45
परमप्रभुं कोरेसयात ल्यःगु
1 “परमप्रभुं थम्हं अभिषेक यानादीम्ह कोरेसयात धयादी,
जात जातितय्त त्याकेत,
जुजुतय्गु ल्हातं अधिकार लाकाकायेत,
शहर शहरया मू ध्वाखात चाय्केत
व ध्वाखात वयागु विरोधय् गुबलें तीमफय्मा धकाः
जिं वयात शक्ति बियागु दु,
जि परमप्रभुं जुजु कोरेसयात थथे धाये,
2 जि छंगु न्ह्यः न्ह्यः वने,
अले डाँडातय्त माथं वंकाबी।
कँय्या ध्वाखात जिं कुचा कुचा थलाबी,
अले नँयागु बालात चानाबी।
3 जिं छन्त सुनानं मखंथाय् सुचुका तयागु
धन-सम्पत्ति बी।
अले छन्त छंगु नां कयाः सःताम्ह
परमप्रभु इस्राएलया परमेश्वर जि हे खः धकाः छं सी,
4 जिमि दास याकूबया निंतिं,
जिं ल्ययागु इस्राएलया निंतिं,
जिं छन्त छंगु नां कयाः सःतागु दु।
छं जितः नाला मकाःसां जिं
छन्त तःधंगु इज्जत बियागु दु।
5 जि परमप्रभु खः,
जि बाहेक मेपिं सुं नं परमेश्वर मदु।
छं जितः नाला मकाःसां
जिं छन्त बल्लाके।
6 थुकथं मनूतय्सं निभाः लुइगु थासंनिसें
निभाः बीगु थासय् तक
जि बाहेक मेपिं सुं नं मदु धकाः सीकेफय्मा।
जि परमप्रभु खः, जि बाहेक मेपिं द्यः मदु।
7 जिं जः दय्का, अले खिउँगुयात नं सृष्टि याना।
जिं आशिष व विपत्ति निगुलिं हया।
जि परमप्रभुं हे थुपिं फुक्क ज्या याना।
8 “हे च्वय्यागु आकाश, जिगु धार्मिकताया वा वय्कि।
सुपाचं उकियात क्वफाना हयेमा।
पृथ्वी चक्कनेमा, अले उद्धार व धार्मिकतानापं ब्वलनेमा।
जि, परमप्रभुं हे थ्व सृष्टि यानागु खः।
सृष्टि व इतिहासया परमेश्वर
9 “धिक्कार वयात, सु थः सृष्टिकर्तानापं ल्वाइ,
व बँय् लानाच्वंगु तज्याःगु
चाया थलया कुचात मध्ये छकू कुचा जक खः।
छु चां कुमाःयात ‘छं छु दय्का च्वनागु धकाः न्यनी ला?’
छु चाया थलं ‘जितः दय्केगु सीप मदु धकाः धाइ ला?’
10 धिक्कार वयात, सुनां थः अबुयात थथे धाइ,
‘छिं जितः छाय् बुइकागु?’
अथवा वया थः मांयात थथे धाइ,
‘छिं जितः छाय् बुइकागु?’
11 “परमप्रभु, पवित्र परमेश्वर व इस्राएलया सृष्टिकर्तां थथे धयादी,
आः वइतिनिगुया बारे,
छु छिमिसं जिमि काय् म्ह्याय्पिनिगु बारे न्ह्यसः न्यना ला,
अले जिगु ल्हाःया ज्याया बारे छिमिसं उजं बियागु ला?
