5
परमप्रभुया दाखक्यबया बारे म्ये
1 जिं थः यःम्हय्सियागु निंतिं छपु म्ये हाले,
अले वयागु दाखक्यबया बारे म्ये हाले–
यक्व सइगु डाँडाय्
जिमि यःम्ह छम्हय्सिया छगू दाखक्यब दु।
2 वं क्यबय् बुँ पाल। अले ल्वहंत लिकयाः वांछ्वल।
अले अन वं दक्वसिबय् भिंगु दाखमा पित।
दाखक्यब स्वयेत बल्चा दय्कल,
दाख तिसीत ल्वहँतय् कियाः छगू गाः म्हुल।
वं भिंगु दाख सइ धकाः आशा यात
अय्नं उकी मभिंगु दाख सल।
3 उकिं जिमि पासां धाइ, “हे यरूशलेम व यहूदाय् च्वंपिं मनूत,
जिगु व जिगु दाखक्यबया दथुइ न्याय यानाब्यु।
4 जिं थःगु दाखक्यबया निंतिं
मयानागु छु दु धकाः?
जिं ला भिंगु दाखया आशा यानागु खः।
छाय् वं मभिंगु फल जक सयेकल?
5 स्व, जिं जिगु दाखक्यबयात छु याये,
व जिं छिमित धाये –
जिं उकिया बाःर चीकाछ्वये,
उकियात नाश जुइके बी,
जिं उकिया पःखाः थुनाबी,
गुँपशुतय्त व न्हुत्तुमत्तु न्हुकेबी।
6 जिं व क्यबयात ज्याख्यलय् मदुगु यानाबी,
उकियात न कचा न्हाय् न बुँ पाले,
तर झाः व कँ बुया वइ।
अन वा मवयेमा धकाः
सुपाँय्यात नं उजं बी।”
7 दक्व शक्ति दुम्ह परमप्रभुया दाखक्यब ला
इस्राएल जाति खः,
यहूदाया मनूत धाःसा
वय्कःयात यःगु क्यब खः।
स्व, वय्कलं न्यायया आशा यानादिल,
अय्नं स्याये पालीगु जक जुल।
वय्कलं धार्मिकताया आशा यानादिल,
अय्नं दुःखया ख्वःगु सः ताये दत।
धिक्कार व इन्साफ
8 धिक्कार छिमित,
गुपिन्सं छेँया छें जाय्कल
अले बुँया बुँ जक न्यानाः मेपिन्त थाय् हे मदय्काबिल।
देशय् छिपिं जक हे च्वनी।
9 दक्व शक्ति दुम्ह परमप्रभुं थथे धयादीगु जिं तायागु दु,
“धात्थें हे अप्वः थें छेँत दुनावनी
अले ततःखागु बांलाःगु छेँय् झिजांमिजां दनी।
10 झिगू हेक्टर दाखबय् नं निइछगू लिटर जक दाखमद्य बी
अले झिफा पुसां फछि जक अन्न सय्की।”
11 धिक्कार इमित, सु अय्ला त्वनेत सुथय् हे दनी
अले बहनि लिबाक्क धेधेमचुतले दाखमद्य त्वनाच्वनी।
12 इमिगु भ्वय्लय् वीणा, सारंगी,
खैँजडी, बाँसुरी व दाखमद्य दइ।
तर इमिसं परमप्रभुं छु यानादी धयागु बारे
छुं हे बिचाः याइ मखु।
13 अथे जुयाः जिमि प्रजा ज्ञां मदयाः ज्वनायंकेबिया च्वनेमाली,
इपिं मध्ये तःधंपिं व हनेबहःपिं
नये मखनाः व चीमिपिं मनूत
लः त्वनेमखनाः सी माली।
14 चिहानं नयेपित्याकाः
थःगु म्हुतु वांखायाः पियाच्वंगु दु।
वं यरूशलेमया घरानियानापं
इमि ल्वापुखिचात व हाहू याइपिन्त नुनाछ्वइ।
15 थुकथं फुक्क मनूतय्त क्वमिलु यानादी
अले घमण्डीतय्गु मिखायात क्वछुइका बी।
16 तर पाय्छिगु न्यायलं दक्व शक्ति दुम्ह परमप्रभुया नां च्वन्ह्याइ।
पवित्र परमेश्वरं थःगु धार्मिकतापाखें थः हे पवित्र खः धकाः क्यनादी।
17 व दिंखुन्हु फैतय् नयेत थःगु हे ख्यः दइ
अले भ्याःचातय्सं धाःसा तःमिपिनिगु नाशया दथुइ नइ।
18 धिक्कार इमित, गुपिन्सं पापयात छलया खिपतं
व मभिंगु ज्यायात गाडायात खिपतं साला हः थें साला हइ।
19 धिक्कार दु इमित, गुपिन्सं परमप्रभुयात चुनौती बियाः थथे धाइ,
“वय्कः छाय् हथाय् चायामदीगु
अले वय्कलं यानादीगु ज्या छाय् याकनं झीत मक्यंगु
छाय् इस्राएलया पवित्र परमेश्वरं झायाः थःगु योजना पूवंकामदीगु?
अले झीसं व फुक्क सीगु।”
20 धिक्कार इमित, गुपिन्सं मभिंयात भिं
अले भिंयात मभिं धकाः धाइ,
खिउँगुयात जः
व जःयात खिउँगु धकाः धाइ,
अले खायुगुयात चाकुसे च्वं धकाः धाइ
व चाकुसे च्वंगुयात खाइसे च्वं धकाः धाइ।
21 धिक्कार इमित, सु थःगु हे मिखाय् बुद्धिमान तायेकी
अले थःगु हे मिखाय् चलाख तायेकी।
22 धिक्कार इमित, सुनां दाखमद्य त्वनेत तसकं बल्ला तायेकी,
अले अय्ला ल्वाकछ्यायेत तसकं हे सःस्यू धकाः जुइ।
23 घुस कयाः मभिं ज्या याइपिन्त त्वःताछ्वइ
अले दोष मदुपिन्त सजाँय बी।
24 अथे जुयाः गथे मिं सुयात भस्म याइ
अले गंगु घाँय्यात मिप्वालं भस्म याइ
अथे हे इपिं नं हानापं गनावनी
अले इमिगु स्वां धू थें ब्वयावनी।
छाय्धाःसा इमिसं दक्व शक्ति दुम्ह परमप्रभुया व्यवस्थायात क्वह्यंकूगु दु
अले इस्राएलया पवित्र परमेश्वरया वचनयात हेला याःगु दु।
25 अथे जुयाः परमप्रभु थः प्रजालिसे तंचायादीगु दु
अले इमित सजाँय बीत थःगु ल्हाः ल्ह्वनादीगु दु।
पर्वतत थरथर खाइ
अले सीम्हत धू थें लँय् अथें हे वांछ्वया तइ।
तर उलि जुलं नं परमप्रभुया तं क्वलाइ मखुनि
अले इमित सजाँय बीत वय्कःया ल्हाः ल्ह्वना तुं च्वनादी।
26 परमप्रभुं तापाक्क च्वंपिं देशतय्त चिंया झण्डा ब्वय्काः आज्ञा बियाच्वनी।
अले इमित पृथ्वीया कुंकुलामय् थ्यंक सुलुपुयाः सःतादी।
अले इपिं यरूशलेमपाखे ब्वाँय् वइ।
27 इपिं मध्ये सुं नं त्यानुचाइ मखु वा लुफिं हाइ मखु।
सुं नं क्वछुइ मखु वा न्ह्यःवय्की मखु।
इपिं सुयागुं जँय्या जँनी छ्वासुइ मखु,
सुयागुं लाकांया पुतु चःबुइ मखु।
28 इमिगु तीर तसकं च्वामु
अले व धनुलय् तया कय्केत मिलय् याना तइ।
इमिगु सलया तुतिख्वः च्वल्वहं थें छाः
अले रथया घःचात ग्वःफय् वःगु थें चाःहिलीगु खः।
29 सुनानं लाका काय् मफय्क शिकार यानाः ज्वनावःम्ह सिंहं थें
सिपाइँत तसलं हाला हइ।
30 व दिं वइबलय् समुद्रं सः पिकया हः थें
इपिं वयाथाय् हाः वइ।
व देशयात स्वःसा,
अन खिउँगु व कष्ट जक दु
अले जःयात सुपाचं त्वपुयाः खिउँकाबी।