17
इस्राएलयाम्ह जुजु होशिया
1 यहूदायाम्ह जुजु आहाजं राज्य यानाच्वंगु झिंनिगूगु दँय् एलाहया काय् होशिया सामरियाय् इस्राएलयाम्ह जुजु जुल। वं गुदँ राज्य यात।
2 वं परमप्रभुयात मयःगु मभिंगु ज्या यात, अय्नं व स्वयाः न्ह्यःयापिं इस्राएलया जुजुपिन्सं याःगु ति धाःसा मखु।
3 अश्शूरयाम्ह जुजु शलमनेशेरं होशियायात हमला याः वल। होशियां वयागु अधीनय् च्वनाः दँय्दसं वयात कर पूगु खः।
4 तर अश्शूरयाम्ह जुजुं होशियां थःत ध्वंलाःगु खन। छाय्धाःसा वं मिश्र देशया जुजु सोया थाय् दूतत छ्वल। अले दँय्दसं बीमाःगु कर मबिल। उकिं शलमनेशेरं वयात ज्वनाः झ्यालखानाय् तल।
सामरियाया नाश
5 अश्शूरयाम्ह जुजुं देशन्यंक हमला यात अले वं स्वदँ तक सामरिया शहरयात घेरय् याना तल।
6 होशियां राज्य यानाच्वंगु गुंगूगु दँय् अश्शूरयाम्ह जुजुं सामरिया त्याका काल। अले इस्राएलीतय्त ज्वनाः अश्शूरय् यंकाः हलहय्, हाबोर खुसि सिथय् दुगु गोजानय् व मादीतय्गु शहर शहरय् तल।
7 मिश्र देशयाम्ह जुजु फारोया ल्हातं त्वःतकाः मिश्र देशं पित हयादीम्ह परमप्रभु थः परमेश्वरया विरोधय् इस्राएलीतय्सं पाप याःगुलिं थ्व फुक्क जूगु खः। इमिसं मेपिं द्यःतय्त पुजा यात।
8 अले परमप्रभुं इमिगु न्ह्यःनं पित छ्वःपिं मेमेगु जातित व इस्राएलया जुजुपिन्सं याःथें इमिसं नं यात।
9 इस्राएलीतय्सं मेपिन्सं मसीकं परमप्रभु इमि परमेश्वरयात मयःगु यक्व ज्या यात। इमिसं पिवाः च्वनिपिं च्वनीगु थासंनिसें कयाः ततःधंगु पखाः ग्वयातःगु शहर तक, फुक्क शहरय् थःगु निंतिं पुजा यायेगुथाय् दय्कल।
10 डाँडा डाँडाया च्वकाय् व फुक्क वाउँगु सिमाया क्वय् इमिसं च्वखगु ल्वहंया थां व अशेरा द्यःमय्जुया थां तल।
11 परमप्रभुं देशं पित छ्वःपिं मनूतय्सं याःथें इस्राएलीतय्सं पुजा याइगु थासय् धुपाँय् च्याकल। इमिसं मभिंगु ज्या यानाः परमप्रभुयात तंचाय्कल।
12 इमिसं मूर्ति पुजा यानाच्वंगुलिं, परमप्रभुं धयादिल, “छिमिसं मूर्ति पुजा याये मते।”
13 परमप्रभुं अगमवक्तात व दूतत छ्वयाहयाः इस्राएल व यहूदायात थ्व ख्याच्वः ब्यूगु खः, “छिमिसं मभिंगु पहःचहः त्वःताः जिं छिमि पुर्खातय्त बियागु व्यवस्थाकथं व थः दास अगमवक्तातपाखें छिमित बियागु आज्ञा व विधि मानय् या।”
14 तर इमिसं आज्ञा पालन मयात, परमप्रभु थः परमेश्वरयात विश्वास मयाइपिं इमि पुर्खात थें जिराहा जुल।
15 इमिसं वय्कःया आज्ञा पालन मयात, वय्कलं इमि पुर्खातलिसें चिनादीगु बाचा व वय्कलं बियादीगु ख्याच्वःयात हेला यात। इपिं ज्यालगे मजूगु मूर्तितय्गु ल्यू वन, इपिं थः नं ज्यालगे मजूपिं जुल। इमिसं थः जःखः च्वंपिं जातितय्सं याःथें यात। खः ला, परमप्रभुं इमित “इमिसं याःथें छिमिसं याये मते धकाः आज्ञा बियादीगु खः।” परमप्रभुं याये मते धयादीगु ज्या हे इमिसं यात।
16 इमिसं परमप्रभु इमि परमेश्वरया फुक्क आज्ञा त्वःतल, अले पुजा यायेत धातुया निम्ह द्वहं दय्कल। इमिसं अशेरा द्यःमय्जुया छगू थां दय्कल। इमिसं आकाशया नगुयात भागि यात, बालद्यःयागु सेवा यात।
17 इमिसं थः काय्म्ह्याय्पिं मिइ बलि बिल, इमिसं ज्वखना स्वल, तन्त्रमन्त्र यात, अले परमप्रभुयात मयःगु ज्या यायेत थःपिन्त मिल। थुकथं इमिसं वय्कःयात तंचाय्कल।
18 उकिं परमप्रभु इस्राएल खनाः तंचायादिल। इमित थःगु न्ह्यःनं अलग यानादिल। यहूदाया कुल जक ल्यनाच्वन।
19 यहूदायापिं मनूतय्सं नं परमेश्वरया आज्ञा पालन मयात। इपिं इस्राएलीतय्सं दय्कूगु नियमकथं जुल।
20 उकिं परमप्रभुं इस्राएलयापिं फुक्क मनूतय्त त्वःतादिल। वय्कलं इमित दुःख बियादिल, लुटे याइपिनिगु ल्हातय् बियादिल। लिपतय् इमित थःगु न्ह्यःनं पितिनाछ्वयादिल।
