19
मिश्रया विरोधय् अगमवाणी
1 मिश्रया बारे परमप्रभुया अगमवाणी–
स्व, परमप्रभु तसकं ब्वयावनीगु सुपाँचय् च्वनाः
याकनं हे मिश्रय् झायेत्यंगु दु।
वय्कःया न्ह्यःने मिश्रया मूर्तित थरथर खाइ,
अले मनूतय्गु हंसं थाय् त्वःति।
2 परमप्रभुं धयादी, “जिं मिश्रीतय्गु दथुइ थवंथः ल्वाकाबी।
इमि दाजुकिजाया विरोधय् दाजुकिजा ल्वाइ।
अले जःलाखःलाया विरोधय् जःलाखःला ल्वाइ।
शहर शहरतय् दथुइ ल्वापु यानाबी।
अले राज्य राज्यतय् दथुइ ल्वापु यानाबी।
3 मिश्रीतय् नुगः क्वतुनी
अले इमिसं दय्कूगु योजना जिं स्यंकाबी।
इमिसं द्यःतय्थाय्, तन्त्रमन्त्र याइपिन्थाय्
अले मभिंगु आत्माया ज्या याइपिन्थाय् वनाः सल्लाह काइ।
4 जिं मिश्रीतय्त छम्ह तसकं मभिंम्ह
शासकया ल्हातय् लःल्हानाबी।
छम्ह दयामाया मदुम्ह जुजुं इमित शासन याइ।”
प्रभु, दक्व शक्ति दुम्ह परमप्रभु न्ववानादीगु दु।
5 खुसिया लः सुनावनी।
अले नील खुसि बिस्तारं सुनावनाः गंगु बँ जुइ।
6 लः सुनावनाः धःत नवइ,
मिश्रया खुसिचात सुनावनाः गंगु बँ जुइ।
तिंकथि व सःखि सुकूचिनावनी।
7 अले नील खुसिया सिथय्
व क्वय् नील खुसि समुद्रनापं मिलय् जुइगु थाय् पिनातःगु फुक्क बालीत सुकूचिनावनी।
उपिं फुक्क फसं पुइकेयंकी अले अन उपिं छुं नं ल्यं दइ मखु।
8 न्या लाइपिं ख्वख्वं विलाप याइ,
इमिगु जाः व बल्छी ज्यालगय् जुइ मखु।
9 तुज्जिक का नीलिपिं निराश जुइ।
अले मलमलया कापः थाइपिं नं निराश जुइ।
10 कापःया ज्या याइपिनिगु ख्वाः खिउँसे च्वनी
अले ज्यामि ज्या याइपिनिगु नुगः कुतुंवनी।
11 सोअन शहरया हाकिमत तसकं मूर्खपिं खः।
मिश्रय् दक्वसिबय् बुद्धि दुपिन्सं मभिंगु सल्लाह बी।
छिमिसं गुकथं धायेफत फारोयात,
“जि बुद्धि दुम्ह मनूत मध्ये छम्ह खः,
तसकं पुलांपिं जुजुपिनि छम्ह चेला खः?”
12 छिमि बुद्धि दुपिं मनूत थौं गन वन?
मिश्र देशया विरोधय् दक्व शक्ति दुम्ह परमेश्वरया योजना छु दु धकाः
इमिसं छिमित क्यनाः थुइकाबीमा।
13 सोअनया हाकिमत मूर्ख जुइ धुंकल।
नोपया नायःतय्सं धोखा नयेधुंकल।
इपिं थः मनूतय् मू ल्वहं थें जुयाः
मिश्र देय्या मनूतय्त मखुगु लँय् यंकूगु दु।
14 परमप्रभुं इमित अलमल जुइगु आत्मा तयाः ब्यूगु दु।
अय्लाःगुलुत थःम्हं ल्ह्वःथाय् धेधेचुयाजू थें
इमिसं मिश्र देशया मनूतय्त थःपिन्सं यानागु ज्यां
अलमल यानातःगु दु।
15 मिश्र देशं छुं नं ज्या याये फइ मखु,
बाय् छ्यं वा न्हिप्यं, खजूरया कचा वा न्हाय्पं कथि।
मिश्रीतय्सं परमप्रभुया आराधना याःगु
16 व दिंखुन्हु मिश्रीत मिसात थें कमजोर जुइ। दक्व शक्ति दुम्ह परमप्रभुं इमित सजाँय बीत ल्हाः ल्ह्वनादीगु खनाः मिश्रीत तसकं ग्यानाः थरथर खाइ।
17 अले यहूदा देशं मिश्रीतय्के भय हयाबी। यहूदाया नां न्यंक्व फुक्कं ग्याइ, छाय्धाःसा दक्व शक्ति दुम्ह परमप्रभुं इमिगु विरोधय् ग्वसाः ग्वयादीगु दु।
18 व दिंखुन्हु मिश्र देशया न्यागू शहरं कनान देशया भाय् ल्हाइ, अले दक्व शक्ति दुम्ह परमप्रभुयाके भक्तिया पा फइ। उपिं मध्ये छगूया नां धाःसा सूर्यया शहर धाइ।
19 व दिंखुन्हु मिश्र देशया दथुइ परमप्रभुया निंतिं छगू वेदी दइ अले वयागु सिमानाय् परमप्रभुया निंतिं छगू ल्वहंया थां तइ।
20 मिश्र देशय् दक्व शक्ति दुम्ह परमप्रभुया निंतिं व छगू चिं व साक्षी जुइ। तच्वकं दुःख बीपिनिगु कारणं इमिसं परमप्रभुयात पुकारय् याइबलय् वय्कलं इमिगु निंतिं छम्ह मुक्तिदाता व छम्ह रक्षा याइम्ह छ्वयाहयादी, अले वय्कलं इमित छुत्कारा यानादी।
21 थुकथं परमप्रभु मिश्रीतय्थाय् खनेदय्कः झायादी, अले व दिंखुन्हु इमिसं परमप्रभुयात स्वीकार याइ। इमिसं बलित व अन्नबलिपाखें वय्कःयात आराधना याइ, अले इमिसं परमप्रभुया निंतिं भाकल यानाः व पूवंकी।
22 परमप्रभुं मिश्र देशयात महामारीपाखें कय्कादी। वय्कलं इमित दायादी अले इमित लाय्का नं दी। इपिं परमप्रभुपाखे फःहिला वइ। वय्कलं इमिगु प्रार्थना न्यनादी अले वय्कलं इमित लाय्कादी।
23 व दिंखुन्हु मिश्र देशंनिसें अश्शूर देश तक छगू मू लँ दइ। अश्शूरीत मिश्र देशय् व मिश्रीत अश्शूर देशय् वयेगु वनेगु याइ। मिश्रीत व अश्शूरीत छथाय् हे च्वनाः परमप्रभुया आराधना याइ।
24 व दिंखुन्हु मिश्र व अश्शूरनापं पृथ्वीइ आशिषया निंतिं इस्राएल धाःसा स्वंगूगु देश जुइ।
25 दक्व शक्ति दुम्ह परमप्रभुं इमित थथे धयाः आशिष बियादी, “मिश्र जिमि प्रजा, अश्शूर जिगु ल्हाःया ज्या अले इस्राएल जिगु सर्बय छिपिं धन्य खः।”