थेसलोनिकेय् च्वंगु मण्डलीयात
पावलं च्वःगु न्हापांगु पौ
म्हसीका
थेसलोनिके रोमी साम्राज्यया छगू देश माकेडोनियाया राजधानी खः। फिलिप्पी शहरं वयाः पावलं थन नं मण्डली दय्का थकूगु खः।
यक्व हे यहूदी धर्म मानय् याये मास्ति वय्का च्वंपिं यहूदीमखुपिन्सं नं पावलयागु भिंगु खँ न्यनाः विश्वास याःगुलिं यहूदीतय्सं नुगः मुइकाः वयागु विरोध याना जुल। अय्जूगुलिं पावल अनं बेरिया धाःगु शहरय् वन। अनं लिपा व कोरिन्थय् वन। अन वं व नाप ज्या याइम्ह तिमोथीपाखें थेसलोनिकेय् च्वंगु मण्डलीयागु खँ सीकल।
पावलं थेसलोनिकेय् च्वंपिन्त च्वःगु थ्व न्हापांगु पौ खः। अन च्वंपिं विश्वासीतय्सं क्वात्तुक विश्वास यानाच्वंगु व थःथवय् माया यानाच्वंगु खँ न्यनाः तसकं लय्तायाः पावलं थ्व पौ च्वःगु खः। वं इमित अज्ज नं विश्वास या, साहस का, अले थःगु चालचलन नं अथे हे याना च्वँ धकाः अर्ती बियाच्वंगु दु। अले इमिसं न्यनाहःगु प्रभु झाइबलय्यागु खँयागु लिसः नं बियातःगु दु। प्रभु हानं झाइतिनि धयागु खँय् आशा यायेगु मत्वःतुसे थःपिनिगु ज्या बांलाक याना च्वँ धकाः नं पावलं अर्ती बियातःगु दु। पावल स्वंगू हप्ताति जक थेसलोनिकेय् च्वंगु खः।
धलः पौ
न्ह्यखँ ...............................................१:१
सुभाय् व प्रार्थना ................................१:२-३:१३
विश्वासीतय्गु चालचलनया बारे अर्ती ...४:१-१२
ख्रीष्ट झाइतिनि धयागु खँ ..................४:१३-५:११
दक्वसिबय् लिपांगु अर्ती .....................५:१२-२२
क्वचाय्कूगु .......................................५:२३-२८
१ थेसलोनिकी
1
पावलपाखें ज्वजलपा
1 थेसलोनिकेय् च्वंगु मण्डलीयापिं परमेश्वर बाः व प्रभु येशू ख्रीष्टया थः मनूतय्त पावल, सिलास व तिमोथीयापाखें ज्वजलपा। छिमित दया माया व शान्ति दयेमा।
थेसलोनिकेय् च्वंपिनिगु विश्वास
2 प्रार्थना यायेबलय् जिमिसं न्ह्याबलें छिमित लुमंकाः परमेश्वरयात धन्यवाद बियाच्वनागु दु।
3 परमेश्वर बाःया न्ह्यःने छिमिसं विश्वास याःथें ज्या यानाच्वंगु, थःथवय् माया यानाः अज्ज अप्वः मन तयाः प्रभुया ज्या यानाच्वंगु व आशा मत्वःतुसे प्रभु येशू ख्रीष्टयात क्वात्तुक विश्वास यानाच्वंगु खँ जिमिसं लुमंकाच्वनागु दु।
4 परमेश्वरयात यःपिं दाजुकिजापिं, वय्कलं छिमित ल्ययादीगु खः धकाः जिमिसं स्यू।
5 छाय्धाःसा जिमिसं छिमित न्यंकागु वचन म्हुतुं जक न्यंकागु मखु, बरु शक्ति व पवित्र आत्मापाखें व दुनुगलंनिसें हे न्यंकागु खः। छिपिं नाप च्वनाबलय् जिपिं गज्याःपिं खः धकाः ला छिमिसं सि हे सिल।
6 छिमिसं उलिमछि दुःखकष्ट जुल नं पवित्र आत्मां यानाः भिंगु खँ न्यनाः विश्वास यात। थुकथं छिपिं जिमिसं व प्रभु यानादीथें याइपिं जुल।
7 अथेजूगुलिं छिपिं माकेडोनिया व अखैयाय् च्वंपिं विश्वासीतय्गु निंतिं नमुना थें जुल।
8 छिमिसं प्रभुयागु वचन माकेडोनियाय् व अखैयाय् जक न्यंकूगु मखु, बरु छिमिसं परमेश्वरयात विश्वास याःगु खँ नापं न्यंकभनं बय्बय् जूगु दु। थ्व खँय् जिमिसं छुं हे धया च्वने माःगु मदु।
9 जिपिं छिमिथाय् वयाबलय् छिमिसं जिमित गुकथं लसकुस यात अले धात्थेंयाम्ह व म्वाःम्ह परमेश्वरयात सेवा यायेत छिपिं गुकथं मूर्ति पुजा यायेगु त्वःताः परमेश्वरपाखे फहिला वल धयागु खँ फुक्कसिनं धयाच्वंगु दु।
10 छिपिं परमेश्वरया काय् स्वर्गं झाइतिनि धकाः लँ स्वयाच्वंगु दु हं। वय्कः परमेश्वरं सीम्हं म्वाका दीम्ह येशू खः। न्याय याइबलय् वय्कलं झीत बचय् यानादी।