यशैयाया सफू
म्हसीका
ई.पू. च्यागूगु शताब्दीया लिपांगु इलय् यरूशलेमय् च्वनाच्वंम्ह तःधंम्ह अगमवक्ता यशैयां थ्व सफू च्वःगु खः।
थ्व सफूयात स्वंगूगु भागय् ब्वथले फु।
१ निसें ३९ अध्याय तक– दच्छिनया यहूदाया राज्ययात उत्तरय् च्वंगु राज्य अश्शूरपाखें ख्याच्वः ब्यूगु ईया बयान दु। यशैयां उबलय् यहूदीतय्त अश्शूर राज्यया शक्तिपाखें जक मखु तर थः जातितय्गु पाप व परमेश्वरया आज्ञा मानय् मयाःगुलिं व इमिगु अविश्वासपाखें नं प्राणया खतरा दुगु खन। थःगु वचनं व ज्यापाखें व अगमवक्तां मनूतय्त व इमि नायःतय्त धर्मी व न्यायपूर्ण जीवन हनेत इनाप यात। अले इमिसं परमेश्वरया आज्ञा मानय् मयात धाःसा भज्यंक नाश जुइ धकाः नं वं ख्याच्वः बिल। अय्नं यशैया अगमवक्तां दाऊदया छम्ह सन्तानं तःधंम्ह व भिंम्ह जुजु जुयाः इमित शासन याइतिनी, थ्व हे जुजुं सारा संसारय् शान्ति थापं यानादी धकाः नं अगमवाणी यात।
४० निसें ५५ अध्याय तक– अबलय् यहूदाया अप्वः मनूतय्त कैदी यानाः बेबिलोन देशय् यंकूगु खः। अले अन इपिं आशा मदय्क व क्वत्यकाः म्वानाच्वने माल। अय्नं व अगमवक्तां थथे धकाः घोषणा यात, परमेश्वरं थः प्रजायात छुत्कारा यानाः हाकनं इमिगु थःगु हे देश यरूशलेमय् लित ब्वनायंके त्यंगु दु। अले इमिसं अन न्हूगु जीवन हनेगु शुरु याइ। फुक्क जातितय्त इस्राएलीतपाखें आशिष दइ। परमप्रभुया दासया बारे विशेष यानाः ५२:१३ निसें ५३:१२ पदय् च्वयातःगु खँ पुलांगु नियमय् अप्वः छ्यलीगु खः।
५६ निसें ६६ अध्याय तक– थ्व स्वंगूगु भागय् अप्वः खँ यरूशलेमय् कैदं लिहांवःपिं मनूतय्गु बारे धयातःगु दु। उपिं मनूतय्सं परमेश्वरं इमित बी धकाः बाचा याःगु खँ पूवंकादी धयागु खँय् भरोसा यायेमाःगु खः। थ्व भागय् अप्वः यानाः धार्मिकता, न्यायनापं विश्रामबार मानय् यायेगु, बलि छायेगु, प्रार्थनाया बारे च्वयातःगु दु। अले थ्व भागय् लुमंके माःगु खँ पद ६१:१-२ खः, थुपिं पदया खँपाखें येशूं थःगु सेवाकाइ शुरु याये न्ह्यः थःत परमेश्वरं सःतादीगु खँ च्वयातःगु दु।
धलः पौ
ख्याच्वः व बचं १:१–१२:६
देशय् वइतिनीगु दण्डया बारे १३:१–२३:१८
संसारय् परमेश्वरया न्याय २४:१–२७:१३
मेगु ख्याच्वः व बचं २८:१–३५:१०
यहूदाया जुजु हिजकिया व अश्शूरीत ३६:१–३९:८
बचं व आशाया खँ ४०:१–५५:१३
हाकनं ख्याच्वः व बचं ५६:१–६६:२४
यशैया
ख्याच्वः व बाचा
1
यशै १:१–१२:६
1 यहूदाया जुजुपिं उज्जियाह, योताम, आहाज व हिजकियां शासन यानाच्वंबलय् आमोजया काय् यशैयां यहूदा व यरूशलेमया बारे खंगु दर्शन।
छगू जिराहा जाति
2 हे आकाश, न्यँ! हे पृथ्वी, बांलाक ध्यान बियाः न्यँ!
