10
गिबोनीतय्सं यहोशूयाके ग्वाहालि फ्वंगु
1 यहोशूं यरीहो व अनयाम्ह जुजुयात थें हे ऐ व अनयाम्ह जुजुयात नं त्याकाः नाश यात धयागु खँ यरूशलेमयाम्ह जुजु अदोनिसेदेकं न्यन। गिबोनीतय्सं इस्राएलीतनापं सन्धि याःगु दु, अले इपिंनापं मिलय् जूगु दु धयागु खँ नं वं न्यन।
2 जुजु व वया मनूत तसकं ग्यात, छाय्धाःसा गिबोन छगू राजधानी शहर ति हे तःधं, व शहर ऐ स्वयाः तःधं व अनयापिं मनूत बांलाक ल्वायेसःपिं मनूत खः।
3 उकिं यरूशलेमयाम्ह जुजु अदोनिसेदेकं हेब्रोनयाम्ह जुजु होहाम, यर्मूतयाम्ह जुजु पिराम, लाकीशयाम्ह जुजु यापी व एग्लोनयाम्ह जुजु दबीरयात थथे धाय्के छ्वत,
4 “छि जिथाय् झायाः गिबोननापं ल्वायेत ग्वाहालि बियादिसँ, छाय्धाःसा अन च्वंपिं मनूतय्सं यहोशू व इस्राएलीतलिसें सन्धि याःगु दु।”
5 अथे जुयाः यरूशलेम, हेब्रोन, यर्मूत, लाकीश व एग्लोनयापिं न्याम्हं एमोरी जुजुपिन्सं थथःगु फुक्क सेना छथाय् मुंकाः गिबोनलिसें ल्वाः वन।
6 गिबोनीतय्सं गिलगालया छाउनीइ यहोशूयाथाय् थ्व बुखँ छ्वल, “छःपिनि दासतय्त त्वःतादी मते। जिमिथाय् याकनं झायाः जिमित ग्वाहालि यानादिसँ, छाय्धाःसा पहाडी देशय् च्वनिपिं एमोरीतय् फुक्क जुजुपिं जिपिंनापं ल्वाः वयेत मुंगु दु।”
7 अथे जुयाः यहोशूं थः सेना, दकलय् बांलाक ल्वायेसःपिं सिपाइँत कयाः गिलगालं न्ह्याः वन।
8 परमप्रभुं यहोशूयात धयादिल, “इपिं खनाः ग्याये मते, छाय्धाःसा जिं इमित छंगु ल्हातय् बियागु दु। इपिं मध्ये सुं छम्ह नं छंगु न्ह्यःने दने फइ मखु।”
सूर्य दिनाच्वंगु
9 गिलगालं चच्छि न्यासि वनाः यहोशू व वया सेनां आकाझाकां एमोरीतय्त हमला यात।
10 परमप्रभुं एमोरीतय्त भ्वय्भ्वय् कंकादिल अले इस्राएलीतय्सं इमित गिबोनय् बांमलाक बुकल। अले बेथ-होरोनया तँचाय् इमित लिनाः आजेका व मक्केदा तक हे स्यास्यां क्वहां वन।
11 हानं इपिं इस्राएलीतय्गु न्ह्यःनें आजेका तक हे तँचाय् बिस्युं वनाच्वंबलय् परमप्रभुं आकाशं इमिथाय् ततःग्वःगु प्वँ गाकादिल। इस्राएलीतय्गु तरवारं सीपिं मनूत स्वयाः अप्वः मनूत प्वँ दायाः सित।
12 परमप्रभुं एमोरीतय्त इस्राएलीतय्गु ल्हातय् बियादीखुन्हु यहोशूं इस्राएलीतय्गु न्ह्यःने परमप्रभुयात प्रार्थना यानाः धाल,
“हे सूर्य, छ गिबोनया च्वय्,
हे तिमिला, छ धाःसा अय्यालोनया ब्यासिया च्वय् दिना च्वँ।”
13 उगु जातिं शत्रुतय्त ब्वला मसातले
सूर्य व तिमिला दिनाच्वन।
थ्व खँ याशारया सफुलिइ च्वयातःगु दु।
