यहोशूया सफू
म्हसीका
यहोशूया सफू इस्राएलीतय्सं कनान देशय् हमला याःगु घटनाया सफू खः। उगु इलय् मोशा सीधुंकाः यहोशू वया थासय् इस्राएलया नायः जूगु खः। थ्व सफूया मू नायः यहोशू हे जूगुलिं थ्व सफूयागु नां “यहोशू” तःगु खः। थ्व सफूया मू विषय परमेश्वरं इमित बी धकाः बचं बियादीगु देश त्याकाकाःगु खः।
थ्व सफुलिइ दुगु लुमंके बहःगु घटना थुपिं खः – यर्दन खुसि छ्यूगु, यरीहो शहर त्याकाकाःगु, ऐ शहरयागु लडाइँ, कनान देशया ल्यंदुगु इलाका त्याकाकाःगु, झिंनिगू कुलयात जमिन इनाब्यूगु अले परमेश्वर व वय्कःया मनूतय्गु दथुइया बाचायात न्हूगु यानाः च्यूगु।
यहोशूं थःगु जिवंकाछि परमेश्वरयाके भलसा तल अले वय्कःया खँ न्यन। परमेश्वरया खँ न्यंसा भिं जुइ अले वय्कःया खँ मन्यंसा इमित बांलाइ मखु धकाः यहोशूं इस्राएलतय्त ख्याच्वः ब्यूगु खँ नं थुकी दु। वं तःक्वः मछि इमित हपाः बिल। अले थः नं परमेश्वरया विश्वास याये बहःम्ह जुया हे च्वन।
थ्व सफूया दकलय् नांदंगु छगू पद खः, “सुयागु सेवा यायेगु खः व छिमिसं थौं हे ल्य, जि व जिमि छेँजःपिन्सं धाःसा परमप्रभुया हे सेवा याये।” (२४:१५)
धलः पौ
कनान देश त्याकूगु १:१–१२:२४
देश ब्वथःगु
१. यर्दन खुसिया पुर्बया इलाका १३:१-३३
२. यर्दन खुसिया पच्छिमया इलाका १४:१–१९:५१
३. शरण कायेगु शहरत २०:१-९
४. लेवीया सन्तानतय्गु शहरत २१:१-४५
पुर्बय् च्वंगु कुलयापिं मनूत थःगु इलाकाय् लिहां वंगु २२:१-३४
यहोशूया दकलय् लिपांगु भाषण २३:१-१६
शकेमय् बाचायात हाकनं न्हूगु यानाः च्यूगु २४:१-३३
यहोशू
1
यहोशूयात नायः ल्यःगु
1 परमप्रभुया दास मोशा सी धुंकाः परमप्रभुं वयात ग्वाहालि याइम्ह नूनया काय् यहोशूयात थथे धयादिल,
2 “जिम्ह दास मोशा सित। अथे जुयाः आः छ व थुपिं सकलें इस्राएलीत यर्दन खुसिया उखे जिं इमित बीत्यनागु देशय् वनेत तयार जु।
3 मोशायात जिं बचं बियागु थें छं पलाः तइगु फुक्क थाय् जिं छन्त बी।
4 छिमिगु देशया सिमाना दच्छिनय् च्वंगु मरुभूमिंनिसें उत्तरय् लेबनानया पहाड तक, पुर्बय् तःधंगु खुसि यूफ्रेटिसंनिसें हित्तीतय्गु देश तक कयाः पच्छिमय् भूमध्यसागर तक थ्यनी।
5 छ म्वानाच्वंतले छंगु विरोधय् सुं दनाच्वने फइ मखु। गथे जि मोशानापं च्वना, अथे हे जि छनापं च्वने। जिं छन्त गुबलें त्वःते मखु, गुबलें त्यागय् याये मखु।
6 बल्ला व साहसी जु! छाय्धाःसा जिं इमि पुर्खातय्त बी धकाः पाफयागु देश इमिगु अधिकारय् हयेत छ हे इमि न्ह्यलुवाः जुइ।
7 “बल्ला व तसकं साहसी जु! जिम्ह दास मोशां छन्त ब्यूगु फुक्क व्यवस्था बांलाक मानय् या। उकिं जवय् खवय् फस्वये मते! अले छ न्ह्याथाय् वंसां अन ताःलाइ।
8 व्यवस्थाया थ्व सफू छंगु म्हुतुं चिलामवनेमाः। चान्हि उकी ध्यान ब्यु! अले उकी च्वयातःगु फुक्क खँ बांलाक मानय् या। अले छंगु भिं जुइ अले छ ताःलाइ।
9 जिं छन्त आज्ञा बियागु, मखु ला? बल्ला व साहसी जु! ग्याये मते, नुगः क्वतुंके मते, छाय्धाःसा छ न्ह्याथाय् वंसां परमप्रभु छिमि परमेश्वर छनापं दइ।”
यर्दन खुसि छीगु तयारी
10 अले यहोशूं मनूतय् नायःतय्त उजं बिल,
11 “छाउनी दथुइ जुयावनाः मनूतय्त उजं बियाः धा, ‘थथः नयेगु सामान ठीक या, छाय्धाःसा थनिं स्वन्हु खुन्हु परमप्रभु छिमि परमेश्वरं छिमित बियादीगु देश अधिकार यायेत छिपिं थ्व यर्दन पारि वनेमाः।’ ”
12 यहोशूं रूबेनी, गादी व मनश्शेया बच्छि कुलयात धाल,
13 “परमप्रभु छिमि परमेश्वरं छिमित आराम बियादी अले छिमित थ्व देश बियादीगु दु धकाः परमप्रभुया दास मोशां छिमित ब्यूगु आज्ञा लुमंकी।
14 ‘छिमि कलाःपिं, मचाखाचा व सा द्वहं मोशां छिमित यर्दनया पुर्बपाखे ब्यूगु देशय् च्वने फइ। लडाइँ याइपिं मिजंत धाःसा मेपिं इस्रएलीतय्त ग्वाहालि यायेत ल्वाभः ज्वनाः इमिगु न्ह्यः न्ह्यः पारि वनेमाः।
15 परमप्रभु छिमि परमेश्वरं बियादीगु यर्दनया पच्छिम पाखेया देश त्याकाः मकातले छिपिं न्ह्यः न्ह्यः वनेमाः। परमप्रभुं छिमित थें इमित आराम बियादी धुंकाः छिपिं लिहां वयाः परमप्रभुया दास मोशां यर्दनया पुर्बय् छिमित ब्यूगु देशय् च्वने फइ।’ ”
16 अले इमिसं यहोशूयात थथे लिसः बिल, “छिं जिमित छु छु आज्ञा बियादिल व जिमिसं याये, अले छिं गन गन छ्वयादिल अन अन जिपिं वने।
17 जिमिसं मोशायागु फुक्क खँ न्यनागु थें हे छिगु खँ नं न्यने। परमप्रभु छिकपिनि परमेश्वर मोशानापं दीगु थें छिनापं नं दीमा।
18 छिगु वचनया विरोध याःम्ह व वचन मानय् मयाःम्ह अले छिगु आज्ञा मानय् मयाःम्ह न्ह्याम्ह हे जूसां वयात स्यानाछ्वइ। छि बल्ला व साहसी जक जुयादिसँ।”