40
परमेश्वरया मनूयात सान्त्वना
1 छिमि परमेश्वरं धयादी,
जिमि प्रजायात सान्त्वना, सान्त्वना।
2 यरूशलेमया मनूतय्त साहस ब्यु।
इमित धा,
इमिसं ताःइलंनिसें सास्ती नयावयाच्वंगु दु।
आः इमिगु पाप क्षमा जूगु दु,
इमिगु पापया लागिं
जिं इमित पूरा सजाँय बियागु दु।
3 सुं छम्हय्सिनं थथे धकाः हाला हःगु सः ताये दइ,
“मरुभूमिइ परमप्रभुयात लँ ब्यु,
झिजांमिजां दंगु थासय् झी परमेश्वरयात लँ छिंकाब्यु।
4 फुक्क ब्यासित तःजाय्की,
फुक्क पर्वत व डाँडात माथंवंकी।
बेक्वःगु ख्यःत तप्यंकी
अले गाः वंगु बुँत माथंवंकी।
5 अनंलि परमप्रभुया महिमा खने दइ,
संसारया फुक्क मनूतय्सं छक्वलं व खनी,
छाय्धाःसा परमप्रभुया म्हुतुं हे थथे धयादीगु खः।”
6 छगू सलं थथे धाइ, “वचन घोषणा या!”
अले जिं न्यना, “छु वचन घोषणा यायेगु?”
“फुक्क मनूत घाँय् थें जक खः, इमिगु फुक्क गौरव
गुँइ ह्वइगु स्वां थें छुं ईया लगिं जक दयाच्वनी।
7 घाँय् गनावनी अले स्वां हायावनी,
छाय्धाःसा परमप्रभुं इमिपाखे फय् वय्कादी,
धात्थें हे मनूत घाँय् थें खः।
8 घाँय् गनावनी अले स्वां हायावनी,
तर झी परमेश्वरया वचन न्ह्याबलें दयाच्वनी।”
9 हे भिंगु खँ हइम्ह सियोन,
तज्जाःगु पर्वतय् थाहां हुँ,
अले थ्व भिंगु खँ न्यंकि!
हे भिंगु खँ हइम्ह यरूशलेम, ततःसलं हा,
मग्यासें ततःसलं हा!
अले यहूदाया शहरयात धा, “छिमि परमेश्वर झायाच्वंगु दु।”
10 स्व, शक्तिनापं परमप्रभु परमेश्वर झायेत्यंगु दु,
वय्कःया बल्लाःगु ल्हातं राज्य याइ।
वय्कःया सिरपाः वय्कःयाके दु,
अले वय्कःया इनाम नं वय्कःयाके हे दु।
11 वय्कलं थःगु फैच्वलय्या बथांयात फैजवालं थें ज्वयादी।
वय्कलं चिचीधिकःपिं भ्याःचातय्त थःगु मुलय् कयादी
अले इमित थःगु हे नुगःया लिक्क पाछायादी।
वय्कलं तसकं चिचीधिकःपिं फैचा दुपिन्त बुलुहुं ज्वयादी।
इस्राएलया परमेश्वर थें ज्याःम्ह सु दु?
12 सुनां समुद्रयात थःगु ल्हातं ज्वनाः तये फइ?
सुनां आकाशयात ल्हातं नापय् याये फइ?
सुनां पृथ्वीया चा दालाय् तःगु दु
वा डाँडा व पर्वतयात पाय्छिकथं ताल्जुइ लने फु?
13 वय्कःयागु मन सीके फुम्ह सु दु?
वय्कःयात सल्लाह बी फुम्ह सु दु?
14 बुद्धिया जःया निंतिं वय्कलं सुयाकें सल्लाह कयादीगु दु ला?
अले सुनां वय्कःयात खःगु लँय् वनेगु स्यन?
सुनां वय्कःयात ज्ञानया खँ स्यन,
वा थुइके फइगु लँपु क्यन?