21 परमप्रभुं इस्राएलयात दाऊदया घरानापाखें अलग यायेधुंकाः इस्राएलीतय्सं नबातया काय् यारोबामयात थः जुजु दय्कल। यारोबामं इस्राएलयात परमप्रभुपाखें तापाकाः तःधंगु पाप याकल।
22 इस्राएलीतय्सं यारोबामं याः थें हे पाप याना जुल। इमिसं व मत्वःतू,
23 परमप्रभुं थः दास अगमवक्तातपाखें ख्याच्वः बियादीगु थें इमित थःगु न्ह्यःनं पितिनामदीतले इपिं उकिं लिहां मवः। उकिं इस्राएलीतय्त ज्वनाः इमिगु देशं अश्शूरय् यंकल। इपिं थौं तक अन दनि।
परदेशीत इस्राएलय् च्वंवःगु
24 अश्शूरयाम्ह जुजुं बेबिलोन, कूता, अव्वा, हमात व सपर्बेम शहरं मनूत हयाः इस्राएलीतय्गु थासय् सामरियाया शहर शहरय् तल। इमिसं उपिं शहरत अधीनय् कयाः अन च्वन।
25 इपिं अन च्वंबलय् न्हापा ला इमिसं परमप्रभुयात मानय् मया, उकिं परमप्रभुं इमिथाय् सिंहत छ्वयादिल। सिंहतय्सं इमि छुं मनूतय्त स्यात।
26 अले इमिसं अश्शूरयाम्ह जुजुयाथाय् थथे धाय्के छ्वत, “छिं सामरियाया शहरय् तये हःपिं मनूतय्सं व देशया द्यःयागु थितिकुति मस्यू, इमिसं व द्यःयात खःकथं पुजा मयाःगु जुयाः व द्यवं इमित नाश यायेत सिंहत छ्वयाहःगु दु।”
27 अले अश्शूरयाम्ह जुजुं थ्व उजं बिल, “छिमिसं सामरियां ज्वनायंकूपिं पुजाहारीत मध्ये छम्हसित अन छ्वयाब्यु, वयात अन हे ति, वयात उगु देशया द्यःयागु नियम मनूतय्त स्यनेमा।”
28 थथे सामरियां ज्वनायंकूम्ह छम्ह इस्राएली पुजाहारी बेथेलय् वनाः अन हे च्वन। अन वं परमप्रभुयात गय् यानाः आराधना यायेगु धकाः स्यन।
29 अय्नं सामरियाय् तःपिं मनूतय्सं थथःगु शहरय् थःथः द्यःतय्गु मूर्तित दय्काः उमित सामरियाया मनूतय्सं दय्कूगु पुजा याइगु थासय् तयाबिल।
30 बेबिलोनयापिं मनूतय्सं सुक्कोत-बनोत द्यःया मूर्तित, कूतायापिं मनूतय्सं नेर्गलया मूर्तित, हमातया मनूतय्सं अशीमाया मूर्तित,
31 अव्वायापिं मनूतय्सं नेभज व तर्ताकया मूर्तित दय्कल। सपर्बेमीतय्सं थः द्यः अद्रम्मलेक व अनम्मलेकया निंतिं थःकाय् म्ह्याय्पिन्त मिइ बलि बिइगु।
32 इमिसं परमप्रभुयात नं मानय् याइगु। तर पुजा याइगु थासय् दुगु थांया निंतिं पुजाहारी ज्या यायेत थःगु हे जातियापिं मनूत ल्यल।
33 इमिसं परमप्रभुया आराधना यात अय्नं थः वःगु देशया थितिकुति कथं थः द्यःतय्त नं पुजायात।
34 इमिसं थौं तक नं थःगु पुलांगु थितिकुति यानाच्वंगु दु। इमिसं न परमप्रभुयात आराधना यात, न इमिसं वय्कलं इस्राएल नां बियादीम्ह याकूबया सन्तानयात बियादीगु आज्ञा, नियम व विधि मानय् यात।
35 परमप्रभुं इस्राएलीतलिसें छगू बाचा चिनाः थज्याःगु आज्ञा बियादीगु खः, “छिमिसं मेपिं द्यःतय्त पुजा याये मते, इमित भागियाये मते, इमिगु सेवा याये मते अले इमिथाय् बलि छाये मते।
36 तर थःगु बल्लाःगु शक्तिं व चकंगु लपुं छिमित मिश्र देशं पित हयादीम्ह परमप्रभुयागु जक आराधना या। वय्कःया न्ह्यःने थःगु छ्यं क्वछुकि व वय्कःयात हे छिमिसं बलि ब्यु।
37 छिमिगु निंतिं वय्कलं च्वयादीगु विधि, विधान नियम व आज्ञा पालन या। छिमिसं मेपिं द्यःतय्त पुजा याये मते।
38 जिं छिपिंलिसें चिनागु बाचायात ल्वःमंके मते, छिमिसं मेपिं द्यःतय्त पुजा याये मते।
39 थः परमप्रभु परमेश्वरया जक आराधना या। वय्कलं हे छिमित छिमि फुक्क शत्रुतय्गु ल्हातं त्वःतकादी।”
40 अय्नं इमिसं खँ मन्यन, अले न्हापा जू थें जुया हे च्वन।
41 इमिसं परमप्रभुया आराधना यानाच्वंगु जूसां थःगु मूर्तियात पुजा यायेगु ज्या नं याना हे च्वन। थौं तक नं इमि काय् म्ह्याय्पिन्सं व छय् छुइपिन्सं अथे हे यानाच्वंगु दु।