12 पृथ्वी जिं हे दय्काःगु खः,
अले उकी दुपिं मनूत नं जिं हे सृष्टि यानागु खः।
जिगु हे ल्हाःया ज्यां आकाशयात चक्कंकागु खः।
अले उकी दुगु नक्षत्र व नगुत पाय्छिकथं मिलय् यानातयागु दु।
13 कोरेसयात जिगु धार्मिकताया निंतिं थनागु दु।
जिं वयागु फुक्क लँपु तप्यंकाबी।
वं जिगु शहर हाकनं दय्की,
अले ज्वनायंकूपिं फुक्कसित छुत्कारा यानाबी।
धिबा वा छुं कोसेलि मकासें हे थथे याइ।”
दक्व शक्ति दुम्ह परमप्रभुं धयादी।
14 परमप्रभुं थथे धयादी,
“मिश्र देशय् सःगु व कूश देशया व्यापार
अले उपिं ततःधिकःपिं शेबाया मनूत
व जात जातित छन्थाय् वइ, अले इपिं छंगु हे जुइ।
इपिं सिखलं चिनातःगु अवस्थाय् छंगु ल्यूल्यू वइ,
इपिं छंगु न्ह्यःने क्वछुइ अले थथे धकाः छन्त बिन्ति याइ,
‘धात्थें हे परमेश्वर छिलिसे दी, मेम्ह सुं मदु,
वय्कः बाहेक सुं मेम्ह परमेश्वर मदु।’ ”
15 हे परमेश्वर, इस्राएलया मुक्तिदाता।
धात्थें छि हे परमेश्वर खः, सुनां थःत सुपिका तयादी।
16 मूर्ति दय्कीपिं फुक्कं लाजय् लाइ
अले इपिं फुक्कसिगु छकलं बेइज्जत जुइ।
17 तर हे इस्राएलीत,
छिपिं धाःसा परमप्रभुपाखें सदां दइगु उद्धारं बचय् जुइ।
छिपिं गुबलें नं लाजय् लाइ मखु,
अले लिपाथ्यंक छिमिगु गुबलें बेइज्जत जुइ मखु।
18 परमप्रभुं स्वर्ग सृष्टि यानादिल।
वय्कः हे परमेश्वर खः।
वय्कलं पृथ्वीयात बां लुइकादिल,
वय्कलं उकियात थापं यानादिल।
वय्कलं पृथ्वीयात झिजांमिजां जुइत सृष्टि यानादीगु मखु,
तर मनूत च्वनेत दय्कादीगु खः।
वय्कलं थथे धयादी,
“जि हे परमप्रभु खः, जि बाहेक मेपिं सुं नं द्यः मदु।
19 जिं खिउँगु देशय् सुनां मसीक न्वमवाना,
‘जिं छन्त मफतय् माला’ धकाः याकूबया सन्तानयात मधया।
जि परमप्रभुं सत्य नवाये,
जिं पाय्छिगु खँ घोषणा याये।”
परमप्रभु व बेबिलोनया मूर्तित
20 “छिपिं फुक्कं छथाय् मूंवा।
छिपिं जात-जातियापिं शरण कायेत वःपिं,
फुक्क जिगु न्ह्यःने वा।
सिँया मूर्तित क्वबिया जुइपिं,
अले बचय् याये मफुपिं द्यःतय्के प्रार्थना याइपिं
छुं हे मस्यूपिं खः।
21 आः जूवइतिनिगु खँया बारे धा।
छिपिं थःथवय् सल्लाह या।
थ्व खँ यक्व दँ न्ह्यः सुनां धयाबिल?
न्हापांनिसें सुनां धयाबिल?
छु जि परमप्रभुं हे मखु ला?
जि बाहेक मेपिं सुं परमेश्वर मदु।
छम्ह धर्मी व मुक्ति बीम्ह परमेश्वर,
जि बाहेक मेपिं सुं नं मदु।
22 “जिपाखे फःहिला वा, अले बचय् जु,
हे पृथ्वीया कुन्चाय् थ्यंक च्वंपिं फुक्क मनूत,
छाय्धाःसा जि हे परमेश्वर खः, जि बाहेक मेपिं सुं नं मदु।
23 जिं थःगु हे नामं पाफयागु दु,
जि विश्वास याये बहःम्ह जुयाः जिगु म्हुतुं छगू वचन घोषणा यानागु दु,
गुगु जिं हाकनं लित काये मखु।
फुक्क मनूतय्सं
जिगु न्ह्यःने पुलिं चुइ।
अले फुक्कसिनं
जिगु भक्ति याये धकाः पा फइ।
24 इमिसं जिगु बारे थथे धाइ,
‘परमप्रभुयापाखें जक धार्मिकता व शक्ति वइ।’ ”
वय्कःया विरोधय् तंपिकापिं फुक्क
वय्कःयाथाय् हे वइ अले लाजय् लाइ।
25 तर परमप्रभुं हे फुक्क इस्राएलया सन्तानतय्त बचय् यानादी।
इपिं सकसिनं वय्कःया प्रशंसा याइ।