7
1 एलीशां धाल, “परमप्रभुया वचन न्यनादिसँ! परमप्रभुं थथे धयादी – कन्हय् थुबलय् हे सामरियाया ध्वाखाय् ५ किलोग्राम छुचुं वा १० किलोग्राम तछ्वया मू १२ ग्राम वहः जुइ।”
2 जुजुयात तिबः बियाच्वंम्ह कप्तानं परमेश्वरया मनूयात धाल, “स्वइदिसँ, परमप्रभुं स्वर्गया झ्याः चाय्कादिल धाःसां थथे जुइ फइ ला?”
एलीशां लिसः बिल, “व छं थःगु हे मिखां खनी, तर छं उकिं नयेदइ मखु।”
अरामया सेना बिस्युं वंगु
3 सामरियाया ध्वाखा पिने प्यम्ह छेंगूया पुनेयःगु ल्वय् दुपिं मनूत दु। इमिसं थवंथः धाल, “झीपिं थन मसीतले छाय् च्वनाच्वनेगु?
4 शहरय् दुहां वन धाःसा झीपिं अनया अनिकालं सी। थन च्वनाच्वन धाःसा नं झीपिं सी। बरु झीपिं अरामीतय्गु छाउनीइ वनाः आत्मसमर्पण यायेनु। इमिसं झीत त्वःतल धाःसा झीपिं म्वाइ। इमिसं झीत स्यात धाःसा झीपिं सी।”
5 अले सन्ध्याकाः इलय् इपिं अरामीतय्गु छाउनीपाखे वन। छाउनीया लिक्क थ्यंबलय् अन सुं मदु।
6 सल व रथ ज्वनाः छगू तःधंगु सेना न्ह्यज्याना वयाच्वंगु थें ज्याःगु सः अरामीतय्सं ताःगुलि थथे जूगु खः। परमेश्वरं हे अथे याकादीगु खः। इमिसं थवंथः धाल, “स्व, इस्राएली जुजुं झीत हमला यायेत हित्ती व मिश्रया जुजुपिन्त धिबा पुलाः हःगु दु।”
7 उकिं उखुन्हु सन्ध्याकाः इलय् अरामीत थःगु ज्यान बचय् यायेत पाल, सल, गधा व छाउनी अथें त्वःताः बिस्युं वंगु खः।
8 छाउनीइ थ्यनेवं उपिं छेंगूया पुनेयःगु ल्वय् दुपिं मनूत छगू पालय् दुहां वन। अन नयेत्वने यात, अले अन दुगु वहः, लुँ व वसःत मेथाय् यंकाः सुचुकाबिल। अनंलि इपिं मेगु पालय् वन, अन नं इमिसं अथे हे यात।
9 इमिसं थवंथः खँ ल्हात, “झीसं थथे याये मज्यू। थौं बांलाःगु खँ कनेगु दिं खः। थ्व खँ सुचुकातये मज्यू। कन्हय् सुथय् तक थ्व खँ सुयातं मधाल धाःसा झीत सजाँय जुइ। आः थत्थें दरबारय् वनाः थ्व खँ कं वनेनु।”
10 इपिं सामरियाय् लिहां वल। अले ध्वाखाय् च्वंपिं पालेतय्त तःसलं धाल, “जिपिं अरामीतय्गु छाउनीइ वनाबलय् अन जिमिसं सुयातं मखना। जिमिसं सुं मनूयागु सः नं मताः। सल व गधात चिनातःगु दु। पालत अथें त्वःतातःगु दु।”
11 अले ध्वाखाय् दुपिं पालेतय्सं तःसलं हालाः दरबारय् थ्व खबर बिल।
12 जुजुं चान्हय् हे दनाः थः भारदारतय्त धाल, “अरामीतय्सं छु यायेत्यंगु, जिं व छिमित धाये। थन अनिकाल जुयाच्वंगु खँ इमिसं स्यू। झीपिं नयेगु नसा मालेत शहरं पिने पिहां वनेबलय् झीत म्वाःम्वाकं ज्वनाः शहर त्याका कायेगु मतिइ तयाः ‘इपिं छाउनी त्वःताः ख्यलय् वनाः सुलाच्वंगु दु।’ ”
13 वया भारदारत मध्ये छम्ह भारदारं धाल, “झीगु शहरय् ल्यंदनिपिं न्याम्ह सलत बियाः अन छु जूगु खः व सीकेत मनूत छ्वयादिसँ। थन ल्यनाच्वंपिं इस्राएलीतय्गु थें हे इमिगु बिजोग जुइ मखु। धात्थें इपिं थन सीपिं इस्राएलीत थें जुइ। छु जूगु खः सीकेत झीसं इमित छ्वयेनु।”
14 इमिसं निगः रथ व उकिया सलत ल्यल। अले जुजुं इमित अरामी सेनायात छु जूगु खः व सीकेत छ्वल। अले वं रथ चलेयाइपिन्त थथे उजं बिल, “वनाः छु जूगु खः व सीकि।”
15 उपिं मनूत यर्दन तक हे मामां वन। इमिसं लँ दुछि हे अरामीतय्सं हथाय् पथासं बिस्युं वंबलय् वांछ्वःगु वसः व हलंज्वलं खन। इमिसं लिहां वयाः जुजुयात फुक्क खँ कन।
16 उकिं मनूतय्सं वनाः अरामीतय्गु छाउनी लुतय् यात। थुकथं परमप्रभुं धयादीगु थें हे ५ किलोग्राम छुचुं वा १० किलोग्राम तछ्वया मू १२ ग्राम वहः जुल।
17 इस्राएलयाम्ह जुजुं थःत तिबः बीम्ह कप्तानयात शहरया ध्वाखा जिम्मा ब्यूगु खः। जुजुं वयागु छेँय् नापलाः वंबलय् परमेश्वरया मनुखं अगमवाणी याःथें व कप्तानयात ध्वाखाय् मनूतय्सं तुतिं न्हुत्तुन्हुयाः स्यात।
18 परमेश्वरया मनुखं जुजुयात धाल, “कन्हय् थ्व हे इलय् तक सामरियाया ध्वाखाय् ५ किलोग्राम छुचुं वा १० किलोग्राम तछ्वया मू १२ ग्राम वहः जुइ।”
19 कप्तानं धाःसा परमेश्वरया मनूयात थथे धाःगु खः, “स्व, परमप्रभुं थःम्हं हे स्वर्गया झ्याः चाय्कादिल धाःसां थथे जुइ फइ ला?” परमेश्वरया मनुखं थथे धाःगु खः, “थ्व छं थःगु हे मिखां खनी, तर छं उकिं छुं नयेदइ मखु।”
20 वयात अथे हे जुल, छाय्धाःसा मनूतय्सं ध्वाखाय् वयात न्हुत्तुन्हुल अले व सित।