सूर्य आकाशया दथुइ दिनाच्वन, न्हिछि हे सूर्य बिना मवं।
14 परमप्रभुं छम्ह मनूया खँ न्यनादिल। उखुन्हु थें न्हापा व लिपा गुबलें मजू। धात्थें हे इस्राएलीतय्गु निंतिं परमप्रभुं ल्वानादिल।
15 अनंलि यहोशूनापं फुक्क इस्राएलीत गिलगालया छाउनीइ लिहां वल।
न्याम्ह एमोरी जुजुपिन्त स्याःगु
16 इपिं न्याम्ह जुजुपिं धाःसा बिस्युं वनाः मक्केदाया गुफाय् सुलाच्वन।
17 उपिं न्याम्हं जुजुपिं मक्केदाया गुफाय् सुलाच्वंगु लुल धयागु सुचं यहोशूयाथाय् थ्यन।
18 वं धाल, “ततःग्वःगु ल्वहंत ग्वारातुइकाः गुफाया म्हुतुइ तयाब्यु, अले इमित पिया च्वनेत छुं मनूतय्त उकिया न्ह्यःने ति।
19 तर छिपिं दी मते, छिमि शत्रुतय्त लिना हे च्वँ, इमि ल्युने लाःपिन्त स्यानाछ्व। इमित थथःगु शहरय् दुहां वनेबी मते। छाय्धाःसा परमप्रभु छिमि परमेश्वरं इमित छिमिगु ल्हातय् बियादीगु दु।”
20 यहोशू व इस्राएलीतय्सं इमित नाश याःबलय् इमि बचय् जूपिं छुं मनूत जक पखाः दुगु थथःगु शहरय् दुहां वन।
21 सकल सेना मक्केदाया छाउनीइ यहोशूयाथाय् बांलाक लिहां वल। इस्राएलीतय्गु विरोधय् सुनानं छसः नं न्वमवाः।
22 अले यहोशूं धाल, “गुफाया म्हुतु चाय्काः इपिं न्याम्ह जुजुपिन्त गुफां लिकयाः जिथाय् हजि।”
23 इमिसं अथे हे यात- यरूशलेमयाम्ह जुजु, हेब्रोनयाम्ह जुजु, यर्मूतयाम्ह जुजु, लाकीशयाम्ह जुजु व एग्लेनयाम्ह जुजु, थुपिं न्याम्हं जुजुपिन्त गुफां पितहल।
24 इमिसं थुपिं जुजुपिन्त यहोशूयाथाय् हये धुंकाः वं इस्राएलयापिं सकल मनूतय्त सःतल अले इपिंलिसे वःपिं लडाइँया सेना नायःतय्त सःताः धाल, “थुखे वा, छिमिगु तुति जुजुपिनिगु ककुइ ति।” अले इपिं वयाः थथःगु तुति थुमिगु ककुइ तल।
25 यहोशूं इमित धाल, “ग्याये मते, नुगः क्वतुंके मते। बल्ला व साहसी जु, छाय्धाःसा छिमिसं ल्वाय्माःपिं छिमि शत्रुत फुक्कसित परमप्रभुं थथे हे यानादी।”
26 अनंलि यहोशूं इपिं जुजुपिन्त स्यात अले इमित न्यागू थामय् सुयाब्यु धकाः थः मनूतय्त आज्ञा बिल। इपिं सन्ध्याकाः ई तक थामय् हे यग्गानाच्वन।
27 सूर्य बिनावंबलय् यहोशूं आज्ञा बिल अले इमित थामं क्वकयाः इपिं सुलाच्वंगु व हे गुफाय् वांछ्वयाबिल। गुफाया म्हुतुइ ततःग्वःगु ल्वहंत तयाबिल। उपिं ल्वहंत थौं तक नं अन हे दनि।
दच्छिनपाखे लाःगु शहर त्याकाकाःगु
28 उखुन्हु यहोशूं हमला यानाः मक्केदा शहर त्याका काल। अले वं शहरयात नाश यानाबिल। अले वं अनयाम्ह जुजु व अन च्वंपिं सकल मनूतय्त तरवारं स्यानाबिल। वं यरीहोयाम्ह जुजुयात याः थें मक्केदाया जुजुयात नं यात।