छाय्धाःसा परमप्रभुं थथे धयादीगु दु,
“जिं थःकाय् म्ह्याय्पिन्त
सुसाःकुसाः यानाः ब्वलंका,
अय्नं इपिं जिराहा जुयाः
जिगु विरोधय् विद्रोह यात।
3 द्वहंनं थः मालिकयात म्हस्यू,
अले गधानं थः थुवालं
नकिगु थल म्हस्यू,
अय्नं इस्राएलं जितः म्हमस्यू।
जि थः हे मनूतय्सं छुं हे मथू।”
4 धिक्कार पापी जाति!
दोषं क्वत्यकाच्वने माःपिं मनूत,
दुष्ट ज्या यानाजुइपिनि मस्त,
मभिंगु ज्या यानाजुइपिनि सन्तान,
इमिसं परमप्रभुयात ल्वमंकूगु दु,
इमिसं इस्राएलया पवित्र परमेश्वरयात
हेला याःगु दु
अले वय्कःपाखें फहिलावंगु दु।
5 छाय् छिमिसं अप्वः ल्हाः नयेमाःगु?
छाय् छिपिं विद्रोही जुयाच्वनागु?
छिमिगु छ्यं छगलं घालं जाःगु दु
अले नुगः दुःखं जाःगु दु।
6 पालिंनिसें छेनय् थ्यंक
घाः मजूगु थाय् हे मदु।
छंगु म्ह छम्हं घालं,
दागं व ख्वँतं जाःगु दु।
उकी सिलाः चिनाब्यूगु मदु
न चिकं तयाः नाइकाब्यूगु दु।
7 छिमिगु देय् झिजांमिजां जूगु दु।
छिमिगु शहरत मिं च्याःगु दु।
छिमिगु हे न्ह्यःने परदेशीतय्सं छिमिगु बुँ
लाकाकयाः नाश यानाब्यूगु दु।
8 बांलाःगु यरूशलेम दाखक्यबया बल्चा थें,
खर्बुजाया बुँया तःजाःगु बल्चा थें
अले चाकःछिं घेरय् यानातःगु शहर थें खः।
9 “दक्व शक्ति दुम्ह परमप्रभुं
झीत सन्तान ल्यंका मदीगु जूसा
सदोम व गमोरायागु गति जू थें तुं
झीगु नं अथे हे गति जुइगु खः।”
10 अय् सदोमया शासकत,
परमप्रभुया वचन न्यँ!
अय् गमोराया मनूत,
परमेश्वरया आज्ञा मानय् या!
परमप्रभुं छिमित छु धयादीगु दु
व बांलाक न्यँ!
11 परमप्रभुं थथे धयादी,
“छिमिसं छाःगु यक्व बलिदान
जिगु निंतिं छु ज्यालगय् जुल?”
जितः फैतय्गु होमबलि
व लहिनातःपिं ल्ह्वंपिं पशुतय् दाःया
होमबलि नं जितः मयः।
द्वहं, चीधिकःम्ह भ्याःचा व दुगुचाया हि
जितः माःगु मदु।
12 जितः आराधना यायेत वय्बलय्
उपिं फुक्कं हयेमाः धकाः छिमित सुनां धाल?
सुनां छिमित जिगु चुकय् न्हुत्तुन्हुयेत धाल?
