योएलया सफू
म्हसीका
योएल अगमवक्ताया बारे कम खँ जक सीकेफुगु दु। वया जन्म व मृत्यु गुबलय् जुल धयागु खँ बांलाक सी मदु। अले योएलं थःगु भविष्यवाणी गुबलय् याःगु खः धयागु खँ नं झीसं मस्यू। वयागु बारे पुलांगु नियमय् गन नं च्वयातःगु खने मदु। बरु न्हूगु नियमय् पत्रुसं प्रेरित २ अध्यायलय् वयागु बारे धाःगु दु। योएलं यरूशलेमय् च्वंपिं मनूतय्त व यहूदाया मेमेगु थासय् च्वंपिं मनूतय्त परमप्रभुया सन्देश न्यंकेगु याःगु खः।
यहूदाय् क्वःबुइँचायागु तसकं ग्यानापुगु महामारीं हमला याःगु खः। अथे जुया फुक्क देशय् तसकं ग्यानापुगु अनिकाल जुल। योएलया थ्व सफुलिइ थुपिं फुक्क खँया बारे च्वयातःगु दु। योएलं थुपिं घटनातय् परमप्रभुया वयेत्यंगु दिंया चिं खनी, थज्याःगु छगू ई गुबलय् वय्कलं थःगु व्यवस्थाया विरोधय् विद्रोह याःपिन्त सजाँय बियादी। परमप्रभुया थ्व दिं मेमेगु देशयापिन्त सजाँय बीगु ई खः अले इस्राएलया मनूतय्त उखुन्हु सुवाः बीगु ई खः धकाः गुलिं गुलिसिनं विश्वास याइ। तर मेमेपिं अगमवक्तातय्सं थें योएलं उगु दिंखुन्हु वय्कःया आज्ञा मानय् मयाइपिं मनूतय्त वय्कलं दण्ड बियादी धकाः इमित स्यनेकने यात। अय्नं परमप्रभुं पश्चाताप यानाः वय्कःयाथाय् लिहां वयेगु निंतिं सःता च्वंग दु धकाः योएलं मनूतय्त धाःगु दु। अले परमप्रभुं मनूतय्त हाकनं न्हापायागु हे बांलाःगु अवस्थाय् थापं यानादी व वय्कःलं बाचा यानादीकथं इमित आशिष बियादी धकाः नं धाःगु दु।
थ्व सफूया तसकं दुग्यंगु ब्वः २:२८-३२ पद खः, परमप्रभु परमेश्वरं थः फुक्क मनूतय्त थःगु पवित्र आत्मा बीगु बचं बियादीगु दु धकाः योएलं धाल। अले थ्व खँ प्रेरित २:१७-२१ पदय्, पेन्तिकोसया दिंखुन्हु जूगु थुपिं खँतपाखें योएलया थ्व भविष्यवाणी सत्य खः धयागु दसि बिल धकाः पत्रुसं धाल।
धलः पौ
क्वःबुइँचातय्गु विपत्ति १:१–२:१७
हाकनं थापं यायेगु बचं २:१८-२७
परमप्रभुया दिं २:२८–३:२१
योएल
1
क्वःबुइँचातय्सं देशयात भज्यंक स्यंकाब्यूगु
1 पतुएलया काय् योएलयाके वःगु परमप्रभुया वचन।
2 हे थकालिपिं मनूत, थ्व खँ न्यँ!
हे यहूदा देशय् च्वंपिं सकल मनूत, बांलाक ध्यान बियाः न्यँ!
छु छिमिगु इलय् अथवा छिमि तापाःबाज्यापिनिगु इलय्
गुबलें थथे जूगु दु ला?
3 छिमि काय् म्ह्याय्पिन्त थ्व खँ न्यंकि,
अले छिमि काय् म्ह्याय्पिन्सं इमि काय् म्ह्याय्पिन्त न्यंकेमाः
अले इमि काय् म्ह्याय्पिन्सं मेगु पुस्तायात न्यंकेमाः।
4 चाइपिं क्वःबुइँचातय्सं गुलि त्वःताथकूगु खः,
व पुचलय् वःपिं क्वःबुइँचातय्सं नयावन।
पुचलय् वःपिं क्वःबुइँचातय्सं गुलि त्वःताथकूगु खः,
व तिंन्हुइपिं क्वःबुइँचातय्सं नयाबिल।
तिन्हुइपिं क्वःबुइँचातय्सं गुलि त्वःताथकूगु खः,
व स्यंकीपिं क्वःबुइँचातय्सं नयाबिल।
5 अय् अय्लाःगुलुत दँ, तःसलं ख्व!
अय् दाखमद्य त्वनीपिं न्हूगु दाखमद्यया लागिं ह्वाँय्ह्वाँय् ख्व,
छाय्धाःसा आवंलि छिमिगु म्हुतुइ दाखमद्य लाइ मखुत।
6 अल्याख मनूत दुगु छगू बल्लाःगु जातिं
जिगु देशयात हमला याःगु दु।
वयागु वा मिजंम्ह सिंहया वाथें च्वं
अले वयागु धँवा मिसाम्ह सिंहयागु थें च्वं।
7 वं जिगु दाखमा न्हंका ब्यूगु दु,
अले जिगु यःमरिमा सखाप यानाब्यूगु दु।
वं उकियागु ख्वला प्वलाः नांगा यानाः वान्छ्वया बिल।
अले दाखमायागु कचायात तुइसे च्वंकाः त्वःताबिल।
8 थः ल्यासे जूबलय्याम्ह भाःतया निंतिं
भांग्रा फिनाः ख्वइम्ह ब्याहा जुइत्यंम्ह मिसा थें ह्वाँय्ह्वाँय् ख्व।
9 परमप्रभुया देगलय् अन्नबलि व त्वँसाबलि छायेगु बन्द जूगु दु।
परमप्रभुया न्ह्यःने परमप्रभुया सेवक पुजाहारीत ह्वाँय्ह्वाँय् ख्वयाच्वन।
10 बुँयात उजाड यानाब्यूगु दु।
बँ सुख्खा जूगु दु,
अन्न नष्ट जूगु दु,
न्हूगु दाखमद्य मदये धुंकल,
चिकं नं मदये धुंकल।
11 अय् बुँज्या याइपिं, निराश जु।
अय् दाखमा पीपिं ह्वाँय्ह्वाँय् ख्व।
छ्व व तछ्वया लागिं ह्वाँय्ह्वाँय् ख्व,
छाय्धाःसा बुँयागु अन्न नष्ट जूगु दु।
12 दाखमा सुकूचिन,
यःमरिमा गन।
धालेमा, खजूरमा, स्याउमा,
क्यबयागु थुपिं फुकं मा सुकूचिना वन।
धात्थें हे मनूतय्गु लय्ता नं फुनावंगु दु।
पस्ताय् चायेत इनाप
13 हे पुजाहारीत, भांग्रा फिनाः नुगःपा दादां ख्व!
हे वेदीया न्ह्यःने सेवा याइपिं, ह्वाँय्ह्वाँय् ख्व!
हे जिमि परमेश्वरया न्ह्यःने सेवा याइपिं,
भांग्रा फिनाः चच्छि च्वँ,
छाय्धाःसा छिमि परमेश्वरया छेँय्
अन्नबलि व त्वँसाबलि छाये हयेगु दीधुंकल।
14 पवित्र अपसं घोषणा या,
पवित्र मुँज्या सःति।
परमप्रभु छिमि परमेश्वरयागु देगलय्
देशय् च्वंपिं सकल मनूत
अले थकालितय्त मुंकाः
परमप्रभुयात पुकारा या।
15 हाय! व दिं!
छाय्धाःसा परमप्रभुया दिं लिक्क दु।
व ला दक्व शक्ति दुम्हपाखें सर्वनाश थें हे वइ।
16 झीगु मिखां खंक हे नयेगु नसा नष्ट मजू ला?
अले आनन्द व लय्ता परमेश्वरयागु देगलय् बन्द याःगु मदु ला?
17 पुसा चाग्वारा क्वय् सेकुन,
धुकुति उजाड यानाबिल,
अले अन्नया धुकुति न्हनावन,
छाय्धाःसा अन्न सुकूगनावने धुंकल।
18 पशुत गथे यानाः ख्वयाच्वंगु दु।
सा द्वहंतय्गु बथांत वाथा वाथा जुयाच्वंगु दु
छाय्धाःसा इमिगु निंतिं ज्वयेगु थाय् मदु।
फैच्वलय्या पुचः नं कष्टय् लानाच्वंगु दु।
19 हे परमप्रभु, जिं छिके ग्वाहालि फ्वने।
छाय्धाःसा मरुभूमिइ च्वंगु घाँय्ख्यः मिं नःगु दु,
अले मिंयागु जलां गुँइच्वंगु सिमा छ्वय्काब्यूगु दु।
20 गुँपशुतय्सं नं छिके ग्वाहालि फ्वनी,
छाय्धाःसा खुसि सुनावने धुंकल,
मिं पशुत ज्वयेगु थाय्यात भस्म याःगु दु।