29 अनंलि यहोशू सकल इस्राएलीतनापं मक्केदां लिब्ना वन, अले उकियात हमला यात।
30 परमप्रभुं व शहर व अनयाम्ह जुजुयात इस्राएलीतय्गु ल्हातय् बियादिल, अले वयात व अन दुपिं सकल मनूतय्त तरवारं स्यानाबिल। वं अन सुयातं नं बाकि मतल। यरीहोयाम्ह जुजुयात वं गथे याःगु खः अनयाम्ह जुजुयात नं वं अथे हे यात।
31 अनंलि यहोशू सकल इस्राएलीतलिसें लिब्नां लाकीशय् थ्यंकः वल। अले उकियात घेरय् यानाः हमला यात।
32 परमप्रभुं लाकीशयात इस्राएलीतय्गु ल्हातय् बियादिल। थथे निगूगु दिंखुन्हु इमिसं उकियात त्याका काल। वं लिब्नायात याःगु थें हे व शहर व अन दुपिं सकल मनूतय्त तरवारं नाश यात।
33 अबलय् हे लाकीशयात ग्वाहालि बीत गेजेरयाम्ह जुजु होराम वल। यहोशूं वयात व वया सेनायात बुकल, छम्हय्सित नं म्वाःका मतः।
34 अनंलि यहोशू सकल इस्राएलीतलिसें लाकीशं एग्लोनय् वन, उकियात घेरय् यानाः हमला यात।
35 उखुन्हु हे इमिसं उकियात त्याका काल, अले लाकीशय् याःगु थें तुं अनयापिं सकल मनूतय्त तरवारं नाश यानाबिल।
36 हानं यहोशू सकल इस्राएलीतनापं ऐग्लोनं हेब्रोनय् वन। इमिसं व शहरयात हमला यात।
37 इमिसं व शहरयात त्याका काल। अनयाम्ह जुजुयात, अन दुपिं सकल मनूतय्त व उकिया थुखे उखेया गांयापिं मनूतय्त तरवारं स्यानाबिल। इमिसं सुयातं बाकि मतसें एग्लोनय् याःगु थें तुं उकियात व अन दुपिं फुक्कसित भज्यंक नाश यानाबिल।
38 अले यहोशू सकल इस्राएलीतनापं दबीरय् लिहां वयाः उकियात हमला यात।
39 इमिसं जुजुनापं शहरयात व उकिया फुक्क गांयात त्याका काल। इमिसं अन दुपिं फुक्कसित भज्यंक नाश यानाबिल। इमिसं सुं छम्हय्सित नं म्वाःका मतः। इमिसं हेब्रोन व लिब्ना अले अनयाम्ह जुजुयात याःगु थें तुं दबीर व अनयाम्ह जुजुयात नं यात।
40 थुकथं यहोशूं पहाडी देश, दच्छिनया देश नेगेव, पच्छिमया फेदी, पुर्बया पाःचा व अनयापिं फुक्क जुजुपिन्त बुकल। वं छम्हय्सित नं म्वाःका मतः। परमप्रभु इस्राएलया परमेश्वरं आज्ञा बियादीगु थें वं अन दुपिं फुक्कसित भज्यंक नाश यानाबिल।
41 थथे यहोशूं कादेश-बर्नेंनिसें कयाः गाजा तक व गोशेनंनिसें गिबोन तकयापिं मनूतय्त स्यानाबिल।
42 थुपिं फुक्क जुजुपिन्त इमिगु देशतनापं यहोशूं छकलं हे त्याकल छाय्धाःसा परमप्रभु इस्राएलयाम्ह परमेश्वरं हे इस्राएलीतय्गु निंतिं ल्वानादीगु खः।
43 अनंलि यहोशू फुक्क सेनानापं गिलगालयागु छाउनीइ लिहां वल।