थेसलोनिकेय् च्वंगु मण्डलीयात पावलं च्वःगु निगूगु पौ
म्हसीका
थेसलोनिकेय् च्वंगु मण्डलीयापिन्सं ख्रीष्ट हानं झाइतिनिगु खँ बांलाक थुइका काये मफुनि। उकिं पावलं थ्व निगूगु पौलय् ख्रीष्ट हानं झाये धुंकल धकाः स्यनेकने याना जूपिं फताहा गुरुतय्गु खँ मखुगु खः धकाः ध्वाथुइकातःगु दु। ख्रीष्ट हानं वये न्ह्यः संसारय् मभिंपिं व मभिंगु ज्याखँ अप्वयावइ, अले “नाश जुइमाःम्ह पापयाम्ह मनू” खनेदय्कः वइ। वं ख्रीष्टयागु विरोध याना जुइ।
पावलं थेसलोनिकेय् च्वंपिं विश्वासीतय्त न्ह्यागु दुःखकष्ट वःसां विश्वासय् बल्लाना च्वनेगु व पावल अले व नाप ज्या याइपिन्सं थें थथःम्हं ज्या यानाः नयेगु अर्ती नं बियातःगु दु।
धलः पौ
न्ह्यखँ १:१-२
प्रार्थना व च्वछाःगु १:३-१२
ख्रीष्ट हानं झाइगु खँ २:१-१७
विश्वासीतय्गु चालचलनया बारे अर्ती ३:१-१५
क्वचाय्कूगु ३:१६-१८
२ थेसलोनिकी
1
पावलपाखें ज्वजलपा
1 झी परमेश्वर बाः व प्रभु येशू ख्रीष्टयागु थेसलोनिकेय् च्वंगु मण्डलीयात पावल, सिलास व तिमोथीपाखें ज्वजलपा।
2 परमेश्वर बाः व प्रभु येशू ख्रीष्टया दया माया व शान्ति छिमिके दयेमा।
ख्रीष्ट झायाः न्याय यानादी
3 छिमिगु विश्वास यक्व अप्वयावनाच्वंगु दु, अले छिमिसं थःथवय् माया यायेगु नं अप्वय्का हयाच्वंगु दु। थुकिया निंतिं परमेश्वरयात सुभाय् मब्यूसे मगाः।
4 छिमिसं उलिमछि दुःखकष्ट सिया च्वनेमालं नं क्वात्तुक विश्वास यानाः सह यानाच्वंगु खँ जिमिसं थाय् थासय् परमेश्वरयागु मण्डलीइ च्वंपिन्त छ्यं धस्वाकाः कनेफु।
5 परमेश्वरं ख्वाः स्वयाः न्याय यानादी मखु धकाः ला थुकिं हे सीदत, छाय्धाःसा छिमिसं दुःखकष्ट सियाच्वंगुलिं हे छिपिं वय्कःयागु राज्यय् दुहां वनेत ल्वःपिं जुल।
6 छिमित दुःखकष्ट ब्यूपिन्त वय्कलं दुःखकष्ट बियादी। परमेश्वर न्याय यानादीम्ह खः।
7 दुःखकष्ट सियाच्वंपिं छिमित व जिमित नं वय्कलं दुःखकष्ट मदय्काबी। प्रभु येशू ख्रीष्ट वय्कःया तसकं बल्लाःपिं स्वर्गदूतत नाप स्वर्गं झायादीबलय् वय्कलं थथे यानादी।
8 वय्कलं च्यानाच्वंगु मित्याः ज्वना झायाः परमेश्वरयात म्हमस्यूपिन्त व झी प्रभु येशू ख्रीष्टयागु भिंगु खँ मन्यंपिन्त सजाँय बियादी।
9 थुपिं प्रभुयागु तसकं बल्लाःगु जलं तापाक व प्रभुयागु ख्वाः तकं स्वये मखंक च्वनाच्वने माली। अले थुपिं सदांयात नाश जुयावनी।
10 उबलय् वय्कः थः मनूतय्पाखें महिमा कायेत व विश्वास याइपिं सकसितं अजू चाय्केत झाइ छाय्धाःसा छिमिसं जिमिगु साक्षीयात विश्वास यात।
11 अय्जूगुलिं हे छिपिं झी परमेश्वरं सःतादी थें जुयाच्वने फयेमा, वय्कःयागु शक्तिं छिमिसं मतिइ तक्व भिंगु खँ व विश्वासयागु ज्या पूवंके फयेमा धकाः जिमिसं प्रार्थना यानाच्वनागु दु।
12 थथे छिमिगुपाखें झी प्रभु येशूयागु नां तःधं जुइ, अथे हे झी परमेश्वर व प्रभु येशू ख्रीष्टयागु दया मायां यानाः छिपिं नं तःधं जुइ।