15 जात जातित ला बाल्तिनय् च्वंगु छफुति लः थें जक खः।
इपिं ला ताल्जुइ पेपुनाच्वंगु धू थें खः।
वय्कलं ला टापुतय्त धूयात थें लनादी।
16 झी परमेश्वरया निंतिं वेदीइ होमबलि छायेत
लेबनानया गुँइ च्वंपिं पशुत गाइ मखु
अले छ्वय्केत अनयागु सिमात नं गाइ मखु।
17 फुक्क जातित वय्कःया न्ह्यःने छुं नं मखु।
वय्कलं इमित छुं नं ज्यालगय् मजूपिं
व छुं नं मखुपिं ताय्कादी।
18 अनंलि छिमिसं परमेश्वरयात सुनापं दाँजय् यायेगु?
अले वय्कःयात छु मूर्ति नाप दाँजय् यायेगु?
19 मूर्ति ला शिल्पकारतय्सं दय्की।
लुँकःमिं उकी लुँ भुनाबी,
अले उकिया निंतिं वहःया सिखः दय्की।
20 लुँ व वहःया मूर्ति दय्के मफुपिं मनूतय्सं ध्वग्गिना मवनीगु सिँ ल्यइ,
क्वदली मखुपिं मूर्ति दय्केत वं छम्ह तसकं ज्या सःम्ह शिल्पकारयात ल्यइ।
परमेश्वरं फुक्क पृथ्वीइ शासन यानादी
21 छु छं छुं नं मस्यू ला?
छु छन्त न्हापा हे धाःगु मखु ला?
पृथ्वी गुकथं शुरु जुल,
छु छं न्यनागु मदु ला?
22 वय्कः पृथ्वी च्वय् आकाश स्वयाः नं च्वय् थःगु सिंहासनय् च्वनादीम्हय्सिनं व दय्कादीगु खः,
क्वय् पृथ्वीइ मनूत बुइँचा थें जक खः।
वय्कलं आकाशयात इलां थें चक्कंकादीगु दु,
अले अन बाय् च्वनेत पाल थें चक्कंकादीगु दु।
23 वय्कलं शासकतय्त ज्यालगय् मजुइकादी,
अले पृथ्वीइ च्वंपिं शासकतय्त छुं नं मखुपिं यानाः क्वकयादी।
24 इपिं पीवं,
पुसा ह्वलेवं,
इमिसं बुँइ हा कायेवं
वय्कलं इमित स्वांपुयादी
अले इपिं सुकूचिनावनी,
अले ग्वःफसं इमित छ्वसँ थें पुइकेयंकी।
25 “छिमिसं जितः सुनापं दाँजय् यायेगु?
जि थें ज्याःम्ह सु दु?” पवित्र परमेश्वरं धयादी।
26 च्वय् आकाशय् मिखा ब्वयाः स्व,
अनयागु फुक्क नगुत सुनां दय्कूगु खः?
वय्कलं हे मखु ला?
वय्कलं उपिं फुक्क नगु व नक्षत्रतय्त नां कयाः सःतादी,
वय्कःया तःधंगु शक्तिया कारणं
उपिं छगू नं तनावनी मखु।
27 हे याकूब, छ छाय् क्वाराक्वारा हालाच्वनागु?
हे इस्राएल, छं छाय् थथे धयागु,
“परमप्रभुं जिगु दुःख मथू,
जिं अन्याय सहयाना नं वास्ता यानामदी?”
28 छु छं मस्यू ला?
छु छं न्यनागु मदु ला?
परमप्रभु सदां सदांया परमेश्वर खः धकाः,
वय्कलं हे दक्व संसार दय्कादिल।
वय्कः गुबलें त्यानुचाइ मखु,
गुबलें गलय् जुइ मखु, वय्कःया बिचाः सुनानं थुइके फइ मखु।
29 वय्कलं त्यानु चायाच्वंपिन्त
व बल मदुपिन्त बल बियादी।
30 मचा ल्याय्म्हपिं मनूत नं बल मदयाः त्यानु चायावनी
अले ल्याय्म्हपिं मनूत त्यानुचायाः क्वदली।
31 तर परमप्रभुयाके भलसा तइपिनिगु बल हाकनं न्हूगु जुइ।
इपिं इमा थें च्वय् च्वय् ब्वया जुइ
अले ब्वाँय् वनाः नं त्यानुचाइ मखु।
इपिं न्यासि वनाः नं मूर्च्छा जुइ मखु।