13 ज्यालगय् मजूगु बलि जिथाय् हये मते।
छिमिसं च्याकूगु धुपाँय्
जिगु निंतिं घच्चाइपुसे च्वं।
छिमिसं मानय् यानावयाच्वंगु अमाइ
विश्रामबार व छिमिगु मभिंगु मुने ज्याया कारणं
जिं सह याये मफये धुंकल।
14 छिमिगु अमाइया दिं
व क्वःछिनातःगु नखःचखःयात
जिगु नुगलं तसकं हेला याये।
उपिं फुक्क जिगु निंतिं
क्वबी मफुगु कु जूगु दु।
15 छिमिसं प्रार्थनाय् ल्हाः ल्ह्वनीबलय्
जिं छिमित स्वये मखु।
छिमिसं न्ह्याक्व प्रार्थना याःसां
जिं न्यने मखु
छाय्धाःसा छिमिगु ल्हाः
हिया हिं जाःगु दु।
16 छिपिं थःम्हं थःत सिलाः शुद्ध या।
जिं खनागु पाप ज्या छिमिसं यायेगु त्वःताछ्व।
मभिंगु ज्याखँ त्वःति।
17 भिं याये सय्कि।
फुक्कसिगु निसाफ या,
क्वत्यय्का च्वनेमाःपिन्त ग्वाहालि या,
मांबौ मदुपिं मचातय्गु रक्षा या,
विधवा मिसाया
पंलिनाः नवानाब्यु।
18 परमप्रभुं थथे धयादी,
“थन वा,
झीपिंनापं च्वनाः
थःथवय् खँल्हाबल्हा याये।
छिमिगु पाप ह्याउँसे च्वंसां
उपिं च्वापु थें तुयुसे च्वंकाबी।
उपिं तच्वकं ह्याउँसे च्वंसां ऊन थें तुयुसे च्वनी।
19 छिमिसं जिगु आज्ञा मानय् याये यय्कल धाःसा
छिमिसं थ्व देशया भिंगु भिंगु नसा नयेखनी।
20 तर छिमिसं मानय् मयात
व जिगु विरोध यात धाःसा
छिमित तरवारं पालाः स्यानाछ्वइ।
परमप्रभुं हे थ्व खँ धाःगु खः।”
विश्वास यायेबहः मजूगु शहर
21 स्वःसा, विश्वास याये बहःजूगु शहर
आः गथे छम्ह वेश्या थें जुल!
न्याय व धार्मिकतां जाःगु शहर
तर आः स्याइपालिपिन्सं जाःगु दु!
22 अय् यरूशलेम,
छंगु वहः ज्यालगय् मजुइ धुंकल,
छंगु दाखमद्यय् लः
ल्वाकछ्याये धुंकल।
23 छिमि न्ह्यलुवाःत विद्रोही व खुँतय्
पासापिं जुइ धुंकूगु दु।
इमिसं न्ह्याबलें
कोस्यालि व घुस
नयेत माला जुइ।
न्याय जुइबलय् इमिसं
मांबौ मदुपिनिगु पँली मखु।
भाःत मदुपिनिगु मुद्दा
इमिथाय् थ्यनी मखु।
24 अथे जुयाः प्रभु,
दक्व शक्ति दुम्ह परमप्रभु,
इस्राएलया बल्लाःम्हय्सिनं धयादी,
“आहा! जिं जिमि शत्रुतय्त जिगु तं क्यने,
अले जिगु विरोध याःगुया बदला काये,
25 जिगु ल्हाः छिमिगुपाखे ल्ह्वने,
अले वहःयात नाय्काः यचूकु थें
जिं छिमिगु फुक्क अशुद्धपाखें
शुद्ध याये।
26 जिं छिमि न्यायकर्तातय्त न्हापा थें
अले छिमित सल्लाह बीपिन्त नं
दकलय् न्हापा थें हे लिफ्यानाहये।
अनंलि छन्त
‘धार्मिकताया शहर’
व ‘विश्वास याये बहःगु शहर’
धकाः धाइ।”
27 न्यायपाखें सियोन शहर बचय् जुइ
अले अन च्वंपिं मनूत
सुनां पश्चाताप याइ
इपिं फुक्क धार्मिकतां
बचय् जुइ।
28 तर विद्रोहीत व पापीत कुचा कुचा जुइ,
वय्कःयात त्वःतूपिं फुक्कं नाश जुइ।
29 थुकथं “छिमिसं पुजा यायेगु
स्वसिमाया सिमा प्यूगूलिं
व मूर्ति पुजा यायेगु
बगैँचात दय्कूगुलिं
छिपिं लाजय् लाये तिनि।
30 छिपिं हः सुकूगनावंगु स्वसिमा थें
अले लः मदुगु बगैँचा थें जुये तिनि।
31 तसकं बल्लाःपिं मनूत
सुका थें बमलाइ,
इमिसं न्ह्याःगु याःसां मिकुचा थें जक जुइ
निगुलिं छक्वलं भस्म जुइ,
मि स्याइम्ह सुं दइ मखु।”