लेवीतय्गु सफू
म्हसीका
लेवीया सफू यहूदी मस्तय्सं ब्वनेमाःगु न्हापांगु सफू खः। थ्व सफू ख्रीष्ट स्वयाः १४०० दँ न्ह्यः मोशां च्वःगु खः। होरब पर्वतया लिक्क इस्राएलीत च्वनाच्वंबलय् परमेश्वरं इमित यक्व उजं बियादिल। थ्व सफुलिइ उबलय् इस्राएलीतय्सं याइगु आराधनाया नियम, धार्मिक विधि व उपिं नियम व विधि पूवंकेत जिम्मा बियातःपिं पुजाहारीतय्सं मानय् यायेमाःगु नियम दु। थुपिं नियम परमेश्वरं मोशापाखें बियादीगु खः।
थ्व सफूया मू खँ परमेश्वरया पवित्रता व इस्राएलीतय्सं इस्राएलया पवित्र परमेश्वरलिसें थःगु स्वापु तया तयेत परमेश्वरयात आराधना यायेगु व थःगु जीवन हनेगु खःगु पहः खः। थ्व सफुलिइ छु जूसा मनूतय्गु म्ह अशुद्ध जुइ, छु जूसा छेँ अशुद्ध जुइ, उपिं शुद्ध यायेत छु छु यायेमाः धयागु खँ नं थ्व सफुलिइ दु। गज्याःपिं पशुत अशुद्ध जुइ, गज्याःपिं पशुत शुद्ध जुइ धयागु बारे बांलाक च्वयातःगु दु। छम्ह मिजंनं छम्ह मिसालिसें वा छम्ह मिसां छम्ह मिजंलिसें याये मत्यःगु ज्याया बारे नं थुकी च्वयातःगु दु। येशू ख्रीष्टं निगूगु तःधंगु आज्ञा धकाः कनादीगु नांजाःगु खँग्वः “थः जःलाखःलापिन्त थःत थें मायाया” थ्व सफूया १९:१८ पदय् दु।
धलः पौ
देछा व बलिदानया नियम १:१–७:३८
हारून व वया काय्पिनिगु अभिषेक ८:१–१०:२०
शुद्ध व अशुद्धया नियम ११:१–१५:३३
प्रायश्चितया दिं १६:१-३४
जीवन व आराधनाय् पवित्रताया नियम १७:१–२७:३४
लेवी
बलि बीगु नियम
1
होमबलि
1 परमप्रभुं मोशायात पवित्र पालया दुनें सःताः धयादिल,
2 “इस्राएलीतय्त धा, ‘सुनानं परमप्रभुया निंतिं बलि बीबलय् वयागु बलि सा द्वहंया बथां वा फै दुगुचाया बथांपाखें जुइमाः।
3 “ ‘वं होमबलि सा द्वहंया बथांपाखें छायेगु खःसा व खू मदुम्ह मिजंम्ह जुइमा, वं व पशु नापलायेगु पालया ध्वाखाय् छाये हयेमाः अले व पशु परमप्रभुया न्ह्यःने वयागु लागिं नालेबहः जुइ।
4 अले वं थःगु ल्हाः होमबलि पशुया छेनय् तयेमाः। अले वयागु प्रायश्चितया लागिं ग्रहण याइगु जुइ।
5 व मनुखं द्वहंचायात परमप्रभुया न्ह्यःने स्यायेमाः। अले हारूनया पुजाहारी काय्पिन्सं द्वहंया हि कयाः नापलायेगु पालया ध्वाखाया दुने च्वंगु वेदीया छचाःखेरं छ्वाकेमाः।
6 अनंलि होमबलि छाःम्ह मनुखं बलि बी धुंकूम्ह पशुया छेंगू तुनाः वयागु लायात ध्यनाः कुचा कुचा यायेमाः।
7 पुजाहारी हारूनया काय्पिन्सं वेदीइ मि तयाः उकिया द्यने सिँ बांलाक मिले यानाः तयेमाः।
8 अले वया काय्पिं अर्थात पुजाहारीतय्सं वेदीया च्वय् मिइ तयातःगु सिँया द्यःने बलि बी धुंकूम्ह पशुयागु छ्यं, दाः व ला बांलाक ब्वया तयेमाः।
9 आतापुति भ्वरि व तुति धाःसा लखं सिलेमाः अले व फुक्कयात पुजाहारीं वेदीइ छ्वाकेमाः। थ्व परमप्रभुयात यःगु नस्वाः वःगु विशेष देछा, होमबलि खः।
10 “ ‘सुनानं परमप्रभुया निंतिं बथांपाखें फै वा दुगुचा बलि हल धाःसा वं खू मदुम्ह मिजंम्ह छायेमाः।
11 वं परमप्रभुया न्ह्यःने वेदीया उत्तरपाखे छाःम्ह पशुयात पालाः स्यायेमाः, अले हारूनया पुजाहारी काय्पिन्सं वयागु हि वेदीइ जःखः छ्वाकेमाः।
12 अले व मनुखं पशुयात कुचा कुचा यायेमाः। पुजाहारीं फुक्कयात वेदीइ मिया च्वय् सिँकाँय् ब्वया तयेमाः।
13 वं बलि बीहःम्ह पशुयागु आतापुति भ्वरि व तुतियात लखं सिलेमाः। अले पुजाहारीं फुक्क यंकाः वेदीइ छ्वय्केमाः। थ्व परमप्रभुयात यःगु नस्वाः वःगु होमबलि, विशेष देछा खः।
14 “ ‘सुनानं परमप्रभुया निंतिं झंगःतय्गु होमबलि छायेगु खःसा व झंगः सुकुभत्तु वा बखुं जुइमाः।
15 पुजाहारीं व छाःम्ह झंगः वेदी लिक्क हयाः छ्यं म्वःहिलाः चफुइमाः। झंगःया छ्यंयात वेदीइ छ्वय्केमाः। हि धाःसा वेदीया सिथय् थाथा यायेमाः।
16 उकिं झंगःया गलः नापं भ्वरि लिकयाः वेदीया पुर्बपाखें नउ दुथाय् वांछ्वयेमाः।
17 उकी देछाःम्ह झंगःयात कुचा मयासें पपूया दथुं फायेमाः। पुजाहारीं वेदीइ दुगु मि च्वय् सिँइ झंगःयात छ्वय्केमाः। थ्व परमप्रभुयात यःगु नस्वाः वःगु होमबलि, विशेष देछा खः।