50
बेबिलोनया बारे अगमवाणी
1 बेबिलोन व बेबिलोनीतय्गु देशया बारे यर्मिया अगमवक्तापाखें परमप्रभुं धयादीगु वचन थ्व हे खः,
2 “जाति जातियात कँ,
अले झण्डा ल्ह्वनाः न्यंकि,
छुं खँ नं सुचुके मते, तर थथे धा,
‘बेबिलोनयात कब्जा याइ,
वया द्यः बेल लज्याय् लाइ,
वया द्यः मरोदकयात नाश याइ।
वयागु शालिकतय्त बेइज्जत याइ,
वयागु मूर्तित आतंकं जाइ।’
3 छाय्धाःसा उत्तरपाखें छगू जातिं वयात हमला याइ,
अले वयागु देशयात झिजांमिजां दंगुथाय् यानाबी।
अन सुं च्वनी मखु,
मनूत व पशुत निथिं बिस्युं वनी।”
इस्राएलीत थःगु देशय् लिहां वःगु
4 “उपिं दिनय्, उगु इलय् इस्राएलया मनूत
व यहूदाया मनूत नापनापं ख्वख्वं थः परमप्रभु परमेश्वरयात माःवनी,” परमप्रभुं धयादी।
5 “इमिसं सियोनपाखे वनीगु लँ गुगु खः धकाः न्यनी
अले थःगु ख्वाः उखेपाखे स्वय्की।
इपिं वयाः थःत हे परमप्रभुयाथाय्
गुबलें ल्वःममंकीगु सदांया बाचाय् ची।
6 “जिम्ह प्रजा तंपिं फैत थें जूगु दु।
इमि जवाःतय्सं इमित मखुगु लँय् यंकूगु दु।
अले पहाड पहाडय् मखुगु लँय् वंके ब्यूगु दु।
डाँडा डाँडाय् व पहाड पहाडय् चाःह्यु वँवं
इमिसं थः च्वनीगु थाय्यात ल्वःमंकल।
7 इमित नापलाकूपिन्सं इमित नयाबिल।
इमि शत्रुतय्सं धाल, ‘थुकी जिमिगु छुं दोष मदु,
छाय्धाःसा इमिसं इमिगु खःगु च्वनेगु थाय् परमप्रभु,
इमि पुर्खातय्गु आशा, परमप्रभुया विरोधय् पापयात।’
8 “बेबिलोनं बिस्युं हुँ!
बेबिलोनीतय्गु देश त्वःति,
अले थःगु बथांयात लँ क्यनीपिं दुगुचात थें जु!
9 छाय्धाःसा स्व!
जिं उत्तरयागु देशं ततःधंगु जातियात ग्वाकाः इमिगु पुचःयात बेबिलोनया विरोधय् हये।
इमिसं बेबिलोनया विरोधय् लडाइँया लागि तयारी याइ,
अले वयात उत्तरपाखें कब्जा याइ।
इमिगु वाण बहादुर सिपाइँतय्गु थें जुइ,
गुगु अथें लिहांवनी मखु।
10 अथे जुयाः बेबिलोनयात लुटपाट याइ,
इमित लुतय् याइपिं सकसिके गाक्क दइ,”
परमप्रभुं धयादी।
बेबिलोन पतन जूगु
11 “जिगु सर्बययात लुटपाट याःम्ह छ न्ह्यइपुकाः लय्ताःगुलिं,
छ अन्न दाःबलय् लय्तायाः तिंन्हूम्ह साचा थें जूगुलिं
अले बल्लाःपिं सलत थें हाःगुलिं,
12 छंगु लागिं मां थें च्वंगु छंगु शहर तसकं लज्याय् लाइ,
सुनां छन्त बुइकल वयात क्वह्यंकी।
व जातित मध्ये दकलय् चिधं जुइ,
झिजांमिजां दंगुथाय्, सुख्खा जमिन व मरुभूमि थें व जुइ।
13 परमप्रभुया तमं यानाः अन सुं च्वने खनी मखु,
तर व झिजांमिजां दंगुथाय् जुइ।
बेबिलोन जुयाः वनीपिं सकलें अजू चाइ,
अले घाः खनाः इपिं ग्याइ।
14 “हे धनुष वाण चले याइपिं सकलें
बेबिलोनया प्यखेरं लडाइँया लागि तयार जुयाच्वँ!
छपु नं वाण मल्यंक वयात कय्कि!
छाय्धाःसा वं परमप्रभुया विरोधय् पाप याःगु दु।
15 वयागु प्यखेरं च्वनाः तःसलं हा!
वं थःत लःल्हाइ। वयागु धरहरात क्वःदली,
वयागु पःखाःयात थुनाबी।
वयात बदला का,
छाय्धाःसा परमप्रभुया बदला थ्व हे खः।
वं मेपिन्त गथे यात वयात नं अथे हे या।
16 पुसा ह्वलिपिं व इँचा ज्वनाः छ्व लइपिन्त बेबिलोनं नाश या।
अत्याचारीया तरवारं यानाः सकसितं थथःगु छेँय् लिहां वनेब्यु,
सकलें थथःगु देशय् लिहां वनेमाः!”
इस्राएलीत लिहां वःगु
17 “इस्राएल ला सिंहं लिनाः छ्यालब्याल जूगु बथां थें खः।
वयात न्हापा ला अश्शूरयाम्ह जुजुं नल,
लिपतय् बेबिलोनयाम्ह जुजु नबूकदनेसरं वयागु क्वँय्त त्वथुलाबिल।”
18 उकिं, दक्व शक्ति दुम्ह परमप्रभु,
इस्राएलया परमेश्वरं थथे धयादी,
“जिं थःम्हं हे अश्शूरयाम्ह जुजुयात सजाँय बियागु थें
बेबिलोनयाम्ह जुजु व वयागु देशयात सजाँय बी।
19 तर जिं इस्राएलयात वयागु थःगु हे ख्यलय् लित हये
अले व कर्मेल व बाशानय् जइ।
वयागु नये पित्याःगु एफ्राइम व गिलादया डाँडाय् लुधनी।”
20 परमप्रभुं धयादी,
“उपिं दिनय्, उगु इलय् इस्राएलया अपराधयात माली,
तर छगू नं लुइ मखु,
अले यहूदाया पाप नं माली तर छगू नं लुइ मखु।
छाय्धाःसा जिं बचय् यानातयागु ल्यं दुगु ब्वयात जिं क्षमा याये।”
बेबिलोनयात परमेश्वरया सजाँय
21 “मरातैम देश व पकोदय् च्वंपिन्त हमला या।
इमित ल्यू, स्या अले इमित भज्यंक नाश या,”
परमप्रभुं धयादी।
“जिं छिमित आज्ञा बियागु फुक्क या!
22 देशय् लडाइँ
व विनाशया हाःसः दु।
23 फुक्क पृथ्वीया मुगः बेबिलोन तज्याःगु व कुचा कुचा जूगु दु।
जाति जातिया दथुइ बेबिलोन झिजांमिजां दंगु दु।
24 हे बेबिलोन, जिं छंगु लागि जाः तया।
छं सी न्ह्यः हे छ उकी तक्यन।
छन्त मालाः ज्वंगु दु।
छाय्धाःसा छं परमप्रभुया विरोध याना जुल।
25 परमप्रभुं थःगु ल्वाभःया धुकू चाय्कादीगु दु,
अले थःगु तंया ल्वाभः पिकयादीगु दु।
छाय्धाःसा दक्व शक्ति दुम्ह परमप्रभु परमेश्वरं
बेबिलोनीतय्गु देशय् यायेमाःगु ज्या दु।
26 ताताःपाःगु थासं वयाथाय् वा!
वयागु अन्नया धुकू तछ्यानाः चाय्कि!
वयात अन्नया द्वँ थें द्वँचिंकाब्यु!
वयात भज्यंक नाश यानाब्यु!
अले वयागु छुं नं ल्यं मदय्मा!
27 वया फुक्क द्वहंचात स्यानाब्यु!
उपिं स्याइगु थासय् यंकेमाः!
इमित धिक्कार दु! छाय्धाःसा इमिगु दिं वःगु दु।
इमित सजाँय बीगु ई थ्यंकः वल।
28 परमप्रभु झी परमेश्वरं वय्कःया देगःया निंतिं
गय् यानाः बदला कयादिल धकाः
सियोनय् घोषणा याइपिं बेबिलोन देशं बिस्युं वःपिं
व शरण काःवपिनिगु खँ न्यँ!
29 “धनुष वाणं कय्किपिं सकलें मनूतय्त बेबिलोनया विरोधय् सःता हजि।
वया प्यखेरं छाउनी तयाः घेरय् या,
सुं नं बिस्युं वने मफयेमा।
वयागु ज्या स्वयाः वयात बदला ब्यु!
वं गथे याःगु दु, वयात अथे हे या!
छाय्धाःसा वं इस्राएलया पवित्र परमेश्वरयात मभिंका खँ ल्हाःगु दु।
30 उकिं वया ल्याय्म्हपिं मिजंतय्त वयागु लँय् स्याइ।
वया सकलें सिपाइँत उखुन्हु सुम्क च्वनी,”
परमप्रभुं धयादी।
31 “हे घमण्डी, स्व, जि हे छंगु विरोधय् दु,”
प्रभु, दक्व शक्ति दुम्ह परमप्रभुं धयादी,
“छाय्धाःसा छंगु दिं वःगु दु,
जिं छन्त सजाँय बीगु दिं।
32 घमण्डी धाःसा लुफिं हायाः दइ,
अले सुनानं वयात दनेत ग्वाहालि याइ मखु।
जिं वयागु शहर शहरय् मि तयाबी,
उकिं वयागु प्यखेरं दुपिं फुक्कसित भस्म याइ।”
33 दक्व शक्ति दुम्ह परमप्रभुं थथे धयादी,
“इस्राएल व यहूदाया मनूतय्त क्वत्यलातःगु दु।
इमित ज्वनायंकूपिं सकसिनं इमित बल्लाक ज्वनातःगु दु।
इमिसं इमित वनेबी मखु।
34 अय्नं इमित उद्धार याइम्ह बल्लाः,
वय्कःया नां दक्व शक्ति दुम्ह परमप्रभु खः।
वय्कलं इमिगु मुद्दा म्हितादी अले देशय् शान्ति हयादी,
तर बेबिलोनय् च्वंपिन्के धाःसा अशान्ति हयादी।
35 “बेबिलोनीतय्गु विरोधय् छपु तरवार!”
परमप्रभुं धयादी,
“बेबिलोनय् च्वंपिनिगु विरोधय्
अले वया हाकिमत व बुद्धि दुपिं मनूतय्गु विरोधय्।
36 इमि मखुपिं अगमवक्तातय्गु विरोधय् नं छपु तरवार।
इपिं मूर्ख जुइ।
वया सिपाइँतय्गु विरोधय् नं छपु तरवार।
इपिं आतंकं जाइ।
37 वया सलत व रथत
व वया दथुइ दुपिं विदेशी सिपाइँतय्गु विरोधय् छपु तरवार!
इपिं मिस्त थें बमलाइ।
वयागु धन सम्पत्तिया विरोधय् छपु तरवार चलय् जुइ,
इमित लुतय् याइ।
38 वयागु लः सुनावनेमा धकाः वयागु विरोधय् वा मवइगु ई,
छाय्धाःसा व मूर्तित हे मूर्तित दुगु देश खः,
वया द्यःत ग्यानाः वँय् जुइ।
39 “उकिं अन मरुभूमिया पशुत व धोंत च्वनी
अले न्हिकांझंगः नं च्वनी।
अन हाकनं गुबलें सुं नं मनू च्वनी मखु,
पुस्तां पुस्ता तक अन सुं नं च्वनी मखु।”
40 “सदोम व गमोरा
अले उकिया जःखः च्वंगु शहरतय्त जि परमेश्वरं नाश यानागु थें,
बेबिलोनय् सुं मनू च्वनी मखु।
सुं नं मनू अन च्वनाच्वनी मखु।
परमप्रभुं धयादी,
41 “स्व! छगू सेना उत्तरपाखें वयाच्वंगु दु।
छगू तःधंगु जाति व यक्व जुजुपिं
पृथ्वीया तातापाःगु थासं लडाइँया लागि तयार जुयाच्वंगु दु।
42 इमिसं धनुष व भाला घानातःगु दु।
इपिं तसकं नुगः छाःपिं, इमिके दयामाया धाःसा मदु।
इपिं सल गयाः वइबलय् इमिगु सः समुद्रयागु थ्वःसः थें च्वं।
हे बेबिलोन! इपिं छन्त हमला यायेत लडाइँया लागिं झ्वःलिंक वःपिं मनूत थें वइ।
43 बेबिलोनयाम्ह जुजुं इमिगु बारे न्यन,
वयागु ल्हाः याग्लाप्याग्ला जुल।
मचाबू ब्यथा जूम्ह मिसा थें वयात धन्दा जुल।
44 स्व! यर्दनया झालं यक्व घाँय्ख्यः दुगु थासय् सिंह वः थें,
जिं बेबिलोनयात पलखं हे वयागु देशं लिनाछ्वये।
अले सुयात जिं ल्यये वयात हे जिं तये।
छाय्धाःसा जि थें जाःम्ह सु दु?
सुनां जितः चुनौती बी फु?
जिगु न्ह्यःने दनाच्वने फुम्ह सु फैजवाः दु?”
45 उकिं बेबिलोनया विरोधय् परमप्रभुं दय्कादीगु योजना।
अले बेबिलोनीतय्गु देशया विरोधय् वय्कःया इच्छा छु दु न्यँ,
बथांयापिं चिचीधिकःपिं फैया मस्तय्त घिसय् यानाः यंकी।
इमिसं यानाः वं इमिगु घाँय्ख्यःयात भज्यंक नाश यानाबी।
46 बेबिलोन कब्जा याःबलय् ताये दुगु सलं पृथ्वी थरथर खाइ।
वयागु ख्वःसः जाति जातितय्थाय् तक थ्वइ।