतय्गु लिधंसा कँय्यागु जुल। थुकथं चुकया फुक्क थांत वहःयागु डण्डीं स्वानाः च्वंगु दु।
18 चुकया ध्वाखाया पर्दा वँचुगु, प्याजीगु, ह्याउँगु भिंगु सूती कापः बुत्ता भरय् यानातःगु ९ मिटर हाकःगु जुल। व चुकया प्यखेरं ग्वयातःगु ख्वातुगु कापः २ मिटर तःजा।
19 थुकियात प्यंगः थां व प्यंगू लिधंसा दय्कल। डण्डी व अंकुसि वहःयागु अले थांया च्वय्नं वहलं भुनातःगु दु।
20 पालया कि व चुकया कि कँय्यागु जुल।
नापलायेगु पालय् छ्यःगु लुँ, वहः व कँय्
21-23 बजलेलं वँचुगु, प्याजीगु व ह्याउँगु रंगयागु सुति कापतय् बुत्ता भरय् यायेसःम्ह व थायेसःम्ह ओहोलीआबयात नापं कयाः ज्या सिधय्कल। इपिं निम्ह जानाः परमप्रभुं मोशापाखें बियादीगु उजं पूवंकल। मोशां हारून पुजाहारीया काय् ईतामारयात नापलायेगु पालय् छ्यःगु लुँ, वहः व कँय्या ल्याःचा तयेगु जिम्मा बिल।
24 पवित्र पालया शेकेलकथं ज्याया निंतिं संकाबीगु बलिया लुँ पवित्र पालया शेकेलया ल्याःकथं द्वःछि किलोग्राम दु।
25 खलःया ल्याःखापिं मनूतय्गु देछाया वहः पवित्र पालया शेकेलया ल्याःकथं ३,५२० किलोग्राम दु।
26 ल्याःखापिं निइदँ व वस्वयाः च्वय्यापिं मिजं मनूत ६,०३,५५० म्ह दु। छम्ह छम्ह मनूपाखें पवित्र पालया शेकेलया ल्याःकथं बच्छि शेकेल काल।
27 थुकियागु मूं ३,४०० किलोग्राम वहः पवित्र पाल व पर्दाया लिधंसा दय्केत छ्य। इमिसं छगू छगू लिधंसाय् ३४ किलोग्राम वहः छ्यल।
28 अले ल्यं दुगु २० किलोग्राम वहलं थांतय्गु अंकुसित व डण्डी दय्कल। अले थांया च्वय् वहलं भुनाबिल।
29 देछायागु कँय् २,४२५ किलोग्राम दु।
30 वं उकिं नापलायेगु पालया ध्वाखाया लिधंसात अले होमबलिया वेदी, उकिया कँय्यागु चालिंचा व थलबल
31 अले चुकया प्यखेरं च्वंगु लिधंसात व चुकया ध्वाखाया लिधंसात अले नापलायेगु पालया चुकया प्यखेरंयागु नकि नं दय्कल।