13
अय्यूबयात परमेश्वरलिसें जवाःसवाः याये मास्ति वःगु
1 “धात्थें, थ्व फुक्क जिं थःगु हे मिखां खनागु दु।
जिं थुकियात थःगु हे न्हाय्पनं न्यनाः थुइके धुन।
2 छिकपिन्सं गुलि स्यू उलि जिं नं स्यू,
जि छिकपिं स्वयाः छुकिं नं कम मजू।
3 तर जितः ला दक्व शक्ति दुम्ह परमेश्वरनापं खँ ल्हाये मास्ति वः,
अले जितः परमेश्वरलिसें जवाःसवाः याये मास्ति वः।
4 तर छिकपिन्सं धाःसा सत्ययात मखुगु खं त्वपुइ।
छिकपिं सकलें ज्यालगय् मजूपिं बैद्यत खः।
5 छिकपिं सुम्क च्वंगु जूसा ला ज्यूगु नि,
अले मनूतय्सं छिकपिन्त बुद्धिमान ताय्कीगु।
6 जिगु जवाःसवाः न्यनादिसँ,
अले जिगु म्हुतुया उजुर बांलाक न्यँ।
7 छिकपिन्सं परमेश्वरया पंलिनाः मभिंगु खँ ल्हायेगु ला?
वय्कःया पंलिनाः बेइमान खँ ल्हायेगु ला?
8 छिकपिं परमेश्वरया पंलीगु ला?
छिकपिन्सं परमेश्वरया पंलिनाः जवाःसवाः यायेगु ला?
9 वय्कलं छिकपिन्त जाँचय् यानादिल धाःसा छु थ्व पाय्छि जुइ ला?
छिकपिन्सं मनूतय्त ध्वंलाःगु थें वय्कःयात ध्वंलाये फइ ला?
10 जितः मखुगु पाः यानाः छिकपिन्सं वय्कःया पंलिनादिल धाःसा,
वय्कलं धात्थें हे छिमित ब्वःबियादी।
11 वय्कःया गौरवं छिमित मख्याइ ला?
छिकपिन्के वय्कःयागु भय मलाइ ला?
12 छिकपिनिगु लिसः ला नौयागु उपदेश थें ज्यालगय् मजू,
छिकपिनिगु सुरक्षा चा थें कमजोर जुइ।
13 छिकपिं सुम्क च्वनाः जितः न्ववाके ब्यु,
अनंलि जितः न्ह्याःगु हे जूसां थजु।
14 जिं छाय् थःत खतराय् लाकाः
थःगु प्राण थःगु हे ल्हातय् कायेगु?
15 वय्कलं जितः स्याःसां तबि जिं वय्कःयाके भलसा काये।
जिं धात्थें हे वय्कःया न्ह्यःने थःगु लँया रक्षा याये।
16 थ्व नं जिगु उद्धारया निंतिं जुइ।
छाय्धाःसा परमेश्वरयात मानय् मयाइम्ह सुं नं मनू
वय्कःया न्ह्यःने वयेगु आँट याइ मखु।
17 जिगु खँ बांलाक न्यनादिसँ,
जिं धयागु खँय् न्हाय्पं बियादिसँ।
18 आः जिं थःगु मुद्दा तयार याये धुनागुलिं
जि निर्दोष ठहरय् जुइ धकाः जिं स्यू।
19 जितः पाः याये फुम्ह सुं दु?
अथे खःसा, जि सुम्क च्वने अले सिनावने।
20 हे परमेश्वर, जितः थुपिं निगू खँ जक बियादिसँ!
जि छिपाखें सुले मखु।
21 छिगु झ्यातुगु ल्हाः जिपाखें तापाक यंकादिसँ।
छिगु आतंकं जितः मख्यायेमा।
22 अले जितः सःतादिसँ,
जिं लिसः बी।
23 जिं गुलि यक्व अधर्म व पाप यानागु दु?
जिगु अपराध व पाप छिं जितः कनादिसँ।
24 छिं थःगु ख्वाः छाय् सुचुकादियागु?
छाय् जिलिसें शत्रुतनापं थें व्यवहार यानादियागु?
25 छिं फसं ब्वय्कूगु सिमाहःयात नं लिनादीगु ला?
छि गंगु छ्वसँया ल्यूल्यू जुयादीगु ला?
26 छाय्धाःसा छिं जिगु विरोधय् नुगलय् स्याइगु खँ च्वयादिल,
जिगु ल्याय्म्हबलय्यागु अधर्म भोगय् याकेबिल।
27 नेवलय् जिगु तुति तयादिल,
जिगु फुक्क लँयात जाँचय् यानादिल।
जिगु तुतिया पालिइ दासयागु चिं तयादिल।
28 उकिं जि ध्वग्गिगु चिज
व किलं नःगु वसः थें नाश जुयाः वनाच्वंगु दु।”