37
यरूशलेमया छुत्काराया भविष्यवाणी याःगु
२ राज १९:१-७
1 थ्व खँ न्यनेवं हिजकिया जुजुं नुगः मछिंकाः थःगु वसः खुत। अले भांग्रा हिनाः परमप्रभुया देगलय् वन।
2 वं दरबारया प्रशासक एल्याकीम, छ्यान्जे शेब्ना व मू मू पुजाहारीतय्त आमोजया काय् यशैया अगमवक्तायाथाय् छ्वल। उपिं सकसिनं भांग्रा हिनातःगु दु।
3 इमिसं वयात धाल, “हिजकिया जुजुं थथे धाःगु दु – थौं झीसं दुःख सीगु दिं खः। झीसं सजाँय फयाच्वनागु दु अले झीगु बेइज्जत जूगु दु! थ्व मचाबुइगु ई त्ययाः नं मचाबुइकेगु बल मदुगु थें खः।
4 अश्शूरयाम्ह जुजुं म्वाःम्ह परमेश्वरयात हेस्यायेत थः छम्ह सेनापति छ्वयाहःगु दु। परमप्रभु छिकपिनि परमेश्वरं वं धाःगु खँ न्यनादीमा अले न्यनादीगु खँया लागि वयात सजाँय बियादीमा। उकिं झी गुलि मनूत म्वानाच्वंगु दु, इमिगु निंतिं प्रार्थना यानाब्यु।”
5 हिजकिया जुजुया हाकिमत यशैयायाथाय् वयाः वयात जुजुया खबर बीधुंकाः
6 यशैयां इमित धाल, “छिमि मालिकयात धा, ‘परमप्रभुं थथे धयादी – थुपिं अश्शूरयाम्ह जुजुया च्यःतय्सं जितः क्वह्यंकाः धाःगु खँ न्यनाः छ ग्याये मते।
7 बांलाक न्यँ, जिं वयागु बिचाःयात हीकाबी, गुकें यानाः व छुं खबर न्यनाः थःगु हे देशय् लिहांवनी। अन जिं वयात तरवारं पालाः स्याके बी।’ ”
अश्शूरीतय्सं ख्याच्वः ब्यूगु
२ राज १९:८-१३
8 अश्शूरी जुजु लाकीशं वनाः लिब्नालिसें लडाइँ यानाच्वंगु दु धइगु खँ सेनापतिं न्यन, उकिं व अन वन।
9 अश्शूरी जुजु सनहेरीबं मिश्र देशयाम्ह कूशी जुजु तिर्हाकाह थःलिसें लडाइँ यायेत वयाच्वंगु दु धयागु बुखँ न्यनाः वं हिजकियायाथाय् दूततय्त थथे धाय्के छ्वल,
10 “यहूदायाम्ह जुजु हिजकियायात धा– छं भलसा याःम्ह द्यवं यरूशलेम अश्शूरयाम्ह जुजुया ल्हातय् लाइ मखु धयाः छन्त ध्वंमलायेमा।
11 अश्शूरयापिं जुजुपिन्सं मेमेगु फुक्क देशयात भज्यंक नाश यानाः छु यात व छं न्यंगु हे दु। छु छं थः बचय् जुइगु आस यानागु ला?
12 छु जिगु पुर्खातय्सं गोजान, हारान व रेसेप शहरत नाश यात अले तेल-अस्सारय् च्वंपिं अदनयापिं मनूतय्त स्यात, अय्नं इमि सुं द्यवं इमित बचय् याये फत ला?
13 हमातयाम्ह जुजु, अर्पादयाम्ह जुजु वा लायरयाम्ह जुजु वा सपर्बेमयाम्ह जुजु वा हेना वा इव्वाया जुजुपिं गन दु लय्?”
हिजकियां याःगु प्रार्थना
२ राज १९:१४-१९
14 हिजकियां थ्व पौ दूततय्गु ल्हातं कयाः ब्वन। अले व परमप्रभुया देगलय् थाहां वनाः पौ प्वलाः परमप्रभुया न्ह्यःने तयाबिल।
15 हिजकियां परमप्रभुयात थथे प्रार्थना यात,
16 “हे दक्व शक्ति दुम्ह परमप्रभु, इस्राएलया परमेश्वर, करूबतय् दथुइ सिंहासनय् च्वनादीम्ह, छि हे जक संसारया फुक्क राज्ययाम्ह परमेश्वर खः। छिं स्वर्ग व पृथ्वी दय्कादिल।
17 हे परमप्रभु न्यनादिसँ! हे परमप्रभु, थःगु मिखा चाय्काः स्वयादिसँ। सनहेरीबं म्वाःम्ह परमेश्वरयात हेपे यानाः धाःगु फुक्क खँ ध्यान बियाः न्यनादिसँ।
18 “हे परमप्रभु, अश्शूरया जुजुपिन्सं जाति जातित व इमिगु देशयात नाश याःगु खँ धात्थें खः।
19 इमिसं जाति जातितय् द्यःतय्त मिइ वान्छ्वयाः नाश यानाबिल, छाय्धाःसा इपिं द्यः मखु, तर मनूतय्गु ल्हातं दय्कूगु सिँ व ल्वहं जक खः।
20 आः हे परमप्रभु, जिमि परमेश्वर, जिमित वयागु ल्हातं त्वःतकादिसँ, अले संसारया फुक्क देशं छि परमप्रभु जक परमेश्वर खः धकाः सीमा।”
हिजकिया जुजुयात यशैयाया बुखँ
२ राज १९:२०-३७
21 अले आमोजया काय् यशैयां हिजकियायाथाय् थथे धकाः बुखँ छ्वल – “परमप्रभु इस्राएलया परमेश्वरं थथे धयादी, अश्शूरयाम्ह जुजु सनहेरीबया बारे छं जितः प्रार्थना याःगुलिं
22 वयागु विरोधय् परमप्रभुं थथे धयादीगु दु –
“ ‘अय् सियोनया कुमारी म्ह्याय्
छन्त हेपे याःगु दु,
छन्त हेस्याःगु दु।
यरूशलेमया म्ह्याय्नं
छ बिस्युं वंबलय् छ्यं क्वाःगु दु,
23 छं सुयात क्वह्यंकाः व ब्वः बिया?
अले सुयागु विरोधय् छं न्ववानागु
वा तःधंछुयागु दु?
इस्राएलया पवित्र परमेश्वरया विरोधय् मखु ला!
24 थः दूततपाखें
छं परमप्रभुयात तसकं बेइज्जत याःगु दु।
छं थथे धाःगु दु,
जिं यक्व रथत ज्वनावनाः
ततःजाःगु पहाडत त्याकागु दु
अले लेबनानया तसकं तापाःगु गुँ च्वका च्वका तक।
जिं थुकिया ततःमागु देवदारुया सिमा
व बांबांलाःगु सल्लाया सिमा पाला,
अले जि उकिया तातापाःगु च्वका
व उकिया ख्वातुगु गुँ दुने जि दुहां वना।
25 जिं तुं म्हुयाः विदेशया लः त्वना।
अले थःगु तुति पालिं मिश्रया फुक्क खुसि सुकाबिया।’
26 “यक्व न्हापा हे जिं अथे यायेगु ग्वसाः ग्वयागु खः धकाः
छु छं गुबलें मन्यना ला?
आः जिं हे व पूवंका।
पखालं घेरय् यानातःगु शहरतय्त नाश यानाः
द्वंचिंकेगु शक्ति जिं छन्त बिया।
27 उकिं अन च्वंपिं कमजोर जूगु दु।
इपिं निराश जुयाः लज्या चाःगु दु।
इपिं ख्यःया घाँय् थें,
क्यातूगु घाँय् थें,
छेँया पलिइ बुयावःगु ताहाक जुइ न्ह्यः हे
गनावनीगु घाँय् थें जूगु दु।
28 “तर छ गन च्वनीगु,
छ थुखे उखे जुइगु व जि खनाः छं
तं पिकाःगु धकाः जिं स्यू।
29 छंगु तं व घमण्डया बारे जिं न्यनागु दु।
अथे जुयाः जिं छंगु न्हासय् काकःचा
व छंगु म्हुतुइ लगाम तयाबी।
छ गुगु लँ जुयाः वःगु खः
व हे लं जिं छन्त लित छ्वयाबी।
30 “हे हिजकिया, छंगु निंतिं थ्व चिं जुइ,
“थ्व दँय् छिमिसं थथःम्हं बुयावःगु नइ।
अले निदँ दुबलय् थुकिं हे सयावःगु नइ।
अले स्वदँ दुबलय् छिमिसं पुसा ह्व, बाली लः,
अले दाखमात पिनाः उकी सयावःगु फल न।
31 अले यहूदाया घरानाया म्वानाच्वंपिन्सं
जमिनया क्वय् हा कयाः जमिनया च्वय् फल सय्की।
32 छाय्धाःसा यरूशलेमपाखें बचय् जूगु छगू ब्व
अले सियोन पर्वतं बचय्जूपिं छपुचः पिहां वइ।
दक्व शक्ति दुम्ह परमप्रभुया जोशं थ्व याइ।
33 “उकिं अश्शूरया जुजुया बारे परमप्रभुं थथे धयादी,
“व थ्व शहरय् वइ मखु,
न थन छपु नं वाण कय्की,
न ढाल ज्वनाः न्ह्यःने वये फइ,
न थुकिया विरोधय् घेरय् यायेगु चा व ल्वहंया द्वम्बःचा दय्के फइ।
34 गुगु लँ जुयाः व वःगु खः,
व हे लँ जुयाः व लिहांवनी,
अले थ्व शहरय् दुहां वइ मखु।”
दक्व शक्ति दुम्ह परमप्रभुं धयादी।
35 “जिं थःगु व जिमि च्यः दाऊदया कारणं
थ्व शहरयात रक्षा यानाः बचय् याये।”
36 अले परमप्रभुया दूत पिहां वल, वं अश्शूरीतय्गु छाउनीइ छगू लाख व चयन्याद्वःम्ह (१,८५,०००) अश्शूरी सिपाइँतय्त स्यानाबिल। सुथय् दंबलय् मनूतय्सं छाउनीइ सिपाइँत सिनाच्वंगु खन।
37 उकिं अश्शूरयाम्ह जुजु सनहेरीबं छाउनी स्यंकाः निनवेय् लिहां वन। व वनाः अन हे च्वन।
38 छन्हु व थः द्यः निस्रोकया देगलय् पुजा यानाच्वंबलय् वया काय्पिं अद्रम्मलेक व शरेसेरं वयात तरवारं स्यात, अले इपिं आरारात देशय् बिस्युं वन। वया लिपा वयागु थासय् वया काय् एसरहदोन जुजु जुयाः राज्य यात।