28
मनूतय्सं बुद्धि मालेगु
1 धात्थें वहः पिहांवइगु थाय् दइ,
लुँ यचुकीगु थाय् दइ।
2 नँ जमिनं लिकाइ,
सिजः कचिगु धातु नाय्काः लिकाइ।
3 मनूतय्सं खिउँगुयात मदय्काबी।
इमिसं पृथ्वीया तातापागु थासय् तसकं खिउँगुलिइ कचिगु धातु माली।
4 मनूत च्वनाच्वंगु थासं तापाक,
लँजुवाःतय्सं ल्वमंके धुंकूगु थासय् इमिसं सुरुंङ म्हुइ।
मेपिं मनूतपाखें तापाक यग्गाइ अले थुखें उखें सनाः ज्या याइ।
5 पृथ्वीं अन्न वइ,
तर थुकिया दुने मि च्यानाः फुक्क फातापुइकाबी।
6 थुकिया चट्टानं नीलम पिहां वइ,
उकिया धुलय् लुँ दइ।
7 अन वनीगु लँ सुं शिकारी पन्छीं म्हमस्यू।
अले बाय्चाया तेल्लाःगु मिखां नं व खनी मखु।
8 ग्यानापुपिं पशुतय्सं नं अन पलाः तइ मखु,
सुं सिंह नं अन दुहां वनी मखु।
9 मनूतय्सं थःगु ल्हातं छाःगु ल्वहंधी चाइ,
अले पहाडयात हांनिसें हे फातापुइकाबी।
10 इमिसं ल्वहंधिकय् सुरुंङ म्हुइ।
इमिगु मिखां उकिया फुक्क मू वंगु चिजत खनी।
11 इमिसं खुसितय् मुहान माली,
अले जमिनय् दुने थुनातःगु धन नं लिकाइ।
12 तर बुद्धि गन लुइके फइ?
दुग्यां गन दइ?
13 मनूतय्गु दथुइ व दइ मखु
मनूतय्सं उकिया मू सी मखु।
14 तःजाःगु समुद्रं धाइ, “व जिके मदु।”
सागरं धाइ, “व जिके मदु।”
15 भिंगु लुं व न्याये फइ मखु।
न वहः लनाः उकिया मू पुले फइ।
16 ओपीरया लुं व न्याये फइ मखु।
अथवा गोमेद थी व नीलमनापं व लनेफइ मखु।
17 लुँ व स्फटिकनापं व ज्वःलाकाः स्वये फइ मखु,
न उकियात भिंगु लुँयागु थलबलं हिले फइ।
18 भिंपू व जास्परया ला नां तकं मकासां ज्यू।
बुद्धिया मू मणिक्य स्वयाः यक्व जुइ।
19 थ्वनापं कूश देशया पुष्पराजयात ज्वःलाकाः स्वये फइ मखु।
भिंगु लुं थ्व न्याये फइ मखु।
परमेश्वर जक बुद्धि दुम्ह खः
20 “बुद्धि गनं पिहां वइ?
दुग्यां गन दइ?
21 संसारया सुं म्वाःपिनिगु मिखां व खंके फइ मखु।
आकाशय् ब्वइम्ह झंगःपन्छीं नं व खनी मखु।
22 विनाश व मृत्युं धाइ,
‘जिमिसं ला न्यनागु जक खः’।
23 परमेश्वरं जक बुद्धिया लँ स्यू।
वय्कलं व गन लुइके फइ धकाः स्यू।
24 छाय्धाःसा वय्कलं पृथ्वीया फुक्क थाय् खं,
वय्कलं आकाश क्वय्यागु फुक्क खँयात स्वयादी।
25 परमेश्वरं फय्यात शक्ति बियादीबलय्,
अले लःयात दानादीबलय्,
26 वय्कलं आकाशं वइगु वायागु लागि विधि
व नँ न्यानाः वइगु वाफय्या लागि लँ क्वःछिनादीबलय्,
27 वय्कलं बुद्धियात खनाः व गथे च्वं स्वयादिल।
वय्कलं उकियात थासय् तयादिल अले उकियात बांलाक जाँचय् यानादिल।
28 अले वय्कलं मनूयात धयादिल,
‘स्व, प्रभुया भय कायेगु हे बुद्धि खः।
मभिंगु ज्यापाखें तापाक च्वनेगु हे दुग्यां खः।’ ”