63
जाति जातितय्त परमप्रभुं त्याकादीगु
1 एदोमपाखें व बोज्रापाखें ह्याउँसे च्वंगु वसः पुनावःम्ह सु खः?
झःझः धाःगु वसः पुनाः अले थःगु तःधंगु शक्तिं वयाच्वंम्ह सु खः?
“धार्मिकतां न्ववाइम्ह
व बचय् यायेत तसकं शक्ति दुम्ह जि हे खः।”
2 गथे जुयाः छिगु वसः दाख सालय् दाखमद्य दय्केत
दाख क्यलीपिनिगु थें ह्याउँसे च्वंगु?
3 “जि याकःचां हे दाखयात तुतिं न्हुत्तुन्हुया,
सुं नं जातित जिनापं मदु।
जिं तमं इमित न्हुत्तुन्हुया तीसिना,
अले जिं झ्वँकय् इमित न्हुत्तुन्हुया।
इमिगु हिया फुति जिगु वसतय् लाःगु दु,
अले जिगु वसः फुक्कं हिया हिं जाःगु दु।
4 छाय्धाःसा बदला कायेगु दिं जिं क्वःछिनागु दु,
अले जिगु उद्धारया दँ न्ह्यःने थ्यंकः वःगु दु।
5 जिं स्वया, तर ग्वाहालि याइपिं सुं नं मखना।
ग्वाहालि याइपिं सुं नं मखना जि अजू चाया।
अथे जुयाः जिगु थःगु हे बल्लाःगु ल्हातं जिगु उद्धार याना,
अले जिगु तमं जितः थामय् यात।
6 तमं जिं जाति जातितय्त न्हुत्तुन्हुया।
जिगु तमं इमित काय्का बिया,
अले जिं इमिगु जीवनया हि बँय् प्वंकाबिया।”
प्रशंसा व प्रार्थना
7 परमप्रभुं झीगु निंतिं यानादीगु फुक्क ज्याया निंतिं वय्कःयात प्रशंसा यायेमा,
वय्कलं यानादीगु दयामायाया बारे जिं धयाबी,
वय्कःया दया व करुणा कथं,
वय्कलं इस्राएलया घरानाया निंतिं तसकं भिंगु ज्या यानादिल।
8 वय्कलं धयादिल, “धात्थें हे थुपिं जिमि प्रजा खः,
उपिं काय्पिं गुपिन्सं जितः ध्वखा बी मखु।”
अथे जुयाः वय्कः इमित मुक्ति बीम्ह जुयादिल।
9 इमिगु फुक्क दुःखकष्टय् वय्कः नं दुःखी जुयादिल,
अले वय्कःया दूत इमित बचय् यायेत इमिथाय् वल।
वय्कःया दयामाया व कृपाय्
वय्कलं मू पुलाः इमित छुत्कारा यानादिल।
वय्कलं इमित दुःखकष्टपाखें थकयादिल,
अले न्हापा न्हापायागु इलय् वय्कलं इमित क्वबियादिल।
10 अय्नं इपिं विद्रोही जुल,
अले वय्कःया पवित्र आत्मायात दुःख बी।
अथे जुयाः वय्कः इमि शत्रु जुयादिल,
अले वय्कः थः हे इमिगु विरोधय् ल्वानादिल।
11 अले वय्कःया प्रजां न्हापा न्हापायागु ईयात,
मोशा व वया प्रजाया दिंयात लुमंकल।
समुद्रपाखें वय्कःया मनूतय्त बथांया जवाःनापं हयादीम्ह, वय्कः गन झायादिल?
थःगु पवित्र आत्मा इमिगु दथुइ तयादीम्ह, गन दी?
12 वय्कः गन दी? गुम्हय्सिनं थःगु बल्लाःगु ल्हाः
मोशाया जव ल्हाःपाखे न्ह्यज्याकादिल,
गुम्हय्सिनं सदां सदांया निंतिं थःगु नां जाय्केत
इमिगु हे न्ह्यःने लःयात निगू भाग यानादिल।
13 गुम्हय्सिनं इमित गुँ सलतय्त थें
ब्यासिइ लुफिं महाय्मा धकाः
गाः गाः वंगु थाय्तय्पाखें यंकादीगु, मखु ला?
14 गथे पशुत ब्यासिइ ज्वये यंकी,
अथे हे परमप्रभुया आत्मां इमित आराम बी।
अथे हे छिं थःगु नांया महिमाया निंतिं
थः प्रजायात न्ह्यलुवाः जुयाः यंकादिल।
15 स्वर्गं स्वयादिसँ, अले थःगु दक्वसिबय् च्वय्यागु
पवित्र व महिमां जाःगु सिंहासनं क्वय् स्वयादिसँ।
छिगु जोश व शक्ति गन वन?
छिं जिपिंपाखें छिगु क्वमिलुसु व दयामाया लितकाःगु दु।
16 तर छि ला जिमि अबु खः।
अब्राहामं जिमित म्हमस्यूसां अले इस्राएलं जिमित नाला मकाःसां,
छि, हे परमप्रभु, जिमि अबु खः।
छिगु नां न्हापांनिसें हे जिमित उद्धार याइम्ह खः।
17 हे परमप्रभु, छिगु लँपुपाखें जिमित छाय् बिस्युंवनीपिं यानादियागु?
अले छिगु हनाबना यायेगुपाखें जिमिगु नुगःयात छाय् छाकादियागु?
छिगु थःगु अधिकार दुपिं कुलतय्गु कारणं
अले छिकपिनि दासतय्गु कारणं जिपिंपाखे लिहांझासँ।
18 छिकपिनि प्रजां छुं ईया निंतिं जक
छिगु पवित्र थासय् अधिकार याये खन।
आः जिमि शत्रुतय्सं छिगु पवित्र थाय्यात न्हुत्तुन्हुगु दु।
19 न्हापा न्हापांनिसें जिपिं ला छिकपिनिम्ह हे खः,
तर जिपिं छिं गुबलें शासन यानामदीपिं प्रजा थें च्वं,
जिपिं छिगु नां ज्वनाः मजुइपिं प्रजा थें